Wir Pote von Eylburg bekennen offinlichen vor vns vnd vnß erben in desem kegenwertigem briue Allen den dy yn sehen horen ader lesen daz wir mit wolbedach=
tem mute mit vernumpft mit rechtem wissen vnd mit vnß frunde rat virkauft han vnßm lieben ohemen her Thime von coldicz camermeyſt(er) vnßs h(er)rn
dez keys(er)s seyne erben vnd nochkumlingen daz hindirhauz zu Eylburg mit dem dinkenteile der stat zu Eylburg mit den dorfern dy wir drzu gehabet han mit
den zinsen vnd gulde mit den apusthofen mit kirchen mit gerichten obirsten vnd nidersten vf felden vnd in dorfn mit enleichten mit den molen mit den Juden
mit eckern mit wisen weyden puschen welden halgern struchen hecken wassirn wassirleufen teichen fischen teychen teichsteten mit den hoken geleiten mit
der Jait wildban vnd fogilweyde mit bergen grunden steynen vnd taln mit allen irngen erunge zugenellunge vnd zu gehorunge vnd mit allen den genissen rechten vnd
herlicheiten als wir den selben dinkenteil gehabet vnd beseßen han vnd als wir ez auch vnß mumen frawe Jutten der wendyne von eylburg virsazt han sy seyn benant ad(er)
vnbenant ader wy man iglichs mit besundern worten benennen mag nichtes nicht vzgenomen ez wndir der erden adir obir der erden vmb achczehenhundirt vnd firczig
schok groß dy her vns mit gereitem gelde gancz vnd gar gericht vnd bezalt hat dorvmb zo hab wir obgen(ant) Pote von Eylburg dem egn(ant) vnßm oheme h(er)n Thime von coldicz
seyne erben vnd nochkumlingen daz vorgn(ant) hindirhauz mit dem dinkenteile der stat mit der manschaft vnd mit alles wassen als oben begriffen ist vfgeloßen mit gutem
willen vor vnßm gnedigem h(er)rn dem kunige von Beheim von dem wir ez zuleen gehabet han vnd der ez ym vnd seyne erben gnediclichen geleen hat vnd globen auch
in desem briue an gewere der frawe Jutt(en) vnß mup daz sy ir liepgedinge auch vflassen sal vor dem egn(ant) vnßm h(er)rn dem kunige waz sy drvffe hat Auch globe wir
ab vnß vorgn(ant) mume dy wendyne icht mer haben wolde von vnßm obgen(ant) ohemey h(er)n Thime von coldicz adir von seyne erben denne seßendehalp hundirt schok
meysnyscher groß zo sulle wir adir vnß erben yn adir seyne erben des abnemen ane schaden Auch bekenne wir daz wir ym vnd seyne erben virkauft han daz
meysterkorn waz wir doran gehabet han Auch globe wir waz wir manschaft gehabet han von vnßm h(er)rn den margg(ra)fen von meyssen adir von keyne andern fursten sy
seyn geistlich adir wertlich daz wir vnd vnß erben ym vnd seyne erben dy vflassen sullen vnd sullen sy an yn vnd an seyne erben weisen an alles geverde Auch
globe wir vor vns vnd vnß erben ab wir icht mer virkauft hetten by desen gutingen gancz dy vzgangen seyn als wir mit ym in eyme kaufe gestande han daz sulle
wir ym adir seyne erben enantw(er)ten an allerley wedirsprechen Auch bekenne wir daz wir virsazt han eynhundirtvirczig schok geldes in der stat zu Eylburg vnßm
vetter h(er)n Poten von Eylburg vnd dy sulle wir ym adir seyne erben auch losen wo wir dez meisteen wten zo sulle wir ym so wir eyn schok geldes geben schok groß
ab slagen an den selbin achczehenhundirt schoken Auch hab wir virsazt elff schok geldes dy zu Eylburg zu gehorn an vnßm teil den wir gehabet han vnd
dy sulle wir ym losen adir seyne erben wo wir dez meiste wten zo sul vns adir vnßn erben abgen ye vor eyn schok geldes gehen schok groß Auch hab wir
virsazt manschaft vnßm brud(er) ritter h(er)n poten von Eylburg dy sulle wir adir vnß erben ym adir seyne erben auch enantw(er)ten adir losen wo wir dez meiste
zo sulle vns adir vnß erben abn abgen dreyßk schok groß davor wir dy selbe manschaft virsazt han an den vorgn(ant) summen geldes achczehenhundirt vnd firczig
schoken Auch globe wir vor vns vnd vor vnß erben vnd mit vnß vnß frunde mit gesamter hant heynrich von pise geseßen zu Jurbaw fridrich von pise
vnd albrecht von bescawenforst desen obgen(ant) kauf alle stuke vnd artickil als obgeschreben sten daz wir dy vnßm obgen(ant) ohemey h(er)n Thimen von coldicz seyne
erben vnd zu seyne hant h(er)n h(er)n von keller seyne swager geseßen zu barot vnd h(er)n albrecht von kyczing dem Junge geseßen zu muczeln zu entwern vnd
freisten sullen vnd wern vor allerley ansproch als in dem lande zu meyssen eyn recht ist an alle arg vnd geverde wo wir dez ichteen wten vnd wir von dem
egn(ant) vnßm oheme h(er)n Thime von coldicz adir von seyne obgen(ant) frunden gemanet wirden zo globe wir vnd sullen vnß iglicher adir an vnß stat eyn bider
meß man mit eyme knechte vnd mit zweyen pferden eyn reyten in dy stat zu pirne in eyme virte herberge dy vns dor in eyme gezeiget wirde vnd
dorinne eyn gewonlich inlager zu leisten vnd drvz nym(er) zu komen wir hetten ym adir seyne erben adir seyne obgen(ant) frunden alles daz gehalden vnd
entwortet waz sy dez antw(er)te adir hindirnisse doran hetten adir keyne schaden doran genomet hetten den sy beweisen mochten zu vrkunde vnd zu eyn
merer sicherheit hab wir vorgn(ant) Pote von Eylburg vnd mit vns vnß obgen(ant) frunde h(er)n heyn(rich) pise fridrich von pise vnd albrecht von bescawenforst
vnß Jnges(igel) gehangen an desen briue der do gebin ist zu minchen noch cristi geburte dreyzehenhundirt Jar darnach in dem sechst
vnd sebnczigstem Jare in der fasten an dem nesten freitage vor dem palmtage