Wir Frincz Riche etteswenn h(er)n Nyclas sun von Eger, Pyllunc, Chunrat von Leutmeritz, Chunrat gynochs, Mertein von Eger, Meynhart etteswenn h(er)n Wolframes sun, Seydel von dem Ayest,
Nyclas d(er) weizz, Hainreich vo(n) Toust, Johel etteswenn h(er)n Jacobes sun, Nyclas pozel, Nyclas buzlab, Wolfel von Posenpach, Wentzlab etteswenn h(er)n Albrechtes sun, vo(n) frentzel tousentmark, gesworn purge vn(d) schepfen
d(er) grozzen stat ze P(ra)g, bekennen dez vn(d) betzeugen daz mit disem gegenwurtige(n) priefe, daz Thomel etteswenn h(er)n Wolfleins vn(d) Dyetriches sunes sun, purge ze P(ra)g, mit sampt seinen geswistereiden, dez vor vns be
kant habe(n) offenleichen, daz sie mit rat vn(d) mit willen h(er)n Hainreiches etteswenn h(er)n Dietreiches sun, ires veteren irez vurmunden purges ze P(ra)g, vn(d) anderr irr vreunt, den erbege lewten Mertein dem Mulner vo(n)
Pern, vn(d) sinem sun Machen, iren erben vn(d) iren nachkumften, recht vn(d) redleich v(er)kouft haben zwo Mul pey P(ra)g, an d(er) Mulda, eyn Mul enseit d(er) Mulda i(n) dem Pygesd, mit dem Mulhovze vn(d) mit dem daz der zv
gehoret, vn(d) die and(er) Mul disseyt d(er) Mulda vmb Bdenia, mit dem daz zv d(er) selben Mul gehoret, als sie d(er) Puschk gehabet hat, vn(d) sie haben in die selben zwo Mul v(er)kouft zv deutszhem recht all(er) dinge also, daz die ge
nanten, Thomel vn(d) sein geswistereide, vn(d) ir vurmunde ir vet(er) d(er) gena(n)t h(er) Hainreich, vo(n) dem genante(n) Mertein vn(d) vo(n) dem genante(n) Machen, zum ersten, zv anlait enpfangen haben dreizzic schoc grozz p(ra)g(er) pfenninge
vn(d) daz die selben Mertein vn(d) Mach, nu an dem nechsten vnser r(er) vrowen tag als sie ze himel vur an ze heben, alle iar ewicleich, dem genanten Thomlein vn(d) sinen geswistereiden iren erben vn(d) iren nachkumften,
sie vn(d) ire erben vn(d) ir nachkumften, sechczehen schoc grozz p(ra)g(er) pfenninge, vo(n) den genante(n) zwain Mulen geben schulen ze Cinze, auf drei tage, dem iar, vumf schoc grozz mit zwaintzic grozze(n) auf vnserr vrowe(n)
tac als sie ze himel vur, vn(d) dar nach vumf schoc grozz mit zwaintzic grozzen auf Weynachten, vn(d) darnach ab(er) vumf schoc grozz mit zwaintzic grozzen auf sand Georgen tac, vn(d) also alle iar ewicleich auf die selbe(n) drei
tage i(n) d(er) gesprochenen weize die genanten sechczehen schoc cinzes zv v(er)richten, In Welchem Iar aber daz geschehe vurbaz von dem tag als dis(er) prief gegeben ist, zv kainem tag d(er) genanten dreier tag, daz d(er) Cinz d(er) auf den
tac gehoret, daz ist vumf schoc mit zwaintzic grozzen als gesprochen ist nicht gevielen, vn(d) sich daz nach d(er) vrist vierczehen tag v(er)zuge, so haben die genante(n) Thomel vn(d) sein geswistereide ir erbe vn(d) ir nachkumf
ten, vn(d) d(er) gena(n)t vurmunde, vn(d) w(er) in pey gestaet, daz recht, daz sie an gericht vn(d) an klag, vreileich i(n) den genante(n) zwain Mulen vn(d) i(n) den Mulhovze(n) d(er) selben Mulen pfenden schulen vmb den selben Cinz, daz ist
vmb vumf schoc grozz vn(d) vmb zwaintzic grozz vn(d) vmb einen vierdunc buzze, vn(d) ob sie da pfandes so swaer nicht bekomen mochten, vn(d) daz sich daz vurbaz die anden vierczehen tag v(er)zuge, vn(d) vngolten
dez selben Cinzes vn(d) d(er) gesprochenen buzze, so sint sie ab(er) eines vierdunges buzze bestanden, vn(d) ob denn ab(er) nach den selben anden vierczehen tagen die genante(n) Thomel vn(d) sein geswistereide, ir erben vn(d)
ir nachkumften, genugiges pfandes i(n) den genante(n) Mulen nicht bekomen mochten, vn(d) daz daz ab(er) bestunde vmb den Cinz vn(d) vmb die gesprochenen zwo buzze, die dritten vierczehen tage, so sint die genanten
Mertein vn(d) Mach ir erben vn(d) ir nachkumften, schuldic den dritten vierdunc ze buzze, also daz die genante(n) Thomel vn(d) sein geswistereide, ir erben vn(d) ir nachkumften vmb die vumf schoc grozz vnd vmb
zwaintzic grozz Cinzes, vn(d) vmb drei vierdung buzze i(n) den genante(n) Mulen pfenden schulen, Mochten sie ab(er) dar vmb genugiges pfandes nicht bekomen i(n) den genante(n) Mulen vn(d) i(n) den Mulhovzen, nach den
gesprochenen drein vierczehen tagen, daz ist nach den nechsten sechs wochen nach d(er) vrist, so schulen sich die genanten zwo Mul, mit allem rechte, vn(d) mit allem dem daz d(er) zv gehoret, wid(er) vallen haben an
die genante(n) an Thomlein vn(d) an sein geswistereide, an ir erben vn(d) an ir nachkumften, daz die genante(n) Mertein vn(d) Mach, ir erben vn(d) ir nachkumften, die genante(n) zwo Mul rowmen schulen, vnd kain
ansprach d(er) nach nimmer gehaben schulen, Die weil man ab(er) da dez genante(n) Cinzes, daz ist d(er) vorgenante(n) sechczehen schocke, alle iar i(n) d(er) gesprochenen weize, vo(n) den genante(n) vo(n) Mertein vn(d) vo(n) Machen,
vo(n) iren erben vn(d) vo(n) iren nachkumften, bekomen mac vn(d) bekumet, so mag sie niemant vo(n) den genante(n) zwain Mulen ab gestozzen mit kainem rechten, Jz schulen ouch die selben Mertein vn(d) Mach vn(d) ir
erben vn(d) ir nachkumften, selb(er) allez daz pezzen vn(d) v(er)richten, mit iren aigenen pfenningen vn(d) mit irr arweit, waz zv den genanten zwain Mulen gehoret, die Mulhewz, die Wure, die Prawe, die Rod, die eywer
wie iz allez gena(n)t ist, daz i(n) die zwo Mul vn(d) zv den zwaien Mulen gehoret, iz sei klain od(er) groz, Wan die genanten Thomel vn(d) sein geswistereide, ir vurmunde, ir erben vn(d) ir nachkumften da mit vurbaz an
kainen sachen, nichtez nicht schulen ze schaffen haben, denn daz d(er) gena(n)t Thomel vn(d) sein geswistereide, ir erben vn(d) ir nachkumften, alle iar dez gesprochenen Cinzes, vn(d) den gesprochenen gelubden, vo(n) den genante(n)
zwain Mulen gewarten schulen, Jz schulen ouch die genante(n) Mertein vn(d) Mach, ir erben vn(d) ir nachkumften, i(n) d(er) ayncn Mul die vnt(er) Bdenia gelegen ist, Thomlein dem genanten, seinen geswistereiden, iren erbe(n)
vn(d) iren nachkumften, alle iar zwai vether daz ist zwene potze mesten, die selben potze schulen ab(er) die selben Thomel, sein geswistereide, ir erben, vn(d) ir nachkumften, mit iren aigenen pfenningen selb(er) kouffen, vn(d)
ob die genante(n) Mertein vn(d) Mach, ir erbe od(er) ir nachkumften, an d(er) anden Mul i(n) dem Pygesd, icht pazzen wollen, mit mer Redan od(er) mit anden dingen, dez schol man in wol gunnen, vn(d) dar vmb schol man in den
gesprochenen Cinz nicht hohen, vn(d) ob sie die genante(n) zwo Mul v(er)kouffen wollen, daz mugen sie tun vnt(er) dem gesprochenen rechte, doch mit wizzen vn(d) mit willen dez genante(n) Thomleins vn(d) sin(er) geswistereide vn(d) dez
genante(n) vurmunde, od(er) irr erbe od(er) irr nachkumften, daz dem selben Thomlein vn(d) sinen geswistereiden, iren erbe(n) vn(d) iren nachkumften d(er) genante cinz icht ab gee, vn(d) in vngehindert beleibe, Wolt ab(er) d(er) selb(er) Tho
mel vn(d) sein geswistereide, ir erbe od(er) ir nachkumften, die genante(n) zwo Mul selb(er) an sich losen, als tewer als and(er) lewt dar vmb gebe(n) wolten, so schulen sie die nechsten dar zv sein, vn(d) zv ein(er) gewishait vn(d) zv ain(er) ewige(n)
stetikeit all(er) dis(er) dinge, habe(n) wir zv einem waren vrkunde vnserr stat Ingesigal geleget an disen prief, d(er) gegeben ist Nach Cristes geburt M(illesimo) drevzehenhundert iar, vn(d) dar nach i(n) dem dreizzigisten iar, ze Pfingesten.