Wir Wilhelm von gotes gnaden margraue czu myssin vnd lantgraue In doringen Bekenn offintlichin vnd thun kunt
mit disem briefe allen den die yn sehin adir horin lesin daz wir vns mit dem allirdurchluchtigstin furstin vnd
hern hern Wenczlawen Romischin konige czu allin czeitin merer des richs vnd konige czu Behem vnsirm
liben gnedigen hern gesaczt vnd geeynt habin Also daz wir ym geret vnd globt habin reden vnd globn
ym mytutin truwin genwertiglichin mit disem briefe daz wir ym alle briefe obir buntnis vnd eynunge
welchirley die sin die wir vormals sinem vatir seligen vnd ym gegebin habin nach allin yrin iglichin
nd vswisunge stete gancz vnd vnuorruckt halden sullin vnd wollin vnd ym die nicht brechin in dheine
wis ane allirley argelist des glich er vns ouch vmb briefe wid(ir) globt hat czuhalden Ouch habin wir
vns mit dem selbin vnsirn gnedigin hern von vns(ir) beider lande wegin also vnderet vnd geeynt daz wir
beidersit mit den vnsirn bestellin sullin daz vns(ir) eyner vz des andirn lande hinfurdir widir recht nicht
mer sal beschediget werdin vnd vns(ir) eyner sal dem and(ir)n dortmer getruwelichin behulffin vnd bera
ten sin vnd welchir vndir vns vz des andirn lande also wid(ir) recht beschediget worde daz sal onß eyn
dem and(ir)n vorkundigen vnd czuwissin thun vnd wir sullin denn bestellin mit vns(ir)n Amptluten Steten
vnd landen daz sy darczu thun vnd ernstlichin daran sin sullin daz der schade der so gescheen were von
stadn gekert vnd widirtan worde ane vssacz adir solden an der libe vnd gute grifen die daz getan
hettin Were ouch daz ymand in vns(ir) beider lande roub mord brand adir dube beginge wan daz vnser
eyner dem andirn vorkundigete thelden denn der adir die so daz getan hettin darumb nicht gehorsam
sin noch daz widirtun So sullin die vnsirn beidersyd in vns(ir) beid(ir) lande an dem adir den von stadin helffin
vnd an des adir der libe vnd gute grifen als obingeschrebin steit Ouch sullin wir bestellin daz vns(ir) beid(ir)
Amptlute vnd Stete gemeynand(ir) redin vnd globin sullin sulche rouberye czusturen vnd czukeren vnd
aneynand(ir) czuhelffen nach vswisunge vns(ir) eynunge vnd als obingn(an)t ist Vnd were es sache daz wir vff
beidersiten adir eyn vndir vns andir Amptlute seczen adir mer seczen wordin als balde so denn von vns
gesaczt werdin So sullin sy an vorenan globn in gutin truwen ane argelist vns allis gesende alle
obingeschrebin artikele vnd stugke stete vnd veste czuhalden Vnd die nach allen yren vormugin gancz
lichin czuvolfuren Vnd hymite sullin ouch alle andir vnd alde briefe dy des obingn(an)tin vns(ir)s gnedigin
hern des Romischin konigis vatir der keyser dem got gnade vnd der selbe vns(ir) h(er)re der Romische konig
vns wir vormals vnd eynand(ir) gegebin habin vngekrenckt sin Sund(ir) sy sullin alle in yren krefftin vnd
machtin bliben vnd habin des czu geczuge vns(ir) Ingesigel an disen brieff wissintlichin lassin hengen Ge
gebin czu prage nach gotis geburt dreyczenhundirt Jar darnach in dem sechse vnd nwnczigstin Jare
an der antwortin sente lorenczen abende