Wir Ratlute vnd Burger gemeinlichen der Stat zu Gardelege bekennen fur vns / alle vnse erbn vnd nachkomen Burgere zu Gardelege / vnd vor dieselbe Stat ewiclichen Vnd tun kunt offenlich mit disem briue allen den die yn sehen oder horent lesen / wann
wir furmals gesworen vnd gehuldet habn erblichen vnsers liebn gnedigen herren keiser karls sonen kunige Wenczlawen von Behem / vnd seinen brudern vnd ir aller erbn vnd erbes erbn als marggrauen zu Brandenburg vnsern rechten erb
herren / vnd ab die alle nicht weren marggrauen Johansen von merhern des egenan(ten) vns(er)s herren des keisers bruder / seinen erbn vnd erbes erbn / als das in andern vnsern briuen / die wir yn doruber gebn habn vollenkomenlicher ist begriffen
Vnd wenn auch nu der egenante vnser herre der keiser sunderlichen getrachtet hat / wie er die marke zu Brandenburg mit iren landen Steten vnd lewten die furmals lange zeit mit manichfaldigem kriege vorceret vnd beschediget ist / yn
ewigen friden vnd selickeit seczen moge Vnd vns yn sunderlichen gnaden gogunnt hat vnd gon / das wir / vnd die egenante marke zu Brandenburg / von dem kunigreiche vnd dem land zu Behem / der marggraueschafft zu lusicz den
herczogtumen zu Bresslaw zu der Sweydnicz vnd zu dem Jawer die zu dem kunigreiche vnd der cronen zu Behem gehoren / vnd dasselbe kunigreiche hinwider / von vns vnd der marken ewigen schucz hilfe vnd rate habn mugen / Vnd
auch das wir vnd die marke zu Brandenburg vns an demselbn kunigreiche / vnd lande zu Behem / in ewige eynige / fasze vnd stete seczen mugen / doran zu eren vnd dinsten dem heilgen Romischen reiche / durch ewigen friden / besserunge / vnd
nuczes willen vnser vnd der marken zu Brandenburg die wir in disen sachen kintlichen erkant habn / vnd eygentlichen erkennen So habn wir mit wolbedachtem mute / gutem vorrate / vnd von vnsern rechten wissen / fur vns vnse
erbn vnd nachkomen ewiclichen vnd die egenante Stat zu Gardelege mit willen vnd volbord des egenan(ten) vns(er)s h(er)r(e)n des keis(er)s / als vnses obristen lehenherren / der egenanten marken zu Brandenburg / dem vorgenanten vnsern herren kunige
Wenczlawey / allen seinen brudern / vnd ir aller erbn erbes erbn vnd nachkomen die nu seyn vnd hirnach geboren werden kunige zu Behem / vnd ab die nicht weren / dem obgenan(ten) marggrauen Johansen von merhern / allen seinen erbn vnd
erbes erbn als marggrauen zu Brandenburg vnsern rechten erbherren gelobt vnd gesworen / globn vnd sweren in guten truwen on alles geuerde / das wir ewiclichen bey dem kunigreiche vnd land zu Behem bleibn welln vnd sulln / Vnd
wir sulln vnd welln vns dauon nymmer scheiden oder scheiden lassen / durch dheinerlei sachen oder sachen willen in dheineweis Vnd weres sache / das vns(er)s herren kunig Wenczlawes zu Behem bruder / erbn / oder vettern / oder derselbn
erbn / vnd nachkomen die nu sein oder in kunfftigen zeiten werden / vnse herren marggrauen zu Brandenburg / er weren eyner oder mer / vns von dem kunigreiche vnd land zu Behem / dem kunige vnd andern seinen brudern
vettern / erbn / vnd erbes erbn / die in zeiten vnser herren marggrauen zu Brandenburg sein vnd werden / scheiden wolten / oder ab sie die marke zu Brandenburg / zu male / oder iter eynteil / von dem lande der marken / vor
gebn / vorkauffen / vorseczen / vorwechseln / oder entfremden wolten So sulln wir abgenanten Ratlewte Burger vnd Stat deme oder denselbn nichtes pflichtig oder vorbunden seyn / von huldungen ewigen / noch sust in dheine(m)
weis Vnd tun oder die vor vnser herren / nicht habn / alle die weile / das sie nicht von sulchen sachen lassen / Sunder vns haltn an den kunig von Behem / vnd an andere seine bruder / vettern / erbn erbes erbn / vnd nachkome(n)
die denne vnse herren marggrauen zu Brandenburg sein oder sein werden / vnd die sulche vorgenante scheidungen / vorgebungen / vorkauffungen / vorseczungen / vorwechselungen / oder entfremdungen / nicht teten Were auch sache
das die obgenan(ten) vnse herren kunig Wenczlaw von Behem / seine bruder / vnd ir aller erbn erbes erbn vnd nachkomen kunige zu Behem / vnd marggrauen zu Brandenburg / der obgenante marggraue Johans von merhern
seine erbn vnd erbes erbn alle abe sturben / do got vor sey So habn wir abgenanten Ratlewte vnd Burgere zu Gardelegen fur vns / vnse erbn vnd nachkomen Burgere zu Gardelege / vnd vor dieselbe Stat ewir
lichen globt vnd gesworen / globn vnd sweren / von rechter wissen mit crafft dicz briues in guten truwen on alles geuerde / eynem iglichen kunige zu Behem / der denne in zeiten wirdet vnd ist / das wir den / vnd mit
ym seine erbn vnd nachkomen ewiclichen vnd nymand anders vor marggrauen zu Brandenburg / vnse rechten naturlichen erbherren habn vnd haltn sulln vnd welln / vnd vns von ym / dem kunigreiche zu Behem
seinen egenan(ten) furstentumen / herschefften / vnd landen die darzu gehoren / nicht scheiden / noch scheiden lassen sulln noch wellen in dheineweis on alles geuerde / Wenne es auch an sulchen schulden kumet / so sullen vns dieselbn
vnse erbherren / vnsere rechte briue vnd freiheit bestetigen / als ire vorfarn marggraue zu Brandenburg getan habn Vnd dczu ewigem vrkunde vnd ganczer sicherheit habn wir vnse egenan(ten) Stat Ingesigel an disen
brieff lassen hangen Der gebn ist zu Gardelege nach Cristus geburte dreiczenhundert Jar dornach in dem vierundsibenczigstem Jare an dem heilgen pfingest tage