Wir Vlrich h(er)re ze Hanow tu(o)n chunt an disem brief allen den di in ansehent vnd horent lesen Daz wir gelobt vnd gesworn haben vnd
rehte purgen sein worden des hochgeborn fursten h(er)zog Hainr(ich) von chernden vnd graven ze tyrol vnd ze gorz gen im vnd gen allen sinen
erben er sein tot od(er) leb(en)d vmb vierzig tausent m(a)rch silbers p(ra)g(er) gewigtes fur vnsern lieben h(er)ren h(er)rn Iohansen chu(o)nig von Beheim vnd
von polen vnd graven ze luccemburch Der selben phenning geuallent im zehen tausent m(a)rch zu(o) des selben vnsers h(er)ren chu(o)nigen stat
nach geuallent im zwainzig tausent m(a)rch silb(er)s des selben gewigtes fur di haimsteur chu(o)niginne frowe chvnen seiner wirtinne di
got genade Dar nach geuallent im zehen tausent m(a)rch silb(er)s p(ra)g(er) mu(o)nze fur den spruch den im d(er) wirdig h(er)re pischof Hainr(ich)
von trient vnd d(er) hochgeborn furste h(er)zog Hainr(ich) von payern vnd pfalzeng(ra)f ze rein hin zu(o) gesprochen habent als
di haimsteur sprechent d(er) d(er) egend(er)te vns(er) h(er)re von peheim vnd der h(er)zog von chernden genant ist dar vmb zugeben
habent Des summe pringet also vierzig tausent m(a)rch p(ra)g(er) mu(o)nze Der vorgenanten phenning slahen wir im zegeben
auf sand michels tag d(er) schirst chumpt funf tausent m(a)rch Dar nach von dem selben sand michels tag vber ein Iar zehen
tausent m(a)rch Dar nach ab(er) von dem selben sand michels tag vber ein Iar zehen tausent m(a)rch Dar nach aber von dem selben
sand michels tag vber ein Iar zehen tausent m(a)rch Dar nach ab(er) von dem selben sand michels tag vber ein Iar funf tausent
m(a)rch Daz w(er)dent also vierzig tausent m(a)rch mit diser beschaidenhait geding zu(o) swelcher vrist man im od(er) sein erben di vorgenant(en)
phenning nicht gebe so hat er od(er) sein erben gewalt vns zemanen nach d(er) vrist vnd sullen danne nach d(er) manug in den
nehsten vierzehen tagen mit vnser selbes leibe ein ritter od(er) zwen chnecht an vnser stat in senden gen frankenfurt in di stat
ze laisten als gewonlichen vnd recht ist vnd da nimer aus zechomen als lang vntz daz im wid(er)tan wirt der pruch dar
in an d(er) gult d(er) phenning wid(er)taten ist vnd sullen auch also lang laisten vntz daz er od(er) sein erben d(er) phenning gar vnd gancz
ledigen gult w(er)dent dar an in pruch geschehen sint Wir sullen auch od(er) di vorgenanten vnser chnecht aus d(er) laistung nimer
chomen ez geru(o)che d(er) daz gu(o)t gelte da pru(o)che an geschehen w(er)n gen regenspurch in daz stat wo er od(er) sein erben od(er) ir gewisser
poten si hin schaffen zegeben vnd zeantwurten Dise vorgeschriben sache loben wir stet zehaben vestechlichen vnd genczlichen mit gu(o)ten
trewen an alle arg list vnd geben dar vber disen brief sigelt mit vns(er)m Ingesigel zu(o) einem vrchund d(er) warheit D(er) ist gegeben
ze vlmestat da man zalt von cristus gepurd dreuzehenhund(er)t Iar dar nach aht vnd zwainzig Iar an dem donrstag vor d(er)
vast(en)