Wir Albrecht Graue von Lindow vnd zu Ryppin fur vns vnd vnser erben bekennen offenlichen mit disem briene allen den die yn sehent oder horen lesen das wir mit wolbedachtem mute Rate vnser
freunde vnd rechter wissen dem Allerdurchleuchtigisten fursten vnd herren hern Karle Romischem keyser zu allen zeiten merer des Riches vnd kunige zu Beheim dem durchleuchtigisten fursten vnd herren
hern Wenczlan kunige zu Beheim Marggrauen zu Brandemburg vnd herzogen zu Slesien seinem Sune vnd iren rechten erben kunigen zu Beheim recht vnd redlichen vorkawfft haben vnd vorkaw=
ffen mit kraft diz briewes vnser Graueschafft zu Lindow in dem lande zu Sachsen gelegen die vesten Lindow vnd die Stat Wokern mit allen iren zugehorungen mit lehnen geistlichen vnd werlt=
lichen mit manschafft vesten vnd vnuestigen mit dorffen eckern gutern zinsen Renten gulden beten diensten eygen bessern holczern seen mit voller vnd ganczer herschafft vnd mit aller lehe=
nusche gerichten oberisten vnd nidersten vnd nemelich mit allen vnd iglichen gutern nuczen vnd zugehorungen besucht vnd vnbesucht oben vnd vnder der erden dy wie sie ¦ley¦ haissen vnd
finden die sein mugen vnd wie man die mit sunderlichen worten benennen mag die von alter zu der Graffschafft vnd herschafft zu Lindow vnd Wokern zugehort haben vnd nach dorzu
gehoren nichtes vszgenomen als wir vnd vnser eltern die vntz an diese zeit gehalten vnd besessen haben vor zwelff tausent vnd vierhundert Schok guter beheimischer grossen prager
pfenninge die vns die egenanten vnser herren der keyser vnd kunige Wenczla sein Son bezalen sullen Sechstausent vnd zweyhundert schok der egenanten grossen in der Stat zu prage vnd
sullen vns oder vnsern Boten die wir dorzu senden werden sulche bezalunge tun vnd geben an guldin sulche werunge vnd gulden als der Rat der Stat zu prage sprichet das do selbest
eine rechte vnd gemeine werunge sey guldin fur grossen zu bezalen Vnd sullen vns sulchs gelt gelaitten vnd bringen bis in vnsers herren des herzogen Stat von Sachsen Wittemberg
genant vnd vns daselbe gelt doselbst antwurten Auch sullen vnd wollen wir wanne das geschiht das wir disses geltes zu Wittemberg an geuerde vorsechert sein den egenanten vnsern her=
ren dem keyser vnd kunig Wenczla seinem Sone oder von iren wegen einem gewissen boten den sie dorzu mit iren offen briewen enden walden die Stat mit manschafft lehnen geistlichen
vnd werltlichen mit dorffen gutern nuczen vnd allen zugehorungen nichtes vszgenomen vnuerczogelichen vnantwurten vnd geben vnd schaffen das denselben die vnsers herren des keyser
oder kunig Wenczla sein Son oder ire Erben kunige zu Beheim also dorzu senden von iren lewten vnd zu in hant von Rittern knechten Burgmannen Burgern vnd Gebawern eine weis=
te gancze vnd erblicke huldunge getan werde vnd genczlichen huldegen on widerrade Vnd sullen die auch mit manschafften lehnen geistlichen vnd werltlichen vnd in allen sachen an die
obgenanten vnser herren den keyser als eine kunig zu Beheim kunig Wenczla seinen Son ire erben vnd nachkomen kunige der Crone vnd des kunigreichs zu Beheim erbliclichen weisen als an
ire rechte naturliche herschafft vnd herren vnd vns doruber aller vorderunge vnd anspruche fur vns vnser erben vnd nachkomen die wir in dheinen weis haben drinn mochten ewicli=
chen verzeihen Auch sullen vnd mugen die egenanten vnser herren keyser Karl vnd kunig Wenczla sein Son vnd ire erben bynnen desen nechsten dreyen Jaren die schirest komen die andern
Sumen geldes Sechstausent vnd zweyhundert Schok beheimischer grosser prager pfenninge an golde mit sulcher werunge vnd auch mit geleite vnd in der egenanten Stat zu Wittemberg
als douor geschriben steet bezalen wenne sie wellen vnd weliche zeit sie das getan haben so sullen vnd wollen wir oder vnser erben yn iren erben oder gewissen boten die mit iren briene
dorzu gesant werden Lindow die vesten aller manschafft lehnen geistlichen vnd werltlichen aller dorffer guter nucze gehiesse vnd zugehorunge mit allem rechte als wir die gehabt
vnd herbracht haben lediclichen vnantwurten vnd geben vnd yn der genczlichen abtreten vnd auch doruff aller vorderunge vnd anspruche fur vns vnser erben vnd nachkomen
ewiclichen verzeihen Were auch das die obgenanten vnser herren oder ire erben kunige zu Beheim vns vnd vnsern erben bynnen denselben nechsten dreyen Jaren des obgenanten geldes
Sechstausent vnd zweyhundert Schok nicht bezalten als douor geschriben ist so sullen vns vnd vnsern erben die obgenanten vnser herren kunige von Beheim Lindow vnd Wokern mit
aller zugehorunge in pfandtsweys vnantwurten vnd yngeben vnd auch bestellen vnd vns vorsechern mit irem hauptman e der sie dohin seczen werden das vns denne dieselben sloz
vnd ire zugehorunge hingeantwurtet werden on geuerde fur die obgenanten Sumen geldes Sechstausent vnd zweyhundert schok der egenanten grossen die wir denne fur dasselbe gelt zurechte
pfande von yn ynnehaben vnd halden sullen so lange bis das wir von yn iren erben oder nachkomen kunige zu Beheim daselbes bezalet werden als douor geschriben steet vnd
wir vnd vnser erben sullen yn domb das sie denselben iren nuczen vnd guter zu solicher losunge sicher sein zu boren an guter vnschedliche bewarunge tun an alles geuerde vnd wann sie vns
vnsern erben oder nachkomen sulche bezalunge getan haben So sullen vnd wollen wir yn iren erben oder nachkomen kunigen zu Beheim oder iren gewissen boten die dorzu mit iren offenen bri=
fen gesant werden Lindow das haws vnd Wokern die Stat vorger mit allen vnd iglichen manschafften lehnen gutern vnd zugehorungen landen vnd lewten als douor begriffen ist gen=
czlichen vnd erbliclichen abtreten vnd vnantwurten vnd furbas mer doruff nymmer in dheinen zeiten dheinerley vorderunge oder anspruche haben noch gewynnen on alles geuerde Alle dise
vorgeschriben tedinge rede stucke vnd artikele geloben wir obgenanter Graue von Lindow fur vns vnd vnser erben den obgenanten vnsern herren dem keyser kunig Wenczlan seinem Sone vnd
iren erben vnd nachkomen kunige zu Beheim in guten trewen on alles geuerde stete vester vnd vnuerrucket zu halten vnd zu volfuren vnd dawider nymer zu tun oder zu komen
in dheineweis Vnd haben des zu sicherheit vnd vrkunde vns Ingesiegel an diesen brieff wissentlichen gehanget lassen doruber sein gezeuge vnd gewesen die hochgeborn fursten
vnd herren her Wenczla herzoge zu Sachsen vnd zu lunemburg des heiligen Riches Erczmarschalk vnser lieber herre her Albrecht herzoge zu mekelinburg Grafe zu Sweryn
vnd herre zu Stargarden vnd zu Rostok die Edeln herren her peter vnd her Bentsch von Wartemberg her poto von Czastolowicz her prymke von Schierstat vnd andre erber
lewte der geben ist zu luckow nach Cristus geburte Drewczehenhundert Jar dornach in dem drey vnd sibenczigisten Jaren an dem heiligen pfingstabend