Wir Wenczlaw von gotis gnaden Byschoff zu Breslaw bekennen offenlich in dissim briue allen den die en
sehen adir horen lesen das wir als eyn Bischoff zu Breslaw ein furste des künigrichs zu Beheim von vnser
vnd vnsers Bischtums wegen zu Breslaw vnd mit vns die Ersamen Hanke probste zu lubus vnd Nidas von
kesinburg Thumhern zu Breslaw als Edle manne des künigrich zu Beheim von vnsers gemeyne Capi=
tels wegen zu Breslaw das sie dczu benant vnd geben sint das herczogtum vnd herschafft zu Grot=
kow lande vnd Stat mit allen manscheften Rechten vnd zugehorunge wye man die mit sunderlichen
worten benennen mag die von dem Allirdurchleuchtigsten fursten vnd herren hern Wenczlaw Romisschen
künig als von eynem künig zu Beheim zulehen rurent von demselben vnsirm lieben gnedigen herren
als eynem künig zu Beheim vnsirm Erbhern zu rechten furstlichn lehen empfangen haben vnd wir obge=
nantir Wenczlaw Bischoff als ein furste Hanke vnd Nidas als Edil mann von wegen der Thumherren
vnd Capitels dczu benamet haben ym dovon als eynem künig zu Beheim vnsirm Erbhern gehuldet
gelobt vnd gesworn leibhafftig eyde zuden heiligen das wir demselben vnsirm hern hern Wenczlaw Ro=
misschen künig seinen Erben vnd nachkomen künigen zu Beheim als künigen zu Beheim vnsirn rechten
naturlichen ordelichn vnd Erblichen obirsten lehenheren holde getrew gehorsam vnd gewert sein sullen
vnd wallen iren schaden zuwenden vnd fromen zuwerben vnd alles das gen in zutun das wir in als
ire des künigrichs vnd der Crone zu Beheim furste vnd Edle manne schuldig adir pflichtig sein zutun
an alles geuerde vnd argelist czur orkunde dys briues an den wir vnsir Ingesigil angehangen haben der
gegebin ist zu prage an der heilgen drye künige tag nach gotis geburth drycenhundert Jar dornach
in dem drye vnd Achtczigisten Jare