Wir schultheisse burgermeister der Rate vnd die burger gemeinlichen d(er) stat zu mulhusen Tun kunt allen de die dise
brief sehent oder horent lesen daz wir von geheisse des aller durchluchtigisten fursten vnd h(er)ren h(er)n karls Romische(n) keysers
zu allen zite(n) merer des Riches vnd kuniges zu Behem vns(er)s liebn genedigen herren vn(d) mit wissen vnd wille aller
kurfursten des heiligen Riches mit truwen gelobet habn vn(d) liplich zu den heiligen gesworn dem edeln h(er)n Boreslaw von
der Risenmuli vnd lantvogt zu elsass vns(er)m liebn genedigen h(er)ren von wegen vnd zu handen des aller durchluchtigisten
fursten vn(d) h(er)ren h(er)n Wenczlaws gekornten Romisches kuniges vn(d) kuniges zu Behem der yme disz empfolhen hat von
vns zu nemende wan er selbe zu disem mal zu vns niht kume(n) mag yn fur einen Romischen kunig ze habn vn(d) zu halte(n)
alle vnser vn(d) sine lebetage vn(d) wenne d(er) obgenant vns(er) h(er)re der keyser von todes wegen abegat daz got lang wende od(er)
daz er daz Rich vffgibet So sullen vn(d) wellen wir yn guten truwen de(m) egen(anten) vns(er)m h(er)ren kunig Wenczlaen gehorsam vnd
gewarted sin vn(d) gewarte(n) alle vnser vnd sin lebetage alse eime Romischem kunige zu kunftigem keyser vn(d) alse vns(er)m
rehte(n) h(er)ren an alle argeliste vn(d) geberde Wir sullen vnd wellen och in des obgen(anten) vns(er)s h(er)ren des keysers huldunge vn(d)
truwen nu vn(d) hernach sin vnd beliben an alle geberde also lange als er gelebet od(er) bis daz er daz Rich vffgibet vnd
des zu vester stetikeit hant wir vns(er) stat Ingesigel fur vns vn(d) vns(er) nachkome(n) an disen brief gehange(n) d(er) gebn ist zu
mulhusen nach cristus geburte Tusent dru hund(er)t vn(d) in dem sehs vn(d) sibenziguste(n) Jare vf s(anc)te Margrete(n) tag der
heilige(n) Juncfrowen