Wir Wilhalm vnd Albrecht vettern von gotes gnaden Herczogen ze Osterreich ze Steyr ze Kernden
vnd ze Krain Grauen ze Tyrol (et)c(etera) Bechennen vnd tůn kůnt offenleuch mit disem brief daz wir mit wol=
bedachtem müt vnd zeitigem Rat vnserer h(er)ren Rete vnd getrewen mit rechter gewissen fur vns vnd alle
vnsere helffer vnd diener vnd darczů fur alle die die durch vnsern willen tůnt vnd lazzent mit dem
durchleuchtigen hochgebornen fursten herrn Wenczeslawen Römischen künig vnd künig ze Beheim
vnserm lieben h(er)ren vnd Swager vnd allen seinen helff(e)n dienern vnd zülegern ainen stetten ganczen
vnd chastenleichen frid aufgenomen haben vnd nemen auch auf mit dem brief der weren sol von hůnt
vntz auf sand Jörgen tag der schirist kůmpt denselben tag vnd die nacht über Vnd geloben mit vns(e)rn
furstleichen worten ane argeliste vnd ane alle geuerde denselben frid die egen(anten) zeit stet gancz vnd vnu(er)=
ruckht zehalten ane argeliste vnd ane alle geuerde In aller der mass als es uor vntz her zwischen vnser
auch in frid ist gestanden Mit vrkúnd d(e)z briefs versigelt mit vnsern anhangunden Insigeln Der
geben ist ze Wienn an sand Johans tag in den Weichnacht feyrtegen Nach Cristi gepurd drew=
czehenhundert Jare vnd in dem Sibentvndnewnczigistem Jare