WIr Iost von gotis gnadin marggraff vnd herre czu merhern bekennen vnd tun kunt offenlich mit disem briue allen den die In sehen oder horen lesen wann der Allerdurchluchtigster furste vnd herre her Wenczlaw Romisscher kunig czu allen czeiten merer des Rychs
vnd kunig czu Behem vnser liber gnediger herre durch sunderlicher trwben willen dy er sich an vns vorsteht vnd sunderlich daruff das czwisschen demselben vnserm gnedigen herrn dem kunige vnd vns stete gancze vnd vnuerruckte libe vnd trwbe furbasmer bleibe
mit gutem willen vnd vnbetwungen vnd ouch mit gutem Rate syner fursten herren Edlen vnd getruwen vns die nochgeschriben syne lande vnd stete / witnamen das herczogthum czu Gorlicz mit der manschafft vnd allen andern czugehorungen als die seliger gedecht
nisse etwenne der hochgeborn furste herre Iohannes herczog czu Gorlicz syn bruder vnser liber vetter die wyle er lebte gehabt vnd besessen hat Item Budissin hawss vnd stat mit den steten lubaw lubaw vnd camencz vnd dorczu mit allen vnd iglichen wercken dorffern
mannen manschafften lehen lehenschafften Geistlichen vnd werntlichen Eckern Renten czinsen nuczen vnd allen andern Iren czugehorungen die in die howptmanschafft doselbst czum Budissin gehoren witnamen also das wir Budissin hawss vnd stat mit allen obge
schriben synen czugehorungen von datum dis briues vber funff gancz Iare dy nechst nacheinander volgen lediglichen vnd an allerley hindernisse halden vnd besiczen sullen wem ouch daselben funff Iare vorgangen sind vnd der egenant vnser herre der kunig sulche dreben
Tausend schok gross die er nwe der hochgebornen Elzbethen etwenne des egenant synes bruders herczog Iohansen vnsers vettern tochter anheymstewr vnd mit gabe geben sal dem hochgeborn fursten her Rudolphen des hochgeborn fursten her Balthazar lantgrauen czu doringen
vnd marggrafen czu meissen sune vnserm liben ohem beczalt hat So sullen wir Budissin hawss vnd stat mit allen obgeschriben synen czugehorungen vnser lebtage Innehaben vnd besiczen wer aber das wir Budissin hawss vnd stat mit Iren czugehorungen mit
vnser selbis gelte an vns losten so sullen wir die gleicherweys vns lebtage haben vnd sulche drebentausend schok grossen domite wir die obgenant hawss vnd stat mit Iren czugehorungen gelost hetten die mogen wir vorschatzen vnd vorgeben weme wir wollen Item das
land czu lusicz mit der manschafft vnd den steten luckaw calaw lubin golssin gubin spremberg vnd allen andern steten mercken vnd dorffern Renten czinsen nuczen die in die howptmanschafft czu lusicz gehoren die ouch der egenant vnser gnediger herre der kunig vnd
der obgenant etwenne syn bruder herczog Iohannes vnser vetter in demselben lande czu lusicz gehabt haben Item die stat czur sittaw mit der vogtey doselbst der manschafft vnd allen czugehorungen die czu derselben stat vnd vogtey gehoren vnd nementlichen mit allen
vnd iglichen mannen manschafften lehen lehenschafften Geistlichen vnd werntlichen vnd dorczu mit allen steten slossen vesten mercken dorffern Renten czinsen beten wisen welden holczen puschen struchen bergen talen weyden wassern wasserlewffen mulen visschereyen
Teichen wassern wasserlewffen mit voller vnd ganczer herschafft als der egenant vnser gnediger herre der kunig vnd der obgenant syn bruder daselbst bis vff dissen hutigen tag Innegehabt haben eyngegeben vnd vorschriben hat Also das wir die wyle wir
leben die obgeschriben lande stete vesten mercke vnd dorffere mit Iren czugehorungen haben halden vnd gerwlichen besiczen sullen vnd das auch daselbst lande stete slosse mercke vnd dorffer mit sampt den obgenant herczogthumen vnd landen czu Gorlicz vnd
czu luczemburg vnd der lantfogtey czu Elzassen noch vnserm tode ab wir an erben sturben an den egenant vnsern gnedigen herren den kunig syn erben vnd nochkomen kunig czu behem an allerley hindernisse vnd wedersprechen komen vnd gefallen sullen Als das
alles des egenant vnsers gnedigen herrn des kuniges maiestatbriue die er vns druber geben hat wol vssweysen vnd dorczu mit wolbedachtem mute vnd rechter wissen so globen wir dem egenant vnserm gnedigen herrn dem kunige bey guten truwen vnd an alles geuerde
das die egenant stete vnd vesten die er vns eyngeben hat alle die czeite vnd er lebet syne vnd syner amptlute In syner notdurffte offene slosse syn also das sie sich domite daruff vnd doreyn gen allermeniglichen behelffen mugen wenne vnd wie dicke In des
not geschiht doch an vnser mercklichen schaden Ouch so sullen wir keynerley amptlute burggrafen oder vogte von newes seczen es sey denn das sie In dorczu globen vnd sweren das sie noch vnserm tode ab wir an erben abgingen sich an den egenant vnsern
gnedigen herrn den kunig syne erben vnd nachkumen kunige czu behem vnd an nymand anders halden vnd In domite gewartende syn vnd In ouch die Irs offene vorsigelte briue geben als offte sich das geburt vnd des notdurfftig syn wirdet vnd dorczu
von sulcher guten willen wegen den der egenant vnser gnediger herre der kunig an vns hat so haben wir In an widerstatung mit wolbedachtem mute Rate vnser liben Edlen vnd getruwen die nochgeschriben vnser lande witnamen das furstenthum
vnd lande der marke czu brandemburg mit allen vnd iglichen synen herlickeyten bistumen graffschafften herren herschafften mannen manschafften lehen lehenschafften beyd geistlichen vnd werntlichen vnd dorczu mit allen steten slossen vesten
mercken dorffern Renten czinsen nuczen beten eckern pflantschafften ackern wisen welden puschen struchen bergen talen weyden wassern wasserlewffen visschereyen mulen bussen mit ganczer vnd voller
herschafft vnd allen Iren czugehorungen wie die genant oder wo die gelegen sind nichtes vssgenomen als wir dasselbe lande der marke czu brandemburg von dem Allerdurchluchtigsten fursten vnd herren her Sigmunden kunig czu vngern In vnserm liben vettern
vnd herren empfangen vnd vorschriben ist vnd in aller der massen als wir das Iczund Innehaben vnd besiczen vnd sunderlichen mit der kure vnd wale eynes Romisschen kuniges czukunfftig keysers vnd glicherweys das herczogthume vnd lande czu luczemburg das
vns von dem egenant vnserm gnedigen herrn dem kunig fur vns vnd vnsere erben tausend guldin guter swarer guldin In pfandweyse vorschriben ist mit der lantfogtey czu elsassen vnd besunder mit den vesten kaysersperg ammersweyr vnd munster vnd dorczu mit allen
vnd iglichen des egenant herczogthumes czu luczemburg herlickeyten graffschafften herren herschafften mannen manschafften lehen lehenschafften beyd geistlichen vnd werntlichen probtien eckern vnd dorczu mit allen steten slossen vesten mercken
dorffern Renten czinsen nuczen pflantschafften eckern wisen welden puschen struchen bergen talen weyden wassern wasserlewffen visschereyen mulen bussen vnd allen Iren czugehorungen wie die genant oder wo
die gelegen sind nichtes vssgenomen in aller der massen als wir dasselbe herczogthum vnd lande czu luczemburg vnd die lantfogtey czu elsassen Iczund Innehaben vnd besiczen vssgenomen die manschafft vnd lande czu merhern mit Iren czugehorungen
eyngeben vnd vorschriben eyngeben vnd vorschriben In das In massen die briue In sulcher massen wann wir an eliches leibes lehen erben von todes wegen sturben oder abgingen das denn die obgeschriben lande der marke czu brandemburg das herczogthume czu
luczemburg vnd die lantfogtey czu elsassen mit Iren czugehorungen vssgenomen die manschafft vnd lande czu merhern an den egenant vnsern herrn den kunig syn erben vnd nochkumen kunige czu behem lediglichen vnd an allerley hindernisse sterben vnd ge
fallen sullen vnd weres sachen das wir eynen sun oder mere mennliches geslechtes gewunnen vnd die bruder vns lissen so sal der egenant vnser herre der kunig vnd syn erben kunig czu behem derselben kinder vormunde syn vnd die gnediglichen vnd getrewlichen
vorwesen vnd vorsteen als lange bis das sie czu Iren Iaren kumen wenn ouch das geschiht das sie czu Iren Iaren kumen vnd mundig werden so muge er vnd syn erben In die vorgenant vormundschaft vnd lande halden ab sie wollen wolde aber der egenant vnser
herre der kunig vnd syn erben derselben vormundschaft nicht halden so mogen vnd sullen sie die obgenant vnser lande slosse stete mercke vnd dorffer mit Iren manschafft vnd allen andern Iren czugehorungen In vns widerrumen vnd vnsern kinden die
marggraffschafft czu brandemburg das herczogthum czu luczemburg mit sampt der lantfogtey czu elsassen vnd mit allen obgeschriben Iren czugehorungen an hindernisse wider geben Bessche es aber das wir tochter gewunnen wie vil der weren die sol
der egenant vnser gnediger herre der kunig vnd syn erben kunige czu behem bestaten vnd vssgeben noch dem als das furstlich wesen anczumet vnd sich geburet Ouch so sal diese vorschribunge vnschedlichen syn den hochgebornen fursten her wilhelmen
marggrafen czu meissen vnserm liben swager vnd der hochgeborn frawen Elzbethen syner gemahel vnser liben swester vnd Iren erben an sulcher geltsumme die In von vns vff dem lande der marke czu brandemburg vorschriben ist vnd was briue wir In drub(er)
geben haben die sullen stete vnd vnuerruckte In Iren krefften bleiben witurkunde dis briues vorsigelt mit vnserm anhangenden Ingesigel Geben czu prage noch cristes geburt dreiczenhundert Iar dornoch In dem siben vnd newnczigsten Iare
an sand dorothee tage