Ich Emunde von Endelstorf Bekenne vnd tu kunt offenlichen mit disem briue allen den die In sehen oder horen lesen wann
der allerdurchluchtigste furste vnd herre her Wenczlaw Romischer kunig zu allen czeiten merer des Reichs vnd kunig zu Behem mein
gnediger herre mir das slosse mitnamen hawse vnd stat zu fels mit allen vnd iglichen seinen zugehorungen nichtes vßgenomen
mein lebtage zuhaben gnediclichen gegeben vnd verschriben hat als das sulche Maiestatbriue die er mir doruber geben hat wol
vßweisen doron mit wolbedachtem mute vnd rechter wissen so gelob ich egenan(ter) Emund dem egenan(ten) meinem gnedigen herren
dem kunige in guten trewen das ich Im mit dem egenan(ten) slosse zu fels gewartende sein sol vnd wil vnd das er ouch vnd sein
amptlute von seinen wegen sich doruff vnd dorein als vff seinem offen hawse behelfen solle vnd moge wider allermennclich
vnd sol ouch Im domite getreulichen dinen an alles geuerde vnd geloben Im ouch vnd seinen nachkomen Herczogen zu lucze(m)
burg mit dem egenan(ten) slosse fels getrewe vnd gwere zusein an allen argenlist vnd wir Gerhart vnd ditrich gebruder
von Endelstorf des egenan(ten) Emundes sune globen ouch in guten trewen dem egenan(ten) vnsern gnedigen herren dem kunig vnd
seinen nachkomen Herczogen zu luczemburg an alles geuerde weres sachen das der egenan(te) Emunde vnser liber herre vnd vater
von gotes vorhengnuss wegen sturbe vnd abginge da got lange vor sey so sollen wir das egenan(te) slosse zu fels mit seinen
zugehorungen an alle hindernuss vnd widerrede dem egenan(ten) vnsern herren dem kunig an alle vßslag vnd schaden lediclichen
in sein hende antwurten vnd wider eingeben an geuerde mit vrkunt dicz briues vorsigelt mit vnsern anhang(enden) Infigeln Geben
zu prage nach cristes geburt dreiczenhundert Jare dornoch in dem Sechsundneunczigistem Jare des dinstages vor sand Tho
me tage des heiligen Czwelfboten