Wir otte von gotes gnaden marggraue zu Brandemburg des heiligen Romischen Riches Erczkamerer Pfalczgraue bi Rine vnd Herczog zu Beyern Entbieten Burgermeistern
Ratman vnd Burgern der Stete mit namen zu Brandemburg Berlin Prenczlow Templin Nuenstat Bernow Mitenwalde Breczen Belig Spandow Nowen Ratenow Ririg
Perleberg Prizwalk Hauelberg Stendal Tangermunde Gardelege Salczwedel Sehusen Osterburg vnd Werben Vnd darzu allen vnd iglichen Steten Riteren Knechten Erbern
Knechten Burgern Gebawern vnd Inwonern der Marke zu Brandemburg wie sie mit iren sundlichen namen benant sin den disir genwertig vnser brief gezeiget wirdet vnser
hulde vnd allis gut Lieben getruwen durch sundliche zunersicht fruntschaft vnd liebe haben wir mit beratem mute willeclichen vnd von rechten wissen die marke zu Bran
demburg alle ire Stete lande lute vnd gute mit allirzubehorunge nichtes vzgenomen als die vns bruder seliger gedechtnisse her ludwig der Romer erwelter marggraue zu
Brandemburg vnd ouch wir bis an dese czeit gehabt vnd besessen haben lediclich vnd erblichen vffgegeben geantwurtet vnd der genczlichen verczigen vnd ouch die gewiset mit allen
rechten vnd nuczen An den Allirdurchluchtigisten fursten vnsern liebn gnedigen herren vnd vater her karl Romischen keiser zu allen czeiten merer des Riches den durchluchtigen fursten
her Wenczlaw konig zu Behmen vnsern lieben swager sine kindere vnd alle ire erben Vnd haben vns vor vns vnd alle vnser erben vnd nochkomen wie die genant sin der genanten
marken zu Brandemburg erblich vnd eweclich verczigen Vnd gebn ouch dem vesten hassen von Wedel von Vastenawen gancze volle gewalt alle vnd igliche Stete Riter knechte Burge
Gebawer vnd Inwoner der marken zu Brandemburg von vnser allir vnser erben vnd nochkomen wegen An die egenanten vnsern herren den keiser konig Wenczlaw sinen Son alle sine kinder
vnd ire erben als an rechte vnd Naturliche Marggrauen zu Brandemburg zunwisen Vnd dorvmme manen wir vch allen vnd ewer iglichen besunder sulcher truwe eyde vnd gelobde
die ir vns als ewern marggrauen von Brandemburg bis vff desen hutigen tag pflichtig vnd verbunden siet Vnd gebiten ouch vch ernstlichen bi vnser hulden das ir von stundan gecz
angesichte dis briues vnd zuhant als ir des von dem egenanten hassen von Wedel von vnser wegen emanet werdet dem vorgenanten vnsern lieben herren vnd vater her karle Romischem keiser
vnd vnserm lieben swager her Wenczlaw konige zu Behmen sinem Sone allen sinen Brudern vnd iren erben als uwern rechten vnd naturlichen erbherren marggrauen zu Brandemburg
rechte huldunge eyd vnd gelobde tut ane allirley widerrede vnd ane geuerde vnd vch ouch an sie als an ewer rechte herschaft vnd herren mit allen sachen furbas mer halden sullet
vnd ouch dem egenanten hassen in allen sulchen sachen geloubet vnd im der gehorsam siet gelicherwis als ob wir selbir bi vch weren vnd vch muntlichen heiszen wolden darvme so ir das
getan habit So sagen vnd lazzen wir vch mit disem vnserm genwertigen offenen briue Allen vnd ewer iglichen besunder allir huldunge truwe eyde gelobde vnd vnderdenikeit die ir vns
als iwern marggrauen zu Brandemburg von eren vnd rechtes wegen pflichtig vnd schuldik siet ledig vnd los ane allis geuerde Vnd ir alle vnd ewer iglicher sullen denne von stundan
von vns vnd allen vnsern erben vnd nochkomen die das in dheinenleies anruren mag allir sachen entpfaffen sin czu vrkunde dis briues versigelt mit vnserm anhangenden Ingesigel
Gegeben zu frankenvorte noch cristes geburte druzenhundert Jar dornoch in dem dreyvndsebenzigisten Jare an sainte Bartholomeus abende