Wir Friderich Balthazar vnd Wilhelm von gotis gnadin lantgrauen in doringen marggrauen czu missen in dem ostirland
vnd czu landisperg grauen czu orlamunde vnd herrn des landis czu plessen bekennen offinlichin vnd tun kunt mit
disem kegenwertigen briue daz wir dem edeln irn Thymon von koldicz herrn da selbins vnsirm libin getruwe vnd
sinen erbin durch siner getruwe anneme dinste willin die er vns getun hat vnd noch furder tun sal in gu=
kumftigen czeiten wenne wir des bedurfen an vnser rothsten Jarrinte vnser stat czu grymme drissig schog
breyter grosshen ierlich vffgehebin vnd angewisen bewist habin halb vff sant walpurge tag vnd halb vff
sant michaels tag doch also wen wir adir vnse erbin dem selbin irn Thymen von koldicz vnsirm libin getruwe
adir sinen erbin dryhundirt schog breyter grosshen beczalen so sullen die selbin drissig schog Jerlichs czyns
an vns vnd an vnse erbin lediglich wid(er) gefallin ane hindernisse vnd beweren ym vnd sinen erbin daz selbe
gelt ouch gnediglichin mit craft dis briues wir sullen vnd wollin yn ouch in die selbin bewerunge nicht
irren adir ymande gestaten d(er) sie von vnser wegin daran hind(er) adir enge vnd habin des czu vrkunde vn=
se Jnsigele an dissen brif laszin hengin d(er) gegebin ist czu budissin nach gotis geburt dreyczenhundirt Jar in
dem dryvndsebenzigsten Jare am donrstage vor dem suntage als man singet Jnuocauit