Wir Albrecht von gotes gnaden Romischer kunig zu allen czeiten merer des reichs zu Hungern zu Behem Dalmacien Croacien etc(etera) kunig Herczog zu Osterreich zu Steyr zu Kernden vnd zu Krain Marggraue zu Merhern vnd Graue zu Tirol Bekennen vnd tun kunt offenlich mit dem brief allen den die in sehen oder horen lesen das wir angesehen haben die getrewen nuczlichen dienst die vns der Erber vnser lieber getrewer Hanns von der Eger vnser diener vnd keller zu Eger vns vnd dem heiligen reich vnd der Cron zu Behem in manigfaltig weis dick getan hat vnd noch tun sol vnd mag vnd haben im darumb von vnsern kuniglichen gnaden mit wolbedachtem mut gutem zeitigem rat vnd rechtem wissen verlihen vnd leihen im auch in craft dicz briefs also das er die czehen schock groschen jerlicher gult die er auf dem dorff zu dem Trefen in Egerer gerichte gelegen hat vnd die von dem reich vnd der Cron zu Behem zu lehen ruren die er auch von vnserm lieben herren vnd swaher kaiser Sigmund seliger gedechtnus zu lehen empfangen hat nach laut der lehenbrieue die er darumb hat nun furpas sein lebenlang haben nuczen vnd niessen sol vnd mag an meniglichs irrung vnd hindernus Doch also das er vns vnd vnsern nachkomen an dem reich vnd der Cron zu Behem die weil er lebt gewarttig vnd getrew sein sol als ander vnser lehenleut vnd nach seim abgang sullen die selben czehen schock groschen jerlicher gult auf dem vorgenanten dorff zu dem Trefen an vns vnd vnser nachkomen an dem reich vnd der Cron zu Behem ledigclich gefallen vnd geledigt sein an alles widerreden Mit vrkund dicz briefs versigelt mit vnserm kuniglichen anhangenden insigel Geben zu Eger an sand Margreten tag der heiligen Junckfrawen Nach Cristi geburd vierczehenhundert vnd in dem newnvnddreissigisten vnsers reichs in dem andern Jare

Ad mandatum domini Regis

Caspar Slik Cancellarius

C(ommissio) d(omini) R(egis) p(er) d(ominum) Cancellarium

Mich(ael) de P(ra)ga