Ich heinrich von plawen bekenn vnd tun kunt offenlichen mit disem briefe allen den die In sehen oder horen lesen das Ich mich aller vnd
yglicher briefe recht vnd ansprach die Ich von vnd zu dem hochgebornen fursten vnd hern hrn Johansen seliger gedechtnisse Herczogen zu
Gorlicz oder seinen Erben oder Nachkomen von was sachen wegen das komen ist gehabt habe genczlichen vnd gar fur mich mein Erben vnd
tegliche hofgesinde vnd nyemand and(er) an geuerde verczigen habe vnd verczeihe mich ouch der in krafft dicz briefs vnd rechter wissen vnd
hab ouch gelobt vnd gelobe mit disem briefe bey meinen guten trewen an eydes stat an arg vnd an alles geuerde fur mich mein Erben vnd
tegliche hofgesinde das Ich den Allerdurchleuchtigisten fursten vnd heren hrn Wenczlaw romischen kunig zu allen zeiten merer des reichs vnd
kunig zu Behem meinen gnedigen hern seine lande noch lute noch Ire guter oder habe was das ist nichts vssgenomen an geuerde von solcher
obgenan(ten) briefe ansprach oder kenerley ander sachen wegen die sich bis uff disen tag als diser brieff gegeben ist verlawffen haben nichts
vssgenomen furbassmer weder angreiffen bekummern uffhalden noch beschedigen sol noch wil noch meine tegliche hoffgesinde beschedigen
lassen noch ymand der das tun wolde hulff rate hausen hofen oder stew dorczu tun in dheineweis an geuerde Sunder was mir der egen(ant)
mein gnedig(er) herre der kunig von der obgen(anten) hertzog hans seligen brime wegen Als verre die mich mein Erben oder tegliche hofgesinde
angeburen sprechen oder tun wirdet dor an sol ich mich genczlichen benugen lassen vnd do wider nicht reden oder tun in dheinweis Wann
Ich das zu seinen gnaden genczlich gegebe(n) vnd gesaczt habe vnd sol ouch vnd wil furbassmer von solicher verlawffen sachen wegen wider
den Egen(anten) meinen gnedigen hern den kunig seine lande noch sein lute nicht tun noch sein in dheinweis an geuerde Mit vrkunde dicz briefs
versigelt mit meim anhangendem Insigel vnd des zu eim grossern geczeugnisse habe Ich heinrichen von kusswade vnd hansen roder gebetn
das sie Ire Insigele an disen brieff habn gehangen vnd wir egen(anten) heinrich vnd hans bekennen das wir durch bete willen des vorgen(anten) von
plawen vnsere Insigele an disen brieff haben gehangen der geben ist zu prag nach Criste geburt drewczenhundert Jar vnd dornach in dem
Newndndnewnczigistem Jare An sant philipp vnd Jacobs tage