Wir der Burgermeyster Ratmanne die Gesworen vnd die Burger gemeinlich der Stat zu Bielig fur vns alle vnse Erben vnd nachkomen Burger
zu Bielig ewiclichen bekennen offenlich mit diesm briue wann die hochgeboren fursten vnd herren er octe pfaltzgraue bei reyn h(er)tzog in peyern zu den zeiten vns(er)
h(er)re vnd markgraue zu Brandemburg vnd er fridrich h(er)tzog zu peyern fur sich ern Stephan den eltern ern Stephan vnd ern Johansen vnd ire Erben h(er)tzogen in
peyern vns aller huldunge eyde vnd gelobde die wir yn getan haben ledig vnd los gesagt vnd genzlichen gelassen haben vnd vns an den durchluchtigsten fursten
vnd herren ern Wenczlaw kunige zu Behem markgrauen zu Brandemburg vnd h(er)tzogen zu Slesien vns(er)n lieben gnedigen h(er)ren an seine bruder vnd ir aller
Erben vnd ab sie nicht weren an den hochgeboren fursten ern Johansen Markgrauen zu Merhern vnd seinen Erben als an Markgrauen zu Brandemburg erbli
chen lediclichen vnd eincleichen geweiset haben dorumb mit wolbedochtem vllomenem vnd gemeinem rate derselben vns(er) stat zu Bielig denselben vns(er)m h(er)ren dem
kunige seinen brudern vnd iren Erben als Markgrauen zu Brandemburg vnd ab sie nicht weren dem egenant(en) ern Johansen Markgrauen zu Merhern seinen
Erben vnd ir aller nachkomen als Markgrauen zu Brandemburg gehuldet gelobt vnd gesworen haben fur vns alle vns(er) Erben vnd nachkomen Burgere daselbst
zu Bielig vnd sweren auch in guten truwen an allis geuerde mit krafft dis briues als vns(er)m rechten erblichen ordenlichen vnd naturlichen h(er)ren Markgrauen
zu Brandemburg vnd geloben fur vns alle vnse Erben vnd nachkomen als vorgeschriben stehet den selben vns(er)m h(er)ren dem kunige seinen brudern vnd ir aller
Erben vnd ab si nicht weren dem egenant(en) vns(er)m h(er)ren dem Markgrauen zu Merhern vnd seinen Erben als Markgrauen zu Brandemburg getrewe gewer
gehorsam vnd dinsthaft zu sin iren frumen zu werbin iren schaden zuwenden vnd allis daz gen in zutun das rechte erpliche Burger vnd leute gen iren rechten
erblichen ordenlichen vnd naturlichen h(er)ren Markgrauen zu Brandemburg durch recht vnd gewonheit zutun pflichtig sin mit vrkunt dis briues vorsigelt
mit der egenant(en) vns(er) stat Jngsigel der geben ist zu Bielig nach crists geburte dreyzehenhundert Jar dornach in dem dreyvndsibenzigsten Jare an sant Egidien