Wir Rathute vnd Burger gemeinlichen der Stat zu gutemwalde Bekennen fur vns alle vnsir erbin vnd nachkomen Burger zu gutemwalde vnd fur dieselbin Stat ewiclichin vnd tun kunt offenlich
mit disem briue allin den dye yn sehent oder horent lesen Wanne wir vormals gesworen vnd erblichen gehuldet haben vnsir liebn gnedigen herren keyser karls sonen kunige Wenczlaw von Behem
seynen brudern vnd yr allir erbin vnd erbis erbin als markgrauen zu Brandemburg vnsirn rechten erbherren vnd ab die alle nicht weren markgrauen Johanse von gerlicze des egenant vnsir herren
des keysers bruder seynen erbin vnd erbis erbin als das in vnsirn andern briuen die wir yn doruber gebn haben vollenkomenlicher ist begriffen Vnd wanne nu der egenant vnsir herre der keyser sunderlichen
betrachtet hat wie er die marken zu Brandemburg mit yren landen steten vnd lewten die vormals lange czeit mit manigwaldigem kriege betrubet vnd beschediget ist in ewigen friden vnd selikeit
seczen muge vnd vns zu sunderlichm genyest hat vnd getun das wir vnd die egenant marke zu Brandemburg von dem kunigriche vnd lande zu Behem der markgraffschafft zu lusicz den herczogtumen zu
zu Bresslaw zu der Swidnicz vnd zu dem Jawer die zu dem kunigriche vnd der cronen zu Behem gehoren vnd dasselbe kunigrich hinunder von vns vnd der marken ewigen schucz hulffe vnd rate
haben mugen vnd ouch das wir vnd die marke zu Brandemburg vns zu dem selbin kunigriche vnd lande zu Behem in ewigen eynige sacze vnd friden seczen mugen dauon zu eren vnd nucze dem
heiligen Romischen Reiche durch ewigen friden besserungen vnd nuczes willen vnsir vnd der marken zu Brandemburg die wir in diesen sachen kuntlichin erkant haben vnd eygentlichin erkennen
So haben wir mit wolbedachtem mute gutem botrate vnd von vnsir rechter wissen fur vns vnsir erbin vnd nachkomen ewiclichin vnd die egenant stat gutemwalde mit willen vnd volbort des egenant
vnsir herren des keysers als eynes obirsten lehinherren der egenanten marken zu Brandemburg dem vorgenant vnsirn herren dem kunige Wenczlaw allin seynen brudern vnd yr allir erbin erbis
erbin vnd nachkomen die nu seyn vnd hernach geboren werden kunige zu Behem vnd ab die nicht weren dem obgenant markgrauen Johanse von gerlicze allin seynen erbin vnd erbis erbin als
markgrauen zu Brandemburg vnsirn rechten erbherren gelobet vnd gesworen Geloben vnd sweren in guten trewen ane allis geuerde das wir ewiclichin by dem kunigrich vnd lande zu Behem
bleiben sullen vnd wollen vnd wir sullen vnd wollen vns dauon nymer scheiden oder scheiden lassen durch dheynerley stucken oder sachen willen in dheineweis vnd were es sache das vnsir herren kunig
Wenczlawe zu Behem bruder erbin oder vettern der derselbin erbin vnd nachkomen die nu seyn oder in kunfftigen czeiten werden vnsir herren markgrauen zu Brandemburg nu weren eyner
oder mer vns von dem kunigriche vnd lande zu Behem dem kunige oder andern seynen brudern vettern erbin vnd erbis erbin die in czeiten vnsir herren markgrauen zu Brandemburg seyn vnd
werden scheiden wolten oder ab sie die marke zu Brandemburg zu male oder yr eyn teile von dem lande der marken beczcehn verkauffen versetzen verwechsilen oder empfremden wolten So sullen
wir obgenant Rathute Burger vnd stat dem oder denselbin nichtes pflichtig oder vorbunden seyn von huldungen wegen noch sunst in dheineweis vnd den oder die fur vnsir herren nicht haben
abedie weile das sie nicht von sulchen sachen lasen Sunder vns halden an den kunige von Behem vnd an andern seyne bruder vettern erbin erbis erbin vnd nachkomen die denne vnsire herren
markgrauen zu Brandemburg seyn oder seyn werden vnd die suliche vorgenant scheidungen vorczebungen vorkauffungen verseczungen verwechsielungen oder empfremdungen nicht teten Wer ouch
sachen das die obgenant vnsir herren kunig Wenczlaw zu Behem seyne bruder vnd yr allir erbin erbis erbin vnd nachkomen kunige zu Behem vnd markgraue zu Brandemburg der obgenante
markgraffe Johans von gerlicze seyne erbin vnd erbis erbin alle abesturben do got fur sey So haben wir Rathute vnd Burger zu gutemwalde fur vns vnsir erbin vnd nachkomen Burger zu guttem
walde vnd fur dieselbin stat ewiclichin gelobet vnd gesworen Geloben vnd sweren von rechter wissen mit krafft dicz briues in guten trewen ane allis geuerde eynem yglichem kunige zu Behem
der denne in czeiten wirdet vnd ist das wir den vnd mit ym seyne erbin vnd nachkomen ewiclichin vnd nymanden anders vor markgrauen zu Brandemburg vnsir rechten naturlichen erbherre
haben vnd halden sullen vnd wollen vnd vns von ym dem kunigriche zu Behem seynen egenanten furstentumen herrschafftin vnd landen die dorczu gehoren nicht scheiden noch scheiden lassen
sullen noch wollen in dheineweis ane allis geuerde Wenne es ouch an sulchen schulden kumpt So sullen vns dieselbin vnsir erbherren vnsir rechte briue vnd freiheit bestetigen als yr
vorfarn markgrauen zu Brandemburg getan haben Vnd des zu ewigem urkunde vnd ganczer sicherheit haben wir vnsir egen stat Ingesigel an diesen briue lassen hangen der gebn
ist zu gutemwalde nach crists geburt dreyczenhundirt Jare Vnd dornach in dem vierundsibenczigisten Jare an dem heiligen pfingistau tage