Wir Gebhart vnd Syfrid brudern von Querenfort gesizzen zu Werdenhayn Bekennen vnd tun kunt offenlich mit disem briue alln
den dy yn sehent oder horent lesen daz vns der Allerdurchleuchtigste furste vnd herre her Karl romischer keiser zu Allen zeiten
merer des Reichs vnd kunig zu Beheim vnser lieber gnediger herre von seiner vnd seiner erben wegen kunige zu Beheim recht
vnd redlich versazt hat zu einem rechtem pfande vnd in pfandis weise ir vesten Holsyn genant mit manschafft vnd allem
dem daz dorzu gehoret fur Achtzehenhundert schock guter behemischer grozzer prager pfenninge die wir yn an bereitem
gelde gelihen vnd bezalet haben Vnd haben vns ouch fur das obgenant gelt zu dem egen(anten) hawse beweiset an vorwerken vnd an
Andern nuzen ierlicher gulte hundert vnd Achtzig schock der egenanten grozzen Vnd doran ouch funfftzig schock mit den
man Holsyn die egenant ir vesten halden sol Also was an sulcher gulte in dem gebiete zu Holsyn gebreche daz sullen sie vns
sus in irem lande zu lusiz erfullen vnd beweisen das is on hindernisse genglich genukke Vnd wir vnd vns erben Vnd ob wir egen(anten)
Gebhart an erben sturben der seifrid von Querenfort vns vetter Vnd sein erben sullen die egenanten vesten Holsyn mit der
egenanten gulte vnd aller zugehorunge vor das obgenant gelt Achtzehenhundert schock grozzer Als vnser pfand ynnehaben vnd
halden so lange daz die egenanten vnser herren ir erben vnd nachkomen kunige zu Beheim vns des obgenanten geltes bezaln
Vnd welche zeit sie vns das egenant gelt Achtzehenhundert schock geben so sullen wir yn oder iren erben vnd nachkomen
kunigen zu Beheim der egenanten irer vesten Holsyn mit manschafft der egenanten gulte vnd aller zugehorunge ane wider
rede abtreten Vnd yn die zustund wider Antwurten on argelist vnd on alles geuerde Vnd bezalen sie vns sulches vnser
obgenantes gelt nach sant Michels tag so sal vns der obgenant zins vnd gulte halb von demselben Jare vff sant Walpurg
tag nechste dornach volgen vnd genukken Gleicherweis geschee sulche bezalunge nach sant Walpurg tag so sal vns das
halbteil sulcher zinses vnd gulte des Jares vff sant Michels tag nechste dornach volgen vnd genukken genglich Vnd wir ob
egenanten von Querenfort fur vns vnd vns erben gelobn in guten truwen on argelist den egenanten vnsern herren iren erben
Vnd nachkomen kunigen zu Beheim daz wir yn mit der egenan(ten) irer vesten Holsyn Alle die weil sie vns pfand ist Als
vor begriffen ist als mit irer offenen vesten gewarten vnd zu dienste sizen sullen vnd wellen wider allermeniclich nymande
vzgenomen zu Allen iren sachen vnd noten wenn oder wie dicke wir oder vns erben des von iren wegen ermanet werden
Wer auch daz vns die obgenant vesten Holsyn abginge vnd Angewunnen wurde von irs krieges wegen on argelist vnd
on geuerde do got vor sey so sullen sie vns vns obgenant gelt Achtzehenhundert schock wider geben oder wider statung tun
mit Andern pfanden als das zwene irer manne vnd zwene vns freunde redliche on geuerde dunket sein Vnd wir vnd vns
erben sullen der die Holsyn die obgenanten vesten gewunnen hetten viende sein vnd bleibn Vnd den egenan(ten) vnsern h(er)ren iren
erben vnd nachkomen kunigen zu Beheim on geuerde dorzu dienen vnd behulfen sein Vnd sich mit sulchen iren vnd
vnsn vienden nicht friden thegen berachten noch sumen dieselb veste wurde yn dann zu vor wider oder wir teten es
denne mit vns obgenan(ten) herren irer erben oder nachkomen kunige zu Beheim gutem willen vnd wissen zu vrkund
dis briues besigelt mit vnsn Anhangenden Jnsigeln der geben ist zu(m) Elbogen nach cristus geburte drewze=
hundert Jare dornach in dem Czwaiundsibenzigistem Jare an dem nechsten donerstag nach sant Jorgen tag