Wir Albrecht von gotis gnaden graue tzu Ryppeyn bekennen offenlichin mit diesim
brieue allen den die in sehen oder horen lesen daz wir mit gutem willin vnd bera=
thim muthe habin loes gelazin vnd lazin loes den allerdurluchtigisten fursten vnd
herren errn Karle Romischin keis(er) vnd den durluchtigisten fursten vnd herren errn Wen=
czlaw kunynge tzu Beheim seinem sune vnsirn liebin gnedigin herren vnd iren rech=
ten erbin virczehin tusent schok breyter grossin vnd hundert brete schok vnd
sibenczehin schok al bohemischir grossin tzweinczik grossin myn dor vns vor ge=
gebin sint virczehin tusent nurnbergischir guldin als der purgin brieff von
Prage dez weisit vnd yzlichin guldin ist so guet als sechtzeindehalb grosse
dy sy vns tzu sente Joh(ann)s Baptisten tage di negest waz betzalt suldin habin vnd
nu vns fullenkomelich nach vnsirm willin wol betzahilt sint dyz spreche wir
graue Albrecht tzu Ryppein vor genand vor vns vnd vor vns erbin vnd vor alle
den genen dy von vnsir wegin dy herschaft tzu der stad tzu Wokern vnd tzu we=
me tzu behore an tetin gen dar ist vns diz vorsprochin gelt vor gegebin
daz wir graue Albrecht vor genant alle dise vor beschreuen thedinge stete
vnd vast haldin wollin an alles geuerde do habin wir tzu eynir bekantnisse
vnd tzu getzuge vns ingesigel an diesin briff wissentlichen lassin hangen
hir ouer sint gewest dy duchtige lute her Wencz(el) von Bassenstete her Thile von
Rebort lute Euerd von Leybow Hans von Welstene knechte her her Hennigk
Pfefe perner tzu Wokern Tyle Goluakes vnd Thile Glutzink purger tzu Magdeb(urg)
vnd and(er) gute lute Gegebin tzu Magdeb(urg) nach gotis geburd dritzenhund(er)t
Jar dar nach in dem drey vnd sybenczigsten Jare an dem sonauende nach sente
Marien Magdalenen tage