Wir Nyclas von gotes genaden hertzog ze Troppaw veriehen und tun chunt allen den die disen brief sehent od(er) horent lesen daz wir
gelobt und gehaizzen haben und recht purgen sein worden des hochgeporn fursten hertzog Heinr(ich) von Charnden und grafen ze Tyrol
gen im und gen allen sinen erben ez sein sun od(er) tocht(er) umb viertzig tausent mark silbers prag(er) gewichtz fur unsern lieben h(er)ren
und hochgeporn fursten chunig Johansen von Beheim und von Polan und graf ze Luczelnburch der selben pfenning gevallent im
zehen tausent mark ze unsers h(er)ren sunnen der nach gevallent im zwaintzig tausent mark silbers des selben gewichtz fur
di haimsteur chuniginne vrow Annen sein wirtinne d(er) got genade der nach gevallent im zehen tausent mark silbers
prag(er) muntze fur den spruch den im der wirdig h(er)re pischof Heinr(ich) von Regensp(urch) und der hochgeporn furste hertzog Heinr(ich)
von Bayeren und gesellen d(er) churf(ursten) ze Rom im zu gesprochen habent als di hantvest sprechent die unser payde h(er)ren genein
ander dar umb geben habent der summe springet also viertzig tausent mark prag(er) muntze der vorgenanten pfenning
schullen wir im ze geben uf sand Nyclas tag der schirst chumpt funf tausent mark der nach aber von dem selben
sand Nyclas tag uber ein jar zehen tausent mark der nach aber von dem selben sand Nyclas tag uber ein jar zehen
tausent mark der nach aber von dem selben sand Nyclas tag uber ein jar zehen tausent mark der nach aber von
dem selben sand Nyclas tag uber ein jar funf tausent mark daz wirt also viertzig tausent mark die sogenanten
geding ze swelcher vrist man im od(er) sein erben die vorgenanten pfenning nicht gebe so hat er od(er) sein erben gewalt
uns zemanen nach d(er) vrist und sullen danne nach d(er) manig in den nehsten viertzehen tagen mit unser selbes leibe ein
riten od(er) zwen riter in unsers stat ein senden gen Regenspurch in die stat und sullen da laisten in geyselsweis und
nim(m)er aus chomen als lang untz daz im widerchen wirt d(er) spruch d(er) im an d(er) gult d(er) pfenning underwunden ist wir
sullen auch also lang leysten untz daz er od(er) sein erben d(er) pfenning gar und gentzlichn gewert w(er)dent dar an in pruche
geschehen sint wir sullen auch daz d(er) leysting od(er) die vorgenanten unser riter nimer chomen ze gemahe e daz gut allez
die pruche an geschehen w(er)n gen Regenspurch in die stat wa er od(er) sein erben od(er) ir gewalt wan si hin schaffen zegeben
und zeantwurten dise vorgeschriben sache lobwir stet ze haben bei unsern eren an aides stat und als wir zu den heyligen swe
ren sullen und geben dar uber disen brief sigelt mit uns(er)m insigel ze einem urchund d(er) warheit der brief ist gegeben
ze Brinne do man zalt von cristes gepurt dreytzehenhundert jar dar nach in dem acht und zwaintzigstem jar des sunn
abents nach sand Jacobs tag