Wir Sigmunt von gotes gnaden Romischer keiser zuallenzeiten Merer des Reichs vnd zu Hungern zu Behem Dalmacien Croacien (et)c(etera) kunig Bekennen fur vns vnd vnser nachkomen kunig zu
Behem mit disem brief allen den die In sehen oder horen lesen Wann wir angesehen vnd gnediglich betracht haben solich angeneme vnd getrue dinste die vns der Edel Caspar Slik ritter pfleger zu Eger vnd zum Elpogen vnser
Canzler vnd lieber getruer von Jugent vff on vnderlas nachfolgend vns vnd der Cron zu Behem gar nuczlich vnd vnuerdrossenlich getan hat das wir Im vmb solicher dinst vnd trewe willen die allhie alle vsszuschreiben vil
zulang were vnd ouch nit notturft wann das landkundig ist grosser gnad vnd furderung pflichtig sein Vnd dorumb vnd ouch vmb sunderlicher lieb vnd zuneygung willen die wir zu Im haben Vnd zu seinen eren vnd vfnemen sun
derlich gnaig sind So haben wir dem egenan(ten) Caspar seinen erben vnd nachkomen vnser gut zur liechtenstat in Elpogner kreisse gelegen das wir von dem Ersamen vnd geistlichen Tagko abbt vnd seinem Conuent des closters
zur Topl vnsern lieben Andechtigen vmb ein merkliche Sum geldes redlich gekoufft vnd sy dorumb benuget haben vnd das wir Im vormals mit dem Elpogen verpfendet hetten nu furbas mit allen vnd iglichen seinen ackerken
dorffern gerichten allerley Ercze es sey czin eysen oder anders hofen leutten eckern gepawte vnd vngepawte wassern teichen mulen welden puschen geyeyden vischereien lehen geistlichen vnd werntlichen gebieten czin
sen renten pussen vnd fellen vnd allen andern zugehorungen nichts vsgenomen wie man die mit sundern worten benennen mag nach lautt des koufbriefs den wir von dem egenan(ten) Abbt vnd seinem Conuent doruber
haben gnediglich gegeben vnd In damit begabt vnd geben In das wissentlich in krafft dis briefs vns kuniglicher maht zu Behem Also das der egenant Caspar sein erben vnd nachkomen dasselb gut zur liechtenstat
mit allen seinen zugehorungen als oben stat furbas erblich vnd zu ewigen zeiten besiczen des gebrauchen vnd geniessen sollen vnd mogen von vns vnsern nachkomen vnd den vnsern vnd allermenniglich vngehindert
Vnd ob sy es furbas verkauffen verseczen oder sust verendern wolten andern leutten nach Ir notturfft des sollen sy vollen gewalt haben Ouch tun wir In dise besunder gnad das der egenan(t) Caspar sein erben
vnd nachkomen ouch sein leutt vnd guter zu der liechtenstat vnd aller seiner zugehorung gancz frey sein vnd nyndert zugericht steen sollen sunder wer mit In zuschaffen hat der sol das in dem gericht tun zur
liechtenstat Sy sollen ouch herfart vnd aller ander dienste anlege stewr bete vnd beswerung frey vnd ledig sein vnd vnser Burggrauen zum Elbogen vnd all ander Amptleutte die in zeiten sein werden
sollen vber sy nicht zugebieten noch mit In zuschaffen haben Sy mogen ouch vff den selben gutern Juden halden zu Irem geniesse vnd allen weltlichen pass nach Ir notturfft vffrichten vnd machen on meniglichs
hindernus vnd Irrunge Vnd so wir oder vnser nachkomen den Elbogen losen wollen So sollen wir In die gancze Sume in Iren brieuen begriffen vor ausrichten vnd als dann so sollen sy vns des sloss mit seiner
zugehorungen abtreten on die liechtenstat die sollen sy erblich behalten als wir In dann die mit disem brieff gegeben haben Vnd wir gebieten dorumb allen der Cron zu Behem Amptleutten vnd vndertane(n)
vnd sunderlich vnsern Burggrauen lantrichter vnd andern zum Elbogen vnd in dem kreisse in welichen wirden oder wesen die sein ernstlich vnd bestatlich mit disem brieff das sy die egenan(ten) Caspar sein
erben vnd nachkomen an solichen vnsern gnaden vnd freiheiten nicht hindern noch In dorin spreche(n) in dhein weis Wer aber doruber tet vnd sy hindert oder besweret der sol hundert mark lotigs
silbers alsofft das geschiht verfallen sein halb der kuniglichen Camer vnd halb dem egenan(ten) Caspar vnd sein nachkomen vnleslich zubeczalen Vnd wer disen brief mit des egenan(ten) Caspars guten willen
kuntlich vnd wissentlich ynnehaben wirt der sol alle recht haben an dem obgenan(ten) gut als er selber Mit vrkund dis briefs besigelt mit vnser keiserlichen Maiestat Insigel Geben zu Eger Nach Cristi
gepurd vierzehenhundert Jar vnd dornach in dem Siben vnd drissigstem Jare am sandt peters tag ad Vincula Vnserer Reiche des hungrischen in dem Einvndfunffczigsten des Romischen Im Acht
vndczweinczigsten des Behemischen Im Achtzehenden vnd des keisertumbs Im funfften Jaren
Ad mandatum domini Imperatoris
Geruasius secretarius