W(ir) Elizabeth von gotes genaden küniginn ze Vngern Dalmacien Croacien (et)c(etera) Erbe des künigreichs
zu Behem Herczoginn zu Osterreich zu Steir vnd Marggrafinn zu Merhern (et)c(etera) Bekennen vnd tun kundt offenleichen
mit dem brief allen den er furkumbt vnd geczaiget wirt . Das wir gütleich angesehen vnd betracht haben sollich trew willig
vnd stete dienst die der Edl vns lieber getrewe Albrecht von Coldicz vns haubtman der furstentümb Sweidnicz vnd Jawr (et)c(etera)
weilend den Allerdurleuchtigisten fursten vnd herren hern Sigmunden Römischen kayser (et)c(etera) vnserm lieben vater vnd vnserm
lieben herrn vnd Gemahel künig Albrechten auch Römischen vnd ze Vngern (et)c(etera) Behem (et)c(etera) künig lobleicher gedächtnüss darnach
vns vnd vnserm lieben Sün künig Lasslaben willichleichen vnd trewleich Beweiset vnd getan hat . vnd nü furbazer in künfftign
zeiten tün mag vnd sol . vnd darumb haben wir demselben Albrechtn von Coldicz durch solher seiner dienst willen . Hannsen
seinem Vetern vnd Thymen von Coldicz seinem Sün vnd Iren Erben mit gütem Rate vnd wolgedachtem müt genediclich(e)n v(er)sch(r)ib(e)n
v(er)schriben auf dy vorgenan(ten) vns(er) lannd die er von vnsern wegen Innehat als vns(er) getrewe Ambtman Zway Tausent guld(en)
in gold vnd verschreiben In auch das wissentleichen In krafft dicz briefs Doch Insolher beschaidenhait ist sach das wir In sein
geuenkchnüss gen Indreuthen von der Ostrig an schaczung frey ledig vnd los machen das er vnd sein burgel furbasser
vngemant beleiben So sol er vns an der obgenanten Sum(m)a der Zway Tausent gulden Ingold abslaben vnd abgeen
lassen funff hundert gulden Ingold . Wär aber sache das wir das nicht tün mochten vnd das er seiner venkchnüss erlediget
wurde So sol er vnd die seinen als oben begriffen ist der Zway Tausent gulden gancze erfullung vnd volkomen(e) nuczunge
haben getrewleich vnd vngeuerleich Mit vrkúndt des briefs versigelt wissentlich mit vnserm anhangend(e)n Insigel Der
Geben ist zu Presspurg an nagstn Suntag vor sand Margrethen tag Nach Cristi gepürdt Tausent vierhundert vnd darnach
In dem ain vnd virczigisten Jare .