W(ir) Jan Hanowecz von Swanberg Wilhelm von Zluticz Zdenko Drssaka vnd Burian von Gutstein Bekennen vnd tun kunt offenbar mit disem briue Allen
den die in sehen oder horen lesen Als der Allerdurleuchtigste furst vnd her her Sigmund Romischer kunig zu allen zeyten merer des Reichs vnd zu
Ungern vnd zu Behem (et)c(etera) kunig vnser gnediger lieber her vns vnd disen nachgeschriben Rittern vnd knechten Ein guldin vorspang mit eynem
grossen dyamant mit zweyen Rubin vnd einer grossen perl versaczt hat vmb ein Summa guldin die sein gnad vns nachgeschriben schuldig
beliben ist vnd gelobt hat auff weyhnachten nechstkunfftig zu bezalen / ant namen Crussina von Swanberg Achtzhundert vnd czweinczig Remisch
guldin / Hanowecz zweytausent Sibenhundert vnd czweinczig Remisch guldin / Wilhelmen von Zluticz Sechshundert achtzig vnd drithalben Remisch
guldin / Balhoth Sibenhundert funfvndsechczig Remisch guldin / Burckart von Colobrat Sibenhundert vnd funfvndsechczig Remisch guldin / Burian
Tausent zweyhundert vnd Neunczig Remisch guldin / Bohusslaw von Janowicz Achtzhundert funfvnddreissig Remisch guldin / Drsska dreytausent drey=
hundert vnd dreyvnddreyssig Remisch guldin / Drsslaw hundert Sibenundvirczig Remisch guldin / Jwan von Buben zweyhundert Newnczig vnd drit=
halb Remisch guldin / Czakta vierhundert vnd funfczig Remisch guldin / Wilhelm Bukowina hundert vnd achczig Remisch guldin / Benesse von Nedrazicz
hundert vnd funfvndczweinczig Remisch guldin / lapota Sibenhundert vnd czweinczig Remisch guldin / Bohussae von Stycha czweyhundert vnd Sech=
czig Remisch guldin / Also globen wir seinen gnaden bey vnsern guten trewen vnd eren daz wir die vorgen(anten) vorspang von E(n)drezich zito ko(n)freinb(er)g
vor weyhennachten nechst kunfftig nicht vordern noch nemen sollen in dhein weiss / Were aber daz sein gnad daz egenan(te) gelt vns vnd den
vorgenan(ten) Herren Rittern vnd knechten nicht bezalten vnd daz wir die egenan(ten) vorspang nach der e(r)sten zeyt zu vnsern henden nemen vnd
vnder Cristen oder Juden versetzen musten Als vns daz zutun sein gnad maht mit seinem briue gegeben hat So sollen wir sy nicht hoher
versetzen oder verpfenden / dann allein vmb die e(r)sten Summe guldin doch on vnsern schaden vnd wir sollen daz seinen gnaden zuwissen tun daz
sein gnad wisse djeselbe vorspang zu vinden woo Er sey wider losen sol / Alles arglist vnd geuerde genczlich aussgescheyden vnd des zu vrkund
haben wir vorgen(anten) alle vier vnser eygne Insigel tun hangen an disen briue dergeben ist zu Nurenberg nach Cristi geburt vierzehenhundert Jar vnd
dornach in dem zweyvndzweinczigisten Jar am nechsten Suntag nach vnser lieben frawen tag Natiuitat(is)