Wir Wilhelm von gotis gnadin marggraue czu missin lantgraue in doringin vnd pfaltzgraue czu Sachsin Bekennen offinlichin vor vns vns(er) erbin vnd nachkomen vnd thun
kund allen den die disin brieff sehin adir horen lesin Als der allirdurchluchtigste furste vnd herre er Wenczlaff Romischer konig czu allin czeitin merer des Reichs vnd konig
czu Behemen vnser liebir gnediger herre vns vnd der hochgeborn furstinnen frauwin Elizabeth marggraffinnen czu missin vns(er) elichin gemal czu einer widerstatunge vnd
ergetczunge etlicher vns(er) koste vnd czerunge die wir dem selbin vns(er)m gnedig(e)m herren dem konige in sinem dinste lange nachgethan habin sin hus vnd stat ctolberg mit
allin vnd iglichin iren czugehorungin wie die gnant sin vnd mit der manschafft czu ctolc vor czwei tusend schog gutir Behemischer grosschin prager muncze in pfande
ingeantwert vnd ingetan hat nach vszweisunge siner brieffe die er vns darobir hat gegebin das wir Wilhelm marggraue vnd vns(er) gemal vorgnant adir vnsers Wilhelms erbin
vnd nachkomen von vns(er)m hirren dem konige vnd der cronen czu Behemen die selbin hus vnd stat ctolberg mit iren czugehorungin vor die vorgnante summe geldis also czu
pfande innehabin vnd haldin sullin vnd wollin vnd vns(er)m gnedig(e)m herren dem konige vorgeschrebin vnd sinen erbin vnd nachkomen konigen vnd der cronen czu Behemen
vor die obingnante summe geldis damitte czulosunge siczen Also wann adir uff weliche czeit der selbe vns(er) gnedige herre der konig sine erbin adir nachkomen konige czu
Behemen vns Wilhelm marggrauen adir vns(er) gemal vorgeschrebin adir darnach vns(er)s Wilhelms erbin adir nachkomen die czwei tusend schog gutir Behemischir grosschin
prager muncze widergebin vnd beczalin So sullin wir vnd wollin ym die selbin hus vnd stat ctolberg mit allin obengeschrebin iren czugehorungin vnd in allir masse
also vns die geantwert sin widerentwortin ingebin vnd in der ledigheitin widerubirtretin ane alle widersprache vnd geferde Ouch sullin wir noch vns(er) erbin adir nach=
komen noch vns(er) amptlute von vns(er) wegin die lute vnd vndirsessin die czu dem selbin slosse czu ctolberg gehorin mit keinerleye vngewonlicher noch nuwer beswerun=
ge uffseczunge noch beten nicht beswerin noch beswerin angetun in deheinerleie wisin hie den czinse vnd rente die sie von aldir gegebin habin bliben lassin als
das hie des gnantin vns(er)s gnedig(e)m hirren des konigs amptlutin gewonlichin gewest ist Ouch so sal das selbe slos czu ctolberg alle die wile wir das so in pfandis
wise innehabin werdin vns(er)s gnedig(e)m hirren des konigs offin hus sin czu allin sinen krigin vnd notin also das er sich adir sine amptlute von siner wegin darin vnd dar
vs wider sine fihende behelffin mogin nimandis vszgenomen als offte vnd dicke ym des not sin wirdet doch ane vns vns(er) erbin vnd nachkomen schadin vnd habin
des czuorkunde vns(er) Ingesigel wissintlichin an disin brieff lassin hengin der gegebin ist czu Eger nach gotis geburte druczenhundirt Iar darnach in dem sebin vnd
nunczigisten Iare am nehistin dinstage nach vns(er) frauwin tage Natiuitatis