Wir Ratleute vnd Burgere gemeinlichen der Stat zu Prenzlaw Bekennen fur vns alle vnsere Erben vnd nachkomen Burgere zu Prenzlaw vnd fur dieselben Stat ewiclichen vnd tun kunt offenlich mit die=
sem briue allen den die in sehen oder horen lesen Wenn wir vormals gesworen vnd eitlichen gehuldet haben vnserm lieben gnedigen herren keyser Karls Sonen kunig Wenczlawey von Beheim vnd seinen Brudern vnd
ir aller Erben vnd erbeserben als marggrauen zu Brandemburg vnsern rechten Erbherren vnd ob die alle nicht weren marggrauen Johansen von Merhern des genanten vnsers herren des keysers Bruder seinen erben
vnd erbeserben als das in andern vnsern briuen die wir in daruber geben haben vollenkomenlicher ist begriffen Vnd wenne ouch der genant vnser herre der keyser in sunderlichen betracht hat wie er die mar=
ke zu Brandemburg mit iren landen Stetten vnd leuten die vormals lange czeit mit manigfaldigen krige vnterset vnd beschediget ist in ewigen fride vnd selikeit seczen muge vnd vns zu sunderlichen genaden
geeigent hat vnd gar das wir vnd die genante marken zu Brandemburg von dem kunigreiche vnd landen zu Beheim der marggraueschaft zu lusicz den herczogtumen zu Breslaw zuder Sweidnicz vnd zu
dem Jawer die zu dem kunigreiche vnd der Cronen zu Beheim gehoren vnd dasselbe kunigreich hinwider von vns vnd der marken awiczen schucze helfe vnd rate haben mugen vnd ouch das wir vnd die
marken zu Brandemburg vns zu demselben kunigreiche vnd lande zu Beheim in ewige eynunge pass vnd fride seczen mugen Dauon zu eren vnd dienste dem heiligen Romischen Reiche durch ewigen friden
besserungen vnd nuczes willen vnser vnd der marken zu Brandemburg die wir in diesen sachen kintlichen erkant haben vnd eygentlichen erkennen So haben wir mit wolbedachtem mute guten vorrate
vnd von vnsern rechten wissen fur vns vnsere erben vnd nachkomen ewiclichen vnd die genante Stat zu Prenzlaw mit willen vnd volbort des genanten vnsers h(er)ren des keysers als eynes obersten
lehenherren der genanten marken zu Brandemburg dem vorgenanten vnserm herren kunig Wenczlaw allen seinen Brudern vnd ir aller erben erbeserben vnd nachkomen die nu seyn vnd hernach geb(or)n
werd(en) kunigen zu Beheim vnd ob die nicht weren dem obgenanten marggrauen Johansen von Merhern allen seinen erben vnd erbeserben als marggrauen zu Brandemburg vnsern rechten erbherren gelobt
vnd gesworen Geloben vnd sweren in guten trewen ane alles geuerde das wir ewiclichen bey dem kunigreiche vnd landen zu Beheim beliben wollen vnd sullen vnd wir sullen vnd wollen vns dauon ny=
mer scheiden oder scheiden lassen durch dheinerley sachen oder sachen willen in dheineweis Vnd were es sache das vnsers herren kunig Wenczlaws zu Beheim Bruder Erben oder Vettern oder derselben erben
vnd nachkomen die nu seyn oder in kunftigen czeiten werden vnsere herren marggrauen zu Brandemburg ir weren eyner oder mer vns von dem kunigreiche vnd landen zu Beheim dem kunige vnd andern
seinen Brudern Vettern erben vnd erbeserben die in czeiten vnsern herren marggrauen zu Brandemburg seyn vnd werden scheiden wolten oder ob sye die marken zu Brandemburg czumale oder in eim teyl
von dem lande der marken secz(en) vorkouffen vorseczen vortwechseln oder empfremden wolten So sullen wir obgenanten Ratleute Burgere vnd Stat dem oder denselben nichtes pflichtig oder vorbun=
den seyn von huldungen wegen noch sust in dheineweis vnd den oder die fur vnsern herren nicht haben also die weile das sye nicht von sulichen sachen lassen Sunder vns halden an den kunig zu
Beheim vnd an andre seyne Brudere Vettern Erben Erbeserben vnd nachkomen die denne vnsern herren marggrauen zu Brandemburg seyn oder seyn werden Vnd die sulichen vorgenanten scheidungen
vorczihungen vorkouffungen vorseczungen vorwechselungen oder empfremdungen nicht tetten Wer ouch sache das die obgenanten vnsere herren kunig Wenczlaw von Beheim seyne Brudere vnd ir aller
Erben Erbeserben vnd nachkomen kunige zu Beheim vnd marggrauen zu Brandemburg der obgenant marggraff Johans von Merhern seyne erben vnd erbeserben alle obesturben da got fur sey So haben
wir obgenanten Ratleute vnd Burgere zu Prenzlaw fur vns vnser Erben vnd nachkomen Burgere zu Prenzlaw vnd fur dieselben Stat ewiclichen gelobt vnd gesworen Geloben vnd sweren
von rechter wissen mit krafft dicz briues in guten trewen ane alles geuerde eynem yclichen kunige zu Beheim der denne in czeiten wirt vnd ist das wir den vnd in seyne Erben vnd nach=
komen ewiclichen vnd nymant anders vor marggrauen von Brandemburg vnsere rechten naturliche erbherren haben vnd halden sullen vnd wollen vnd vns von im dem kunigreiche zu Beheim sey=
nen genanten furstentumen herschefften vnd landen die darzu gehoren nicht scheiden noch scheiden lassen sullen noch wollen in dheineweis ane alles geuerde Wenne es ouch zu sulichen schulden kumpt
So sullen vns dieselben vnsere Erbherren vnsere rechte briue vnd freiheit bestetigen als ir vorfarn marggrauen zu Brandemburg getan haben Vnd des zu ewigem vrkunde vnd geczuger vnser
herre haben wir vnser genanten Stat Jngesigel an diesen brieff lassen hengen der geben ist zu Prenzlaw nach Cristi geburt dreyczehnhundert Jar darnach in dem vierundsibenczigisten Jare an dem
heyligen pfingst tage