Wir die Burgermeister Schepffen Rate vnd Burger gemeinlichen der Stat zu Nurenberg Tun kunt
allen die disen brief sehend odir horen lesen daz wir von geheisse dez allerdurchleuchtigsten fursten vnd
herren her(r)n Karls Romischen keysers zu allen zeiten mer(er) dez Reichs vnd kunigs zu Beheim vnsers liebn ge=
nedigen herren vnd von geheisse vnd gebots wegen aller kurfursten dez heiligen Reichs mit gute(n) treuen
gelobt haben vnd leiplichen zu den heiligen gesworn dem allerdurchleuchtigsten fursten vnd herren
her(r)n Wenczla(w) gekorn vnd gekrontem Romischen kunig vnd kunig zu Beheim In fur eine(n) Romischen
kunig zu halten vnd zuhaben alle sein vnd vnser lebtag Vnd wann d(er) obgen(ant) vnser her(r) der keyser
von todes wegen ab geet daz got lange wende odir daz er daz Reiche vffgebe So sulln vnd wolln
wir in guten treuen dem obgen(anten) vnserm herren kunig Wenczla(w) gehorsam vnd gepunden sein vnd ge=
wa(r)ten alle sein vnd vnser lebtag Als einem Romischen kunig zu kunftigem keyser vnd als vnsim
rechten herren an alle argelist vnd ongeu(er)de Wir sulln vnd wollen auch in dez egena(n)tn vns(er)s herren
dez keys(er)s huldung vnd treuen nu vnd furbas sein vnd beleibn an alle(n) geu(er)de als lang er gelebt
odir biz er daz Reiche vffgibt Vnd dez zu v(er)ster stetikeyt habn wir vnser Stat Jnsigel fur vns
vnd vnser nachkomen an disen brief gehangen der gebn ist zu Nurenberg an dem montag nach
sant Jacobs tag nach cristus geburt dreuczehnhundert iar vnd in dem sechsundsibnczigistem Jar