Wir der Burgermeister Ratmanne die Gesworen vnd die Burger gemeinlich der Stat zu Spandow fur vns alle vnse
Erben vnd Nachkomen Burger zu Spandow ewiclichen Bekennen offenlich mit disem Briue Wann die Hochgeboren fursten
vnd Herren er Ote pfalzgraue bey Reyn H(er)zog in peyern zu den zeiten vns(er) H(er)re vnd Markgraue zu Brandemburg vnd
er fridrich H(er)zog zu peyern fur sich ern Stephan den Elt(er)n ern Stephan vnd ern Johansen vnd ire Erben H(er)zogen in
peyern vns allir huldunge Eide vnd gelobde die wir yn getan haben ledig vnd los gesagt vnd genzlichen gelassen
haben vnd vns an den durchluchtigisten fursten vnd Herren ern Wenzlan kunige zu Behem Markgrauen zu Bran=
demburg vnd H(er)zogen zu Slesien vns(er)n lieben gnedigen H(er)ren an seine Bruder vnd ir aller Erben vnd ab sie nicht
weren an den Hochgeborn fursten ern Johansen Markgrauen zu Merhern vnd seinen Erben als an Markgrauen zu
Brandemburg erblichen lediclichen vnd ewiclichen gewiset haben Darub wir mit wolbedachtem volkomenem vnd ge=
meinem Rate d(er)selben vns(er) Stat zu Spandow denselben vns(er)n H(er)ren dem kunige seinen Brudern vnd iren Erben
als Markgrauen zu Brandemburg vnd ab sie nicht weren dem egenant(en) ern Johansen Markgrauen zu Merhern sei=
nen Erben vnd ir allir Nachkomen als Markgrauen zu Brandemburg gehuldet gelobt vnd gesworen haben fur vns
alle vnse Erben vnd Nachkomen Burgere doselbst zu Spandow vnd sweren auch in guten truwen ane allis geuerde
mit krafte dis briues als vns(er)n rechten erblichen ordenlichen vnd naturlichen H(er)ren Markgrauen zu Brandemburg Vnd
geloben fur vns alle vnse Erben vnd Nachkomen als vorgeschriben stehet denselben vns(er)n H(er)ren dem kunige seinen
Brudern vnd ir allir Erben Vnd ab sie nicht weren dem egenant(en) vns(er)n H(er)ren d(er)n Markgrauen zu Merhern vnd seinen
Erben als Markgrauen zu Brandemburg getrewe gewer gehorsam vnd vndertan zu sein iren frumen zuwerbin iren
schaden zuwenden vnd allis das gen yn zutun das rechte erbliche Burger vnd lewte gen iren rechten erblichen
ordenlichen vnd naturlichen H(er)ren Markgrauen zu Brandemb(urg) durch recht vnd gewonheit zutun pflichtig sein Mit
Urkunt dis briues versigelt mit der egenant(en) vns(er) Stat Jngesigel der geben ist zu Spandow nach Cristes geburte drey
zehenhund(er)t Jar darnach in dem dreyvndsibenzigistem Jare an sant Egidien tage