Wir Stephan der Elter Stephan friderich vnd Johans desselben hern Stephans des Elten Sone von gots gnaden pfalzgrauen by Reyne vnd Herczogen in Beyern Bekennen fur vns vnser Erben vnd nachkomen pfalzgrauen by Reyne vnd Herczogen in Beyern vnd
tun kunt offenlich mit disem briue allen den die yn sehen oder horen lesen Wanne der allerdurchleuchtigste furste vnd herre her karl Romischer keiser zu allen zeiten merer des Reichs vnd künig zu Behem vnser lieber gnediger herre von seinen vnd seiner Erbn
wegen künig zu Behem dem hochgeborn fursten hern Otten des heiligen Reichs Erczkamerer kurfursten pfalzgrauen by Reyne vnd Herczogen in Beyern vnserm liben Vettern von wegen des kauffes vnd kaufschillinges des furstentumes marggraffschafft vnd er=
ben zu Brandenburg die derselbe vnser herre der keiser seinen erben recht vnd redlichen gekaufft hat dise nachgeschribene herscheffte lande Stete Burge Slozze festen Offene slozze manscheffte lehen vnd guter mit allen vnd iglichen iren zugehorungen
die darzu gehoren mitnamen floz hiesaw Sulzpach Eysenberg Brechstein lichtenstein lichteneke Breitenstein halben teile von Reichenecke Neidstein hersprug vnd lauffen mit allen iren herschefften manschefften dorffern Erben gulden Czinsen
Velden puschen wazzern weiden vischweyen wisen Berkwerken welicherley die wern oder wo sie do vffquemen oder funden wurden vnd vornemelichen mit allen rechten Eigennugen vnd zugehorungen als sie die vormals ynnegehabt vnd besezzen habn
besucht vnd vnbesucht nichtes vszgenomen vnd darzu die nachgeschribene Sloz der etliche yr lehen ist vnd die etliche yr offene Sloz mitnamen husecke Ruprechtstein das vierde teyle an Reichenecke holenstein der waldaw vnd Schellemberg
hohenfels vnd das Stetul das darzu gehort helffenberg halb vnd heymberg in allen den rechten als sie die ynnegehabt vnd besezzen habn furstlichen vngantwurt vnd gegebn hat vnd auch die selben herscheffte lande Stete festen Burge Slozze
manscheffte lehen leute vnd guter mit iren zugehorungen an yn gewiset hat vnd yn der in nucz vnd gewere gesazet hat mit sulichen vnderscheide wer es sache das der egen vnser lieber Vetter herczog Otte sturbet ane eliche erben Sone das denne die
egenant herscheffte lande Stete festen Burge Slozze manscheffte lehen guter vnd yre zugehorungen vnser vnd vnsr erben pfand seyn sullen fur hunderttausent gulden So lange bis das vns die egen vnser herre der keiser seine Erben od nachkome
künige zu Behem dieselben sumen gelts genglichen legalen als das alles in andern vnsrs egen hern des keisers brieuen vollenkomenlich ist begriffen dauon mit volledachtem mute rechter wizzen vnd auff die brieffe haben wir den vorgenantn
vnsrm hern dem keiser den durchleuchtigen fursten vnd hern hn Wenczlaw künige zu Behem seinen Sone vnd yr aller Erben vnd nachkome künigen zu Behem vnd yn zu getruen handen dem hochgeborn fursten hern Johans marggrauen von
merhern hern Josten hern Johansen vnd procopien seinen Sonen vnd yr aller Erben gelobt vnd geloben vnverscheidenlichen in gesamter hant fur vns vnsre Erben vnd nachkomen die das antreffen mag in guten truwen an eydes stat vnd an alles
geuerde kumpt es zu schulden das von todes wegen des egen herczogen Otten vnsers Vettern die vorgenan herscheffte lande Stete festen Slozze Burge manscheffte lehen lute guter vnd yre zugehorungen an vns komen als davor begriffen ist das
wir denne die dem vorgenan vnsrm herren keiser karlen künig wenczlaw seinem Sone yren Erben oder nachkomen künigen zu Behem wanne sie das an vns vordern oder heischen werden fur die obgenan sumen gelts hunderttausent gulden gute
von golde vnd swere von gewichte zu losen geben sullen vnd wollen ane widerrede vnd allirleye hindernisse vnd wann sie vns dasselbey geltes begalet haben als davor begriffen ist So sullen vnd wollen wir yn aller der obgenan herscheffte lande Stete
festen Burge Slozze manscheffte lehen leute guter vnd yre zugehorungen ledig loz vnd vnbekummert wider abetreten yn sie vngantwurten vnd widergeben ane alles geuerde in aller der massen als sie die dem egen vnsrm Vettern herczogen Otten vor
mals vngantwurtet vnd vngegebn haben vnd zu merer sicherheit sulicher sachen haben wir gebeten den hochgeborn fursten vnd herren hn Balthasar marggrauen von meissen vnd hern friderichen Burggrauen zu Nurenberg das sie durch sulicher lo
sungen willen als davor begriffen ist fur vns vnd mit vns dem obgenan vnserm herren keiser karlen seinen Erben vnd nachkomen vnverscheidenlichen vnd in gesamter hant geloben sullen vnd wir Balthasar von gots gnaden marggraff von
meissen vnd wir friderich Burggraue von Nurenberg Bekennen vnd tun kunt offenlich das wir mit volledachtem mute vnd rechter wizzen vnserm herren keiser karlen künig Wenczlaw seinen Sone allen yren Erben vnd nachkomen künigen zu
Behem vnd yn zu getruen hant den obgenan hochgeborn fursten hern Johansen marggrauen von merhern hern Josten hern Johans vnd Procopien seinen Sonen vnd yr aller Erben gelobt haben vnd geloben mitsampte den vorgen herczogen Stephan
dem Eltern hern Stephan hern friderichen vnd hern Johansen desselben hern Stephans des Eltern Sonen vnverscheidenlichen vnd in gesamter hant vnd auch mit yn vnd fur sie yre Erben vnd nachkomen die das antreffen mag in guten truwen an ey
des stat vnd ane alles geuerde das die obgenant herczogen von Beyern yre Erben oder nachkomen die das antreffen mag alle die vorgen herscheffte lande Stete festen Burge Slozze manscheffte lehen lute guter vnd yre zugehorungen ab das zu su
lichen schulden kumpt als davor begriffen ist denselben vnserm hern keiser karlen künig Wenczlaw seine Sone yren Erben vnd nachkomen künigen zu Behem vmb die vorgen sumen hunderttausent gulden zu losen geben sullen vnd wanne sie
desselben geltes begalet seyn das sie denne zu stunde ane widerrede vnd ane allirley argelist dem egen vnserm herren dem keiser seinen Erben oder nachkomen künigen zu Behem aller der obgen herscheffte lande Stete festen Burge Slozze manscheffte
lehen lute guter vnd yrer zugehorungen als davor geschriben stet vnuigogenlichen abetreten sullen vnd yn die lediglichen vnd vnbekummert wid vngantwurten ane hindernisse vnd ane alles geuerde in aller der massen als die dem vorgen herczogen
Otten vormals vngantwurtet seyn des vrkund dis brieffs versigelt mit vnsrn anhangenden Insigeln der geben ist zu Nurenberg Nach Crists geburt dreiczenhundert Jare darnach in dem vierundsibenczigisten Jare an sant gallen tage