Wir Rathne und Burger gemenlich der Stat zu Templyn Bekennen fur uns alle unsir erbin und nachkomen Burger zu Templyn und fur dieselbin Stat ewiclichin und tun kunt offenlich
mit disem brieve allen den die yn sehent oder horent lesin Wanne wir vormals gesworen und erblichin gehuldit haben unsir liebn gnedigen herren keiser karls sonen kunig Wenczla
von Behem und seynen Brudern und ir allir erbin und erbes erbin als markgraven zu Brandenburg unsirn rechten erbherren und ab die alle nicht weren markgraven Johansen von
merhern des egenanten unsir herren des keisers Bruder seynen erbin und erbes erbin als das in andern unsir brieven die wir yn doruber gegebin haben vollenkomenlicher ist begriffen
Und Wanne ouch nu der egenante unsir herre der keiser sunderlichin betrachten hat wie er die marke zu Brandenburg mit yren landen Steten und luten die vormals lange mit manigfal
digen kriege vorterbet und beschediget ist in ewigen friden und selikeit seczen muge und uns zu sunderlichin gnaden gesinnet hat und getun das wir und die egenante mark zu Brandem
burg von dem kunigrich und lande zu Behem der markgraffschafft zu lusicz den herczogtumen zu Bresslaw zu der Swidnicz und zu dem Jawern die zu dem kunigrich und der cronen zu
Behem gehoren und dasselbe kunigrich hinwider von uns und der marken ewigen schucz hulffe und rate haben mugen und ouch das wir und die marke zu Brandenburg uns zu demselben
kunigrich und lande zu Behem in ewige ruge eynunge und friden seczen mugen dovon zu ere und dinste dem heiligen Romischin Reiche durch ewigen friden besserungen und nuczes willin unsir
und der marken zu Brandenburg die wir in diesen sachen kintlichin erkant haben und eygentlichin erkennen So haben wir mit wolbedachtem mute gutem vorrate und von unsirn rechten
wissen fur uns unsir erbin und nachkomen ewiclichin und die egenante Stat zu Templyn mit willen und volbort des egenantes unsir herren des keisers als eynes obirsten lehenherren der
egenanten marke zu Brandenburg dem vorgenanten unsirn herren kunig Wenczla allen seinen Brudern und ir allir erbin erbes erbin und nachkomen die nu seyn und hernach geboren
werden kunige zu Behem und ab die nicht weren den obgenanten markgraven Johansen von merhern allen seynen erbin und erbes erbin als markgraven zu Brandenburg unsirn rechten erb
herren gelobet und gesworen geloben und sweren in guten trewen ane allis geverde das wir ewiclichin bey dem kunigrich und lande zu Behem beleibin wollen und sullen und wir sullen und wol
len uns dovon nymmer scheiden oder scheiden lassen durch dheinerley sache oder suche willen in dheineweis Und wer es sache das unsir herren kunig Wenczla von Behem Bruder erbin oder
vettern der derselben erbin und nachkomen die nu seyn oder in kunfftigen zeiten werden unsir herren markgraven zu Brandenburg ir weren eyner oder mere uns von dem kunigriche und lande
zu Behem dem kunig und andern seynen Brudern vettern erbin und erbes erbin die in zeiten unsir herren markgraven zu Brandenburg seyn und werden scheiden wolten oder ab sie die marke
zu Brandenburg zumale oder ir eynteyle von dem lande der marken vorgeben vorkouffen vorsetzen vorwechseln oder entpfremden wolten So sullen wir obgenante Rathne Burger
und Stat den derselben nichtes pflichtig oder vorbunden seyn von huldungen wegen noch sust in dheineweis und den oder die fur unsir herren nicht haben alle die weyle das sie
nicht von sulchen sachen lassen sunder uns halden an den kunige von Behem und an andern seyne Bruder vettern erbin erbes erbin und nachkomen die denne unsir herren mark
graven zu Brandenburg seyn oder seyne werden und sulche vorgenante scheidunge vorgebunge vorkouffunge vorseczunge vorwechselunge oder entpfremdunge nicht teten Were
ouch sache das die obgenanten unsir herren kunig Wenczla von Behem seyne Bruder und ire allir erbin erbes erbin und nachkomen kunige zu Behem und markgrave zu Brandembg
der obgenante markgrave Johans von merhern seyne erbin und erbes erbin alle absterben do got fur sey So haben wir obgenante Rathne und Burger die Stat zu Templyn fur uns
unsir erbin und nachkomen Burger zu Templyn und fur dieselbin Stat ewiclichin gelobet und gesworen geloben und sweren von rechter wissen mit krafft dis brieves in guten
trewen ane allis geverde eynemyclichin kunige zu Behem der denne in zeiten wirdet und ist das wir den und mit ym seyne erbin und nachkomen ewiclichin und nymant
anders fur markgraven zu Brandenburg unsir rechten naturlichen erbherren haben und halden sullen und wollen und uns von ym dem kunigriche zu Behem seynen ege
nanten furstentumen herrschafften und landen die dorzu gehoren nicht scheiden noch scheiden lassen sullen noch wollen in dheineweis ane allis geverde Wenne es ouch zu sulchen
schulden kumpt so sullen uns dieselbn unsir erbherren unsir rechte brieve und freyheit bestetigen als ir vorfarn markgrave zu Brandenburg getan haben Und des zu
ewigem urkunde und gancze sicherheit haben wir unsir egenanten Stat Ingesigel an diesen brieff lassen hangen der gebin ist zu Templyn nach cristus geburt dreyzehenhundt
Jare und dornach in dem vierundsibenczigisten Jaren an dem heiligen pfingstage