WIr Anthonis van gotz gnaden herczoge zu lothr(ingen) zu Brabant vnd zu lemborch Marggreffe des heylige(n) Riches vnd Elizabeth herczoginne
der selber herczogdom vnd marggreffinne des marggrefftaff bingen / Důn kont allen luden vnd erkennen mit deßen offenen brieue
also als der alledurchluchtigesten hochgeborn furste vnse liebe gnedige h(er)re der Romischer vnd Behemische kunig vns sin h(er)czogdom
van luczemb(ur)ch vnd grefftaff van chiny jngegebn vnd vnschriben hait als die brieffe dar vmb vß clerlich(er) jnnehalden
Jn welch(e)n brieuen er schribet vnd gebiet allen platen greffin frihen h(er)ren Ritt(er)n knechten steden vnd allen andern vndersessen
des selben h(er)czogdomps vnd grefftaff daz sy vns vnd vns(er)n erben eyde vnd huldunge důn macht jnhalt der selber brieue
So haent vns die erbarn vns(er)n lieben getruwen Richte(r) Scheffin vnd gemeynde der stat zu diedenhoven eyde vnd geloeffte
gedaen getruwe vnd hult zu sin macht jnhalt der v(or)gen(anten) brieffe / Welche eyde vnd geloeffte wir ouch also van jn vffgenomen
haben vnd ensullen noch enmugen wir noch vns(er) erben sy naechmaels mit worte(n) anlangen daz sy vns eyniche and(er) eyde
noch geloeffte gedůn habn an keinen wyse dan naest jnhalden der v(or)gen(anten) brieffe vnd de turkunde hain wir vnse jngesiegel
an deßen brieff důn hangen Gegebn zu luczemb(ur)ch xxvij dage jn aprille jnt jair vns h(er)ren dusent vierh(undert) vnd eylffe

(Et) p(er) d(omi)n(u)m meu(m) Ducem et
d(omi)nam mea(m) Ducissam

m(agister) R. de Ronsel