Wir Wenczlaw von gotes gnaden Romischer kunig zu allen czeiten merer des Reichs vnd kunig zu Behem Bekennen vnd tun kunt offenlich mit disem
brief allen den die In sehen oder horen lesen das fur vns komen ist Hannus forster pfleger zu Eger vnser liber getrewer vnd leyt vns fur Wie das
er das haws Neydek mit dem Stetlein darvnder gelegen vnd allen andern seinen zugehorungen das von vns vnd der Cronen zu Behem zulehen
geet vmb heinrichen von Neydek vns(er)n liben getrewen recht vnd redlichen vmb ein genante Sume geldes gekawft hette vnd bat vns mit demutigem
fleisse das wir Im dasselbe hawse Neydek mit dem Stetlein darvnder gelegen vnd allen and(er)n seinen zugehorungen zuuerleyhen gnediclichen
geruchten vnd Wann der egen(ant) heinrich von Neydek das egen(ant) haws Neydek mit seinen zugehorungen vns in vnsere hende als seinem naturlichen
Erbherrn mit seinen offen versigelten briefen vfgesagt vnd gelassen hat So haben Wir angesehen gneme dinst vnd trewe als vns die egen(ant) hanse
vnd auch heinrich von Neydek offte vnd dicke nutzlich vnd Williclich getan haben vnd furbas wol tun mogen vnd sollen in kunftigen czeiten vnd ha
ben dorumb mit wolbedachtem mute gutem Rate vnd rechter Wissen dem egen(ant) hansen forster das vorgen(ant) haws Neydek mit dem Stetlein
darvnder gelegen mit czollen gerichten kirchlehen czinlberken hemmern dorffern Eckern Wysen wassern Wasserleuffen gepegden Winnen
Weyden Welden czinsen Renten gulden nuczen gefellen vnd allen andern seinen zugehorungen wie man die mit sunderlichen worten be
nennen mag nichtes vsgenomen gnediclichen gelyhen vnd gereychet leyhen vnd Reichen Im die in craft ditz briefes vnd kuniglicher macht zu
Behem also das er vnd sein Erben dasselbe hawse Neydek mit allen vnd yglichen seinen zugehorungen woran die sint oder Wie man die mit
sunderlichen worten benennen mag nichtes vsgenomen von vns vnd der Cronen zu Behem zulehen haben halden besiczen vnd des genyessen
vnd gebrawchen sollen vnd mugen von allermeniclich vngehindert in aller masse rechten weyse gnaden vnd freyheiten als die der egen(ant)
heinrich vnd sein vorfarn von Neydek von vns vnd vns(er)n vorfarn kunigen vnd der Cronen zu Behem ynnegehabt vnd besessen haben
Vnschedlich doch vns an vns(er)n lehen vnd sust ydermanne an seinem rechten Auch so haben wir dem egen(ant) hansen forster mit wolbedach
tem mute vnd rechter Wissen erlawbt vnd gegunst Erlawben vnd gunen Im in craft ditz briefes vnd kuniglicher macht zu Behem von
besund(er)n vns(er)n gnaden das er der Ersamen Margrethen von Neydek seiner eelichen hawsfrawen vf dem egen(ant) hawse zu Neydek vnd
vnd dem Stetlein darvnder gelegen vnd allen andern seinen zugehorungen Tawsent guldein Rymisch zu morgengabe vnd leibgedinge
vmachen solle vnd moge das wir Ir auch mit rechter wissen in craft ditz briues zu morgengabe vnd leibgedinge gnediclichen gely
hen vnd gereicht haben ynnezuhaben zuhalden zu besiczen zugeniessen vnd zugebrawchen von allermeniclich vngehindert als lang
das Ir die vorgenan(ten) Tawsent Rymisch guldein gut am golde vnd swer an dem gewichte fur Ire morgengabe vnd leibgedinge als
vorgeschriben steet mit bereytem gelde genczlich vnd gar gerichtet vnd bezalet werden Vnschedlich doch vns an vns(er)n lehen als vorge
schriben steet vnd sust ydermann an seinem rechten mit vrkunt ditz briues vsigelt mit vns(er)r kuniglichen Maiestat Insigel Geben
zu Prage nach Cristi geburt Vierzechenhundert Iar vnd darnach in dem Czehenden Iare des Montags vor sant Elizabethen tage
Vns(er)r Reiche des Behemischen in dem Achtvndvirczigisten vnd des Romischen in dem funfvnddreissigisten Iaren
Per d(ominum) Conrad(um) Ep(iscopu)m olom(ucensem)
Johannes de Bamberg