Wir die Burgemeister / Ratmanne die Gesworen vnd die gancz gemeinheit der Stat zu Eberswald fur vns alle
vnse Erben vnd nachkomen Burgere zu Eberswald ewiclichen bekennen offenlichn mit diesem briefe Wanne
die hochgeboren fursten vnd herren / herre Otte pfalzgraue bey Reyn herczog in peyern zu den zeiten vnser
herre vnd marggraue zu Brandenburg / vnd herre fridrich herczog in peyern / fur sich herren Stephan den
eltern herren stephan vnd herren Johannsen vnd ire erben herczogen in peyern vns aller huldunge eide vnd
gelobde die wir in getan haben ledig vnd loß gesagt vnd genzlichen gelassen haben vnd vns an den durchleuch=
tigisten fursten vnd herren hern Wenczlab kunige zu Beheim marggrafen zu Brandenburg vnd herczogen
zu Slesien vnsern liben gnedigen herren / an seine Bruder vnd ir aller erben vnd ab sie nicht weren / an den
hochgebornen fursten hern Johannsen marggrafen zu merhern vnd seine erbn / als an marggrafen zu Bran=
demb(ur)g erblichen / lediclichen vnd ewiclichen geweist habn / dorumb so habn wir mit wolbedachtem volkome=
nem vnd gemeinem rate der selbe vns(er) Stat Eberswald / dem selbn vnserm herren dem kunige / seinen brudern
vnd iren erben als marggrafen zu Brandenburg vnd ab sie nicht weren dem egenant(en) hern Johannsen
marggrafen zu merhern seinen erbin vnd ire allirnachkomen als marggrafen zu Brandenb(ur)g gehuldet gelobet
vnd gesworen fur vns alle vnse erben vnd nachkomen Burgere do selbit zu Eberswald / vnd sweren ouch
in guten trewen ane alles geuerde mit kraft dicz briefes als vnsn rechten erblichen ordenlichen vnd
naturlichen herren marggrafen zu Brandenb(ur)g / vnd geloben fur vns alle vnse erbin vnd nachkomen /
als vor geschriben stehet den selbn vnsrn herrn dem kunige seinen brudern vnd irer aller erbin vnd ab
sie nicht weren / dem egenant(en) vnsrm herren dem marggrafen zu Merhern vnd seinen erben als marggra=
fen zu Brandenburg getrewe / gehorsam vnd vndertanig zu seine / iren frumen zu werben / iren
schaden zu wenden vnd allis das tun in alln das rechte erbliche Burger vnd lewte gen iren rechten erblichn
ordenlichen vnd naturlichen herrn marggrafen zu Brandenb(ur)g durch recht vnd gewonheit pflichtig zu
tun sint / mit vrkund dicz briefes versigelt mit vnser egenant(en) Stat Jngsigel / der gebn ist zu Eberswald
nach crists geburt drezcenhund(er)t jar dornach in dem drey vnd sibenczigistem jare an sant Egidien tage