Wir Wenczlaw von gotes gnaden Romischer kunig zu allen czeiten merer des reichs vnd kunig zu Beheim Bekennen vnd
tun kunt offenlich mit disem briue allen den die jn sehen oder horen lesen das fur vns komen sind heinrich von Seydlitz anders vom
lasen vnd Janke vom Weleminß vnse Camrer vnd liben getrewen vnd baten vns mit diemutigem fleisse das wir jn einen brief
den wir jn vormals zu der czeit als wir in der Stat zu Wyenn waren vber das lantgeschoß in dem Weichpilde zu der Landshut
gegeben haben zubernewen zubesteten vnd zu confirmieren gnediclich geruchten derselbe brief von worte zu worte hernach
geschriben steet vnd lawt also Wir Wenczlaw von gotes gnaden Romischer kunig zu allen czeiten merer des reichs vnd
kunig zu beheim Bekennen vnd tun kunt offenlich mit disem briue allen den die jn sehen oder horen lesen das wir haben
angesechen nucze vnd stete dinste als vns heinrich von Seydlitz anders vom lasen vnd Janke von Weleminß vnse Camrer
vnd liben getrewen bis her vnuerdrossenlich getan haben vnd furbas tun sollen vnd mugen in kunftigen czeiten vnd habn
jn dorumb mit wolbedachtem mute gutem rate vnd rechter wissen das lantgeschoß in dem Weichpilde zu der Landshut gelegen
mit allen nuczen czinsen renten gefellen vnd zugehorungen gnediclichen gegeben vnd geben jn das in craft dicz briues vnd
kuniglicher macht zu beheim also das sie dasselbe lantgeschoß vf sant mertins tag der schierist kumpt anzuheben einnemen
vffheben vnd das von vnsern wegen jnnehaben vnd des geniessen vnd gebrawchen sollen vnd mugen in aller der masse als wir
das jerlichen einnemen vnd vffheben mochten vnd als wir es bis her jnnegehabt haben von allermennclich vngehindert Mit
vrkund dicz briues versigelt mit vnsm anhangundem jnsigel Geben zu Wienn nach criste geburt virczehenhundert jar
vnd dornach in dem dritten jare des nechsten freitags vor sant mertins tage vnser reiche des behemischen in dem eynvndvirczi
gistem vnd des romischen in dem acht vnd zwenczigistem jaren Des haben wir angesechen derselben heinrichs vnd Janken redliche
bete vnd ouch merkliche dinste die sie vns vormals getan haben teglich tun vnd furbas deste fleissiger tun sollen vnd mugen in kunftign
czeiten vnd haben jn dorumb mit wolbedachtem mute gutem rate vnd rechter wissen den obgeschriben brief gnediclich vnewet
bestetet vnd confirmeret vernewen besteten vnd confirmieren jn den in craft dicz briues vnd kuniglicher macht zu beheim also
das der egenant brief in allen vnd yglichen seinen clausulen puncten vnd meynungen als er dauor von wort zu worte geschribn
steet gancze vnd volle macht vnd craft haben solle von allermennclich vngehindert Mit vrkunt dicz briues versigelt mit
vnser kuniglichen maiestat jnsigel Geben zum Betler nach crists geburt virczehenhundert jar vnd dornach in dem funftn jare
An sant Siluesters des pabsts tage vnser reiche des behemischen in dem czwey vnd virczigisten vnd des romischen in dem newn
vnd zwenczigistem jaren
Ad mandatum d(omi)ni Regis
~w~ patriarcha Anth(iocenus) cancell(arius)