Wir Ratleute vnd Burgere gemeynlichen der Stat zu Soldin bekennen fur vns alle vnsere Erben vnd nachkomen Burgere zu Soldin vnd fur dieselben Stat ewiclichen vnd tun kunt
offenlichen mit disem briue allen den die in sehen oder horen lesen Wenn wir vormals gesworen vnd eplichen gehuldit haben vnserm lieben gnedigen herren keyser karle romer kunig Wenczla
wen kunig czu Beheym vnd seynen Brudern vnd ir aller Erben vnd Erbe-erben als marggrauen zu Brandenburg vnserm rechten Erbherren vnd ob die alle nicht weren marggrauen Johansen von
Merhern des obgenanten vnsers herren des keysers Bruder seynen Erben vnd Erbe-erben als das in andern vnsern brieuen die wir im darubir geben haben vollenkomenlicher ist begriffen vnd
wann ouch nu der obgenant vnser her der keyser sunderlichen betracht hat wie er die marke zu Brandenburg mit iren landen Steten vnd leuten die vormals lange czeit mit manigfaldigen
kriege vorwerret vnd beschediget ist in ewigen fride vnd selikeit seczen muge vnd vns zu sunderlichen gnaden gegunst hat vnd getun das wir vnd die obgenanten marken zu Brandenburg
von dem kunigreiche vnd lande zu Beheym der marggraueschaft zu lusicz den herczogtumen zu Bresslaw zu der Sweidnicz vnd zu dem Jawer die zu dem kunigreiche vnd der Cronen zu Beheim
gehoren vnd dasselbe kunigreich hinwidir von vns vnd der marken ewiglich gesunt bestan vnd nute haben mugen vnd ouch das wir vnd die marken zu Brandenburg vns des demselben kunigrey
che vnd lande zu Beheym in ewige eynunge pflicht vnd fride seczen mugen dauon zu eren vnd dienste der heyligen Romischen kirchen durch ewigen friden besserungen vnd nuczes willen vnser
vnd der marken zu Brandenburg die wir in disen sachen kintlichen erkant haben vnd eygintlichen erkennen So haben wir mit wolbedachtem mute gutem hirate vnd von vnsern rechten
wissen vor vns vnsere Erben vnd nachkomen ewiclichen vnd die obgenante Stat zu Soldin mit willen vnd volbort des obgenanten vnsers herren des keysers als eynes obersten lehenherren der obge
nanten marken zu Brandenburg dem vorgenanten vnserm herren kunig Wenczlaw allen seynen Brudern vnd ir aller Erben Erbe-erben vnd nachkomen die nu seyn vnd hernach geborn
werden kunigen zu Beheym vnd ob die nicht weren dem obgenanten marggrauen Johansen von Merhern allen seynen Erben vnd Erbe-erben als marggrauen zu Brandenburg vnserm rech
ten Erbherren gelobt vnd gesworen Geloben vnd sweren in guten truwen ane alles geuerde das wir ewiclichen bey dem kunigreiche vnd landen zu Beheym bleyben wollen vnd sullen vnd
vns sullen vnd wollen vns dauon nymmer scheyden oder scheyden lassen durch dheynirley sachen oder sachen willen in dheyneweis vnd were es sache das vnsers herren kunig Wenczlawes
zu Beheim Bruder Erben oder vettern oder derselben Erben vnd nachkomen die nu seyn oder in kunftigen czeiten werden vnser herren marggrauen zu Brandenburg ir eynir eynir oder
mer vns von dem kunigreiche vnd landen czu Beheym dem kunige vnd andern seynen Brudern vettern Erben vnd Erbe-erben die in czeiten vnser herren marggrauen zu Brandenburg
seyn vnd werden scheyden wolten oder ob sie die marke zu Brandenburg czumale oder ir eyn teyl von dem lande der marken hingeben vorkauffen vorseczen vorwechseln oder empfinden vnd
hen So sullen wir obgenanten Ratleute Burgere vnd Stat dem oder denselben nichtes pflichtig oder vorbunden seyn von huldungen wegen noch sust in dheyneweis vnd den oder die
fur vnsere herren nicht haben alle die weyle das sie nicht von sulchen sachen lassen Sunder vns halden an den kunig zu Beheym vnd an andre seyne Brudere vettern Erben Erbe-erben vnd
nachkomen die denne vnser herren marggrauen zu Brandenburg seyn oder seyn werden vnd die sulchen vorgenanten scheydungen hingebungen vorkauffungen vorseczungen vorwechse
lungen oder empfremdungen nicht tetten Were ouch sache das die obgenanten vnser herren kunig Wenczlaw von Beheym seyne Brudere vnd ir aller Erben Erbe-erben vnd nachkomen
kunige zu Beheim vnd marggrauen zu Brandenburg die obgenant marggraff Johans von Merhern seyne Erben vnd Erbe-erben alle obsterben da got fur sy So haben wir obgenanten Rat
leute vnd Burgere zu Soldin fur vns vnsere Erben vnd nachkomen Burgere zu Soldin vnd fur dieselben Stat ewiclichen gelobt vnd gesworen Geloben vnd sweren hir in craft dis
ses vnsir brieffes in guten truwen ane alles geuerde eynem iglichen kunige zu Beheym der denne in czeiten wirdet vnd ist das wir den vnd nur seyne Erben vnd nachkomen
ewiclichen vnd nymant anders vor marggrauen von Brandenburg vnsere rechten naturliche Erbherren haben vnd halden sullen vnd wollen vnd vns von im dem kunigreiche zu Beheym
seynen obgenanten furstentumen herschefften vnd landen die darzu gehoren nicht scheyden noch scheyden lassen sullen noch wollen in dheyneweis ane alles geuerde Wenne es ouch zu sul
chen schulden kumpt So sullen vns dieselben vnsere Erbherren vnsere rechte brieue vnd freyheite bestetigen als ir vorfaren marggrauen zu Brandenburg getan haben vnd des zu ewigen
vrkund vnd ganczer sicherheit haben wir vnser obgenanten Stat Jngesigel an disen brieff lassen hengen der geben ist zu Soldin nach Cristi geburt dreyzehnhundert Jar darnach in dem
viervndsibenczigisten Jare an dem heyligen pfingsten tage