Wir Sigmund von gotes gnaden Romischer künig czu allen zeyten merer des Richs vnd zu Vngern Dalmacien Croacien (et)c(etera) künig Bekennen vnd tun kund offenlich mit disem
brief allen den die In sehen oder horen lesen Wann der Allerdurchluchtigiste furste vnd h(er)re her karl seliger gedechtnusse etwenn Romischer keyser vnser lieber h(er)re
vnd vatter dem Edeln Thymen von Colditz Czweihundert gulde(n) geldes verschriben vnd gegeben hatte vff vnsern Juden vnd Camerknechten zu Nürmberg gesessen
alle Jare vffzuheben vnd Inzunemen Als das in desselben vnsers vaters brieuen wol begriffen was vnd wann dornach der Allerdurchluchtigiste furste her wenczlaw Ro
mischer künig vnser lieber Bruder den Edeln Sigmundten von Colditz seligen vnd sinem Bruder dieselben Czweihundert gulde(n) Nürmberg(er) werung vff den egenan(ten) Juden ouch
verschriben vnd gegeben hat Als das in siner maiestatbrieue doruber gemach(t) der vns ouch furbracht ist eigentlich begriffen ist vnd wann nu fur vns komen ist der Edel
Albrecht von Colditz des vorgenan(ten) Sigmunds Bruder vnd vns diemutiglich gebeten hat daz wir Im die vorgenan(ten) verschribung vnd gebunge der vorgenan(ten) Czweyhunderte
gulde(n) czu u(er)newen vnd zu bestettigen vnd die ouch von newes czugeben gnediclich geruchten Des haben wir angeschen solich sin redelich bete vnd ouch willig truwe vnd
anneme dienste die der obgenan(te) Thyme sin vatter selig dem vorgenan(ten) vns(er)m lieben h(er)ren vnd vatter keyser karl vnd der vorgenan(te) Sigmund vnd Albrecht dem vorgenan(ten)
vns(er)m Bruder vnd dem heiligen Rich oft vnd dicke getan haben vnd derselb Albrecht vns vnd dem Rich furbasz tun sol vnd mag in kunftigen zeyten vnd haben Im
darumb mit wolbedachtem mute gutem Rate vnd rechter wissen die vorgenan(ten) Czweihundert gulde(n) Nürmberger werung vff den vorgenan(ten) vnsern Juden von den czinsen
die Sy vns Jarlich pflichtig sin gnediclich bestetigt vnd von newes gegeben bestetigen vnd geben Im die in kraft disz briefs vnd Romischer küniglicher maht Also daz
Er dieselben Czweihundert gulde(n) Nürmberger werung von den egenan(ten) Juden zu Nürmberg nemen vnd vffheben sol vnd mag von allermenglich vngehindert vnd gebieten dorub(er)
den Juden vnsern Camerknechten gesessen zu Nürmberg ernstlich vnd vestiglich by vnsern vnd des Richs hulden daz Sy dem egenan(ten) Albrechten von Colditz dieselben Czwey
hundert gulde(n) Nürmberg(er) werung alle Jar richten vnd bezalen an sumnisse vnd widerrede uf solich tage als das gewonlich ist vnd Sy vns pflichtig sin vnd gebieten ouch
den Burgermeistern Rate vnd Burgern gemenlich der Stat zu Nürmberg vnsern vnd des Richs lieben getruen ernstlich mit disem brief daz Sy die egenan(ten) Juden vnser
Camerknechte daran halden vnd weisen daz Sy dem egenan(ten) Albrechten solich czweihundert gulde(n) alle Jar richten vnd bezalen on alles vzziehen vnd sumnisse an vrkund
disz briefs versigelt mit vnser küniglicher maiestat Insigel Geben zu prespurg Nach Cristi geburt vierzehnhundert Jar dornach in dem Eylften Jare des nechstn sampz
tags nach sant Gally tag vnser Riche des Vngerischen (et)c(etera) in dem vierundczweinczigisten vnd des Romischen in dem Andern Jaren
Ad mandatum domini Regis
Johes kirchen