Wir Ladislaw von gotes gnaden herczog zu Oppoln herre zu Welun zu dobern vnd zu der koya bekennen vnd tun kunt
offenlichen mit disem briue allen den die jn sehen oder horen lesen Wann die Allerdurchleuchtigist furstinne vnd frowe
Elizabeth die alde vnd Maria die junge kuniginne zu Vngern (et)c(etera) vnser gnedigen frowen den Allerdurchleuchtig
~igisten~ fursten vnd herren herren Wenczlawen Romischen kunig zu allen czeiten merere des Reichs vnd kunigen zu
Beheim vnsern liben gnedigen herren durch sunderlicher trewe vnd libe willen zu einem rechten vormunde ge
koren vnd genomen haben vnd vns sunderlichen empfolhen haben das wir jm mit allen landen leuten Steten
vnd vesten gewartende sein sollen So haben wir demselben vnserm herren dem Romischen kunig aller solcher
lande vnd leute Stete vnd vesten die wir in Vngern jnnegehabet haben vnd ouch des landes zu Reussen das
wir vnser lebtage haben sollen abegetreten vnd jngeantwortet abtreten vnd jnantworten jm die in kraft
disz briues als einem rechten vormunde Also bescheidenlichen wenn das were das er ermanet wurde von
den vorgenanten frowen oder von irer einer noch dem als sie ledig wurden das er denn die egenan(ten) lande
leute Stete vnd vesten jn wider antworten vnd emgeben sol oder domit varen vnd tun als sie des an jm
begeren werden Mit vrkunt dicz briues versigelt mit vnserm anhangendem jnsigel Geben zu Perne
noch Criste geburt dreyczehenhundert jar vnd denach in dem Sibenundachczigisten Jare des nechsten
mitwochen noch dem Suntag als man singet Quasi modo geniti