Wir Ruprecht der Elter von gots gnaden pfalzgraue bey Reyne des heiligen Romischen Reichs Oberster Truchsesse vnd hertzog in Beyern Vnd wir Stephan der Elter Ocke des
heiligen Reichs Ertzkamerer Vnd fur furste sein bruder Stephan der Junge fridrich vnd Johanns desselben hertzog Stephans des Eltern Sone Von gots gnaden alle pfalzgrauen bey
Reyne vnd hertzogen in Beyern bekennen vnd tunkunt offenlichen mit disem brieue Allen den die yn sehent oder horent lezen daz wir mit wolbedachtem vorbesinnem mute
durch nutz vnd frumen vnser vnd vnser Erben vnser furstentume vnd vnser lande vnd lewte fur vns vnser Erben vnd nachkomen die vnsir furstentume herscheffte
vnd erbe besitzen vnd haben werden vnd wir hertzog Ruprecht obgenant fur vnsers bruders seligen etwennes hertzog Adolffs son hertzog Ruprecht den Jungen vnd fur
seinen Son hertzog Ruprecht den Jungesten ob dieselben vnse furstentume herscheffte vnd Erbe besitzen werden mit dem alludurchluchtigsten hochgebornen fursten vnd
herren hern Karl Romischem keiser zu allen zeiten merer des Reichs vnd kunige zu Beheim vnsim gnedigen herren vnd dem durchluchtigen fursten vnd herren hern Wenczlan
kunige zu Beheim seinem Sone dem hochgebornen fursten hern Johansen Marggrauen zu Merhern desselben vnsers herren des keisers bruder vnd ir allir Erben vnd nachkomen
Als auch der durchluchtige hochgeborne furste vnd herre her Ludoweng kunig zu Vngern vnsir liebir Oheym sich mit demselben vnsim herren dem keiser vnd seinem Sone
vnd seinen bruder egenant zusamen Eyn voreynet hat / oberkomen sein vnd vns voreynet han also daz wir vnsir Erben vnd nachkomen nimer ewiklichen noch nem kunig
reiche zu Beheim der marken zu Brandenburg vnd zu Merhern vnd nen furstentumen vnd herschefften zu polan zu Beyern vnd zu franken vnd auch noch in allir oder
igliches herscheffte manschefften landen pfantschefften Slossen Stetten darinnen lewten vnd gutern vnd auch noch andern iren landen lewten vnd gutern Edeln vnd vnedeln
wie die genant seint oder wo die gelegen seint die sie itzunt haben vnd noch gewynnen nicht stehen noch werben sullen noch die zu vns zihen oder vns der vnderwinden
in dheinerleis on alle argelist vnd geuerde Vnd were is Sache daz yemand in kunfftigen zeiten noch neyn kunigreiche furstentumen vnd herschefften landen pfantschefften
lewten oder gutern die sie haben vnd gewynnen stunde wirkte oder sich der vnderwunde dem oder den sullen vnd wollen wir vnd vnsir Erben vnd nachkomen die vnse fursten=
tume herscheffte vnd Erbe besitzen werden daran nicht behulffen sein in dheinerleis Vnd ob sich dheine ire kunigreiche furstentume herren oder herscheffte Stette Slosse
lande pfantscheffte oder lewte Edele oder Vnedele wie die genant weren die sie haben vnd gewynnen mit gutem willen an vns oder vnsir Erben vnd nachkomen als vor=
geschriben ist ergeben oder halden wolten dieselben kunigreich furstentume herren herscheffte Stete Slosse lande pfantscheffte vnd lewte sullen wir vnsir Erben vnd nach=
komen nicht annemen noch zu vns zihen oder vns der vnderwinden vsgescheiden alle argelist vnd geuerde In diesir eynunge nemen wir doch vs daz heilige Romische
Reich on geuerde Diese vorgeschribene stucke vnd eynunge haben wir die obgenant hertzogen Ruprecht der Elter Stephan der Elter Ocke Stephan der Junger friderich vnd
Johanns fur vns vnd fur vnsir aller Erben vnd nachkomen als vorgeschriben stehet in guten trewen gelobt stete vnd veste zu halden vsgescheiden alle argelist vnd geuerde
Des zu vrkund vnd ewiger stetikeit hat vns iglicher sein Jngesigel fur sich vnd seine Erben als vorgeschriben stehet an diesin brieff tun hengen Geben zu Nurenberg
Nach Cristes geburte dreyczehenhundert Jar dornach in dem vier vnd sibentzigsten Jare an der mitwochen noch sant michels tag des Erczengels