Wir Albrechte von gotes gnaden hertzog zu Sachssen zu Lunemburg zu Angern vnd zu Westfalen pfaltzgraff zu Sachssen vnd Graff zu Brene Bekennen vnd tunkunt offenlichen mit diesem briue Allen den die yn
sehen odir horent lesen Wann die hochgebornen fursten etwenne her ludwig genant der Romer seliger gedechtnisse vnd her Otte die weil gebruder vnd marggrauen zu Brandenburg des heiligen Romisschen
Reichs Erczkamerer vnser lieben Oheim von fryer kur wollekor mit gutem willen wolbedachtem mut vnd benantem rate Des durchluchtigisten fursten vnd herren hern Wenczlaw kunig zu Beheim des Allerdurch
leuchtigisten fursten vnd herren hern karls Romisschen keis(er)s zu allen zeiten merers des Reichs vnd kunigs zu Beheim vns(er)s lieben gnedigen herren Erczgebornen Sone vns(er)s lieben Oheims alle sein brud(er)
vnd erben zu ain ewiclich in rechte bruderschafft erbschafft vnd eynung der marken zu Brandenburg des Erczkamereramptes des Romisschen Reichs vnd auch der kur stymme vnd wale eines Romisschen kuniges
eines kunfftigen keis(er)s eintrechticlich empfangen vnd genomen haben in aller der masse als sulche ordenunge teidunge vnd sachen hienach in dies(e)m briue von worte zu worte geschriben steen Wir
ludwig genant der Romer vnd wir Otte gebruder von gotes gnaden Marggrauen zu Brandenburg vnd zu lusicz des heiligen Reichs oberisten Camerer pfaltzgrauen by Rein vnd hertzogen in Beiern Bekennen
vnd tunkunt offenlich mit dies(e)m briue Allen den die yn sehent oder horent lesen Wann wir in kegenwertikeit des Allerdurchluchtigisten fursten vnd herren hern karls Romisschen keis(er)s zu allen zeiten merers des
Reichs vnd kunigs zu Beheim vns(er)s lieben gnedigen herren mit wolbedachtem mute mit rate vns(er)r getrewen vndertanen mit gutem willen mit rechtem wissen den hochgebornen fursten hern Wenczlawen des egen(anten)
vns(er)s herren des keis(er)s Erczgebornen Son vnd alle des egen(anten) vns(er)s herren erben mannes geslechte wenne er der mit hilfe gotes furbasmer gewinnet vnd derselben kinder erben vnd erbis erben vnd ob die alle
nicht weren den hochgebornen fursten hern Johansen Marggrauen zu Merhern vnd seine erben vnd erbis erben mannes geslechte ewiclich zu vns in vnser bruderschafft vnd erbschafft genomen vnd em=
pfangen haben das sie mitsampt vns in eygenthafften lehen vnd herschafften furstentumen vnd landen furbasmer Marggrafen zu Brandenburg vnd zu lusicz sein wesen vnd heissen sullen vnd das sie alle
vnd ir iglicher besundern wiewol der vnder sich Marggrauen zu Brandenburg vnd zu lusicz haben halten nennen vnd schriben mugen vnd sullen vnd der Marggraffschafft vnd furstentume zu Branden=
burg vnd zu lusicz graffen vnd wapen in Baniren vnd auch sust nach furstlichen siten allweg vnd zu allen iren notdurfften eren vnd wirden nach freier willekur vffwerffen vnd furen mugen gleicher
weis als wir selbir vnd als seliger gedechtnisse Marggrauen zu Brandenburg vnd zu lusicz vnser vorfarn vormals getan haben vnd wann wir auch dem egen(anten) hern Wenczlawen vns(er)s herren des keis(er)s
erczgeborne Sone vns(er)m lieben bruder vnd mitgeerbe vnd allen des egen(anten) vns(er)s herren des keis(er)s erben mannes geslechte wienel er derselben furbasmer gewinnet vnd derselben kinde erben vnd erbes erben
vnd ob die alle nicht weren dem hochgebornen fursten hern Johansen Marggrauen zu Merhern vnd seinen erben vnd erbes erben mannes geslechte des mit gutem willen gegunst haben das die hochgebornen
fursten her Bolke hertzog zu Slesien vnd herre zu der Swidnicz vnd zu den Jawr vnd der egen(ante) her Johans Marggraff zu Merhern die lehen der furstentume vnd der Marggraffschafft beynamen zu vns(er)s
lieben bruder hern Wenczlawen hant vnd aller der die das anget als davor begriffen ist recht vnd redlich empfangen haben Wann wir dieselben lehen alle mit gutem willen mit dancz der Marggraffschafft
zu Brandenburg vnd zu lusicz vnd mit and(er)n gewonlicher bescheideheit vns(er)m herren dem keis(er) vffgelassen haben vnd er die lehen also vorlassen hat durch vns(er) sunderliche bete allen den die
davor geschriben seint Also das wir vnd sie die mit einand(er) tragen sullen Wir die obgen(anten) Marggrauen ludwig vnd Otte vnd vns(er) erben vnd erbis erben mannes geslechte in unglicher geweer vnd sie
in der masse als davor vnd harnach begriffen ist Doriou meynen vnd wollen wir mit wolbedachtem mute mit rate vns(er)r getrewen mit gutem willen vnd mit rechtem wissen Were das sache das wir
die obgen(anten) Marggrauen ludwig der Romer vnd Marggraff Otte also sturben das wir ehliche vns(er) leibe erben mannes geslechte hinder vns nicht lieszen oder ob wir ouch erben gewunnen vnd
die also vorgiengen das sie irs leibes erben mannes geslechte hinder yn ouch nicht lieszen wenne oder in welichen zeiten das geschee das denne zuhant die obgen(anten) Marggraffschafft vnd furstentume
zu Brandenburg vnd zu lusicz mit dem obristen Camererampt des Reichs mit der stymme der kur vnd wal eines Romisschen kunigs eines kunfftigen keis(er)s mit allen lehen herschafften
freiheiten wirden eren landen leuten manschafften gerichten vnd allen iren zugehorungen wie man die benennen mag mit sunderlichen worten nichtes vszgenomen vff den egen(anten) hern Wenczlawen
vns(er)n lieben bruder der vnser gleicher mitgeerb ist vnd sein sol vnd vff ander vns(er)s herren des keis(er)s erben mannes geslechte wienel er der gewinnet mit hulffe gotes vnd vff ir erben vnd erbes erben
vnd ob die alle nicht weren vff den hochgebornen fursten hern Johansen Marggrauen zu Merhern vnd seine erben vnd erbes erben mannes geslechte ewiclich lediclich vngehindert vnd on alle irrung
vallen sol Were aber sache das wir die obgen(anten) ludwig der Romer vnd Otte oder vnser erben also sturben das wir tochter hinder vns lieszen das sie dieselben wirdiclich als fursten kinder bestaten
sullen Also das iglicher tochter helfentausent schok grozzer pfenning prager muncze volgen vnd mit ir geben werden vnd benamen meynen wir das wir vnd alle vns(er) leibes erben mannes ge=
slechte die weil wir vnd sie leben muncz vnd in geweer der Marggraffschafft zu Brandenburg vnd zu lusicz der stymme der kur der wal eines Romisschen kuniges eines kunfftigen keis(er)s vnd aller
herschafft wirden vnd eren mit fride vnd mit gemache bliben vnd vngehind(er)t bliben sullen ouch sol die hochgeborne furstinne fraw Jngbark Marggraffinne zu Brandenburg vnd zu lusicz
vnser des Marggrauen ludwigs des Romers ehliche wirtinne bey irem leibgedinge das wir ir iczund gemachet haben oder nach machen vnd verschriben werden genzlich vngehind(er)t bliben Ouch glo=
ben wir in guten trewen on geuerde den egen(anten) hochgebornen fursten hertzogen Bolken vnd Marggrauen Johansen das wir bestellen vnd vnvorzogentlich schaffen wollen das alle vns(er) getrewen vnder=
tanen fursten Graffen herren freihen Riter knechte Burgermeister Rete Schepfen vnd Gemeinschafft vns(er)r furstentume lande vnd stete der Marggraffschafft zu Brandenburg vnd zu lusicz alle=
sampt vff die egen(anten) sachen von worte zu worte als sie davor begriffen sein hulden globen vnd sweren sullen Vnd daruber ir briue geben mit iren anhangenden Jngsigeln als schire sie vnser
herre der keis(er) oder die egen(anten) fursten hertzoge Bolke vnd Marggraff Johans des ermanen Ouch biten wir vns(er)n egen(anten) herren den keis(er) demuticlich vnd mit allem vleisz das er von we=
gen des heiligen Romisschen Reichs mit volkomenheit keis(er)licher macht alle die vorgeschriben sache von worte zu worte als sie begriffen sint bestetigen wolle durch sunderliche gnade in dem
besten gestalt vnd in der besten formen vnd weis als das ymmer gesein mag noch gewonheit eren vnd wirden des heiligen Romisschen Reichs Vnd biten auch alle die Erwirdigen vnd hochgebor=
nen herren die kurfursten des heiligen Reichs Geistlich vnd werltlich das sie ir besunder briue zu geczeugnisse vnd zu ewigem gedechtnisse daruber geben wollen mit orkund dicz briues mit vns(er)n
anhangenden Jngsigeln vorsigelt der geben ist zu Nurmberg Nach Cristi gepurt drewzehenhund(er)t Jare vnd darnach in dem drewvndsechtzigsten Jare an dem nechsten samztag vor dem suntag so
man singet Judica in der vasten Vnd wann auch sulche vorgeschriben bruderschafft erbschafft eynunge ordenunge teidunge vnd sachen mit sunderlichen verhengnisse willen vnd wissen des egen(anten) vns(er)s
herren hern karls als eines Romisschen keis(er)s vnd in seiner kegenwertikeit mit rechtem vteil der Erwirdigen vnd hochgebornen fursten vnd herren der kurfursten des heiligen Reichs geistlich vnd werltlich das sie
darumb vorbedechticlichen miszbraucht vnd gesprochen haben gescheen sein Vnd auch seliger gedechtnisse der hochgeborne furste etwenne her Rudolff hertzog zu Sachssen vnser lieber vater dieweil als ein kurfurste
vnd Erczmarschalk des heiligen Reichs ober allen sulchen sachen gewesen ist Vnd wir aller obgeschriben sachen in kirchen vnd sust emiclich vnderweiset sein Doriou durch sulcher obgen(anten) sachen willen So geben
wir obgenant Albrecht als ein hertzog zu Sachssen zu allen sulchen obgeschriben ordenunge eynung bruderschafft aneerbeschafft teiding vnd sachen vns(er) volbort gutem willen vnd gunst Also das sie
in allen iren formen vnd meynungen als sie gescheen sint in ganczen krefften ewiclich bliben sullen Vnd wir geloben ouch fur vns vns(er)s erben vnd nachkomen hertzogen zu Sachssen dem vorgen(anten) vns(er)m herren
dem keis(er) hern Wenczlaw kunig zu Beheim seinem Sone vnd andern iren erben die das anruret in guten trewen on geuerde bynnen ir schulden das der vorgenant Marggraff Otte von Brandenburg furber
ane ehliche seines leibes mannes erben als das in seinen obgen(anten) briefen begriffen ist das wir denne den egen(anten) vns(er)n Oheim hern Wenczlaw kunig zu Beheim oder einen andern seiner bruder oder erben den das
noch lute der egen(anten) briefe beruren wirdet einen rechten Marggrafen zu Brandenburg kurfursten vnd Erczkamerer des heiligen Reichs vnd yemand anders nennen schriben halden zelen achten vnd haben sullen
vnd wollen in allen sulchen eren vnd wirden die einen rechten Marggrafen zu Brandenburg angehoren vnd in aller der masse als sulche briefe vswisen die yn die vorgen(anten) Marggrafen zu Brandenburg als vor=
geschriben stehet daruber geben han mit orkunt dicz briues versigelt mit vns(er)m anhangendem Jngsigel der geben ist zu prage Nach Cristi geburt drewzehenhund(er)t Jare darnach in dem zweyvndsibenczigsten
Jare des suntags Quasimodogeniti