Wir Ratleute vnd burger gemenlichen der Alten stat zu Soltwedil bekennen fur vns alle vnse Erben vnd nachkomen Burger der Alten stat zu Soltwedil Vnd fur dieselben stat ewiclichen
Vnd tunkunt offenlichen mit diesm briue Allen den die yn sehent oder horent lezen Wanne wir furmals gesworen vnd erblichen gehuldet haben vnse lieben gnedigen hren keys(er) karls so=
nen kunig Wentzlan kony(n)g Behem(en) vnd seinen Brudern vnd ir alln Erben vnd Erbis Erben als markgrauen zu Brandemburg vnsern rechten Erbherren Vnd ab die alle nicht weren Markgra=
fen Johansen von Merhern des egenan(ten) vnse hren des keys(er)s bruder seinen Erben vnd Erbis Erben als das in andern vnsern briuen die wir yn doruber gebin haben vollenkomenlicher ist be=
griffen Vnd wanne auch nu der egenan(te) vnse h(er)re der keys(er) sunderlichen betrachte hat Wie er die Marke zu Brandemburg mit iren landen steten vnd lewten die furmals lange zeit mit
manigvaldigem kriege vorterbet vnd beschedigt ist in ewigen fride vnd selikeit seczen muge Vnd vns zu sunderlichen gnaden gegunnt hat vnd gan daz wir Vnd die egenan(te) Marke zu
Brandemburg by dem kunigreiche vnd lande zu Behem(en) der ankunfte schaft zu lusing den H(er)czogtum(en) zu Bresslow zu der Sweidnicz vnd zu dem Jawir die zu dem kunigreiche vnd der Cro=
nen zu Behem(en) gehoren Vnd dasselbe kunigreich hinwyder von vns vnd der marken ewigen schutz hilffe vnd Rate haben mugen Vnd auch das wir Vnd die Marke zu Brandemb(ur)g vns zu
demselben kunigreiche vnd lande zu Behem(en) in ewige eynunge hasse vnd fride seczen mugen Doron zu eren vnd dienste dem heiligen Rom(is)chen Reiche durch ewigen friden besserungen
vnd nutzes willey vnse vnd der Marken zu Brandemburg die wir in diesm sachen kintlichen erkant haben vnd eygentlichen erkennen So haben wir mit wolbedachtem mute guten
vorrate vnd von vnse rechten wissen fur vns vnse Erben vnd Nachkomen ewiclichen Vnd die egenan(te) Alte stat zu Soltwedil mit willen vnd volbort des egenan(ten) vnse hren des keys(er)s
als eines obersten lehenh(er)ren der egenan(ten) Marken zu Brandemburg dem vorgenan(ten) vnsern hren kunig Wentzlan allen seinen Brudern vnd ir alln Erben Erbis Erben vnd Nachkomen
die nu sein vnd hernach geborn werden kunigen zu Behem(en) Vnd ab die nicht weren dem obgenan(ten) Markgrauen Johansen von Merhern allen seinen Erben vnd Erbis Erben als Markgra=
fen zu Brandemburg vnsern rechten Erbherren gelobt vnd gesworen geloben vnd sweren in guten trewen on alles geuerde daz wir ewiclichen bey dem kunigreiche vnd lande zu Behem(en)
bleiben wollen vnd sullen Vnd wir sullen vnd wollen vns doron nymer scheiden oder scheiden lassen durch dheinerleye stuke oder sachen willen in dheinerweis Vnd were is sache
daz vnse hren kunig Wentzlaws zu Behem(en) Bruder Erben oder vettern oder derselben Erben vnd Nachkomen die nu sein oder in kunfftigen zeiten werden vnse herren Markgrauen
zu Brandemburg ir weren einer oder mer vns von dem kunigreiche vnd lande zu Behem(en) dem kunige vnd andern seinen Brudern vettern Erben vnd Erbis Erben die in zeiten vnse
hren Markgrauen zu Brandemburg sein vnd werdin scheiden wolten Oder ob sie die Marke zu Brandemburg zumale oder ir ein teil von dem lande der Marken vorgebin vorkauffen
vorsetzen vorsetzeln oder empfremden wolten So sullen wir obgenan(te) Ratlewte Burgere vnd stat dem oder denselben nichtes pflichtig oder vorbunden sein von huldungen wegen
noch sust in dheinerweis Vnd den oder die fur vnse herren nicht haben alle die weile daz sie nicht von sulichen sachen lassen Sunder vns halden an den kunig von Behem(en)
vnd an andre seine Brudre vettern Erben Erbis Erben vnd Nachkomen die denne vnse hren Markgrauen zu Brandemburg sein oder sein werden Vnd die suliche vorgenan(te) schei=
dungen vorgebungen vorkauffungen vorsetzungen vorwechselungen oder empfremdungen nicht teten Were auch sache das die obgenan(ten) vnse hren kunig Wentzla von Behem(en)
seine Brudre vnd ir alln Erben Erbis Erben vnd Nachkomen kunige zu Behem(en) vnd Markgrauen zu Brandemburg der obgenan(te) Markgraue Johans von Merhern seine Erben
vnd Erbis Erben alle abesturben do got fur sey So haben wir obgenan(te) Ratlewe vnd Burgere der Alten stat zu Soltwedil fur vns vnse Erben vnd Nachkomen Burgere in
der Alten stat zu Soltwedil Vnd fur dieselbe stat ewiclichen gelobt vnd gesworen geloben vnd sweren von rechter wissen mit krafft dis briues in guten trewen ane alles ge=
uerde eynem iglichen kunige zu Behem(en) der denne in zeiten wirdet vnd ist daz wir den vnd mit ym seine Erben vnd Nachkomen ewiclichen vnd nyemand anders vor Markgra=
fen zu Brandemburg vnse rechten naturlichen Erbhr(e)n haben vnd halden sullen vnd wollen Vnd vns von ym dem kunigreiche zu Behem(en) seinen egenan(ten) furstentumen herschaff=
ten vnd landen die dorzu gehoren nicht scheiden noch scheiden lassen sullen noch wollen in dheinerweis on alles geuerde Wanne is auch zu sulichen schulden kumpt So sullen
vns dieselben vnse Erbherren vnse rechte briue vnd freyheit bestetigen als ir vorfarn Markgrauen zu Brandemburg getan haben Vnd des zu ewigem vrkund Vnd ganczir
sicherheit haben wir vnse egenan(te) stat Ingesigel an diesm brieff lassen hangen der gebin ist in der Alten stat zu Soltwedil Nach crists geburte Dreizehenhund(er)t Jar dornach in
dem VierVndsebentzigsten Jare an dem heiligen pfingst tage