Ich hans honinger von Zeberg Ritter mein ewirtin vnd alle mein erben vnd abnemen bekennen vnd tun kunt offenlich mit disem brife vor
allermenniclichen die jn sehen ader horen lesen das wir mit wolbedachtem mute guten aigen willen vnd rechter wissen dem edeln
Herren vnd gestrengen ritter Herren Mathes Slik von losan diezeit Burggrauen ainn Elbogen frawen kunigunden seiner elichen
gemahel allen seinen erben vnd wer den brife mit jren guten willen jnnenhat vnd weiset redlich vnd recht ewiclich vorkauft haben
mit craft diß briefs vnser Sloß vnd Stat Neydek mit manschafft allen eren nuczen zinsen renten vellen mit sampt dem kirchenle
hen vnd allen andern geistlichen vnd werltlichen lehen die darzu gehoren mit allen Czinwarken welden puschen gehulze holzen eckern
gewen vnd grawen mit allen wassern wasserleuffen vnd feyffen mit allen teyen vnd teychen als weit vnd prait das vmbgriffen
vnd vmb fangen hat vnd mit allen fruchten vnd nuczperkeiten vnder der erden vnd oben der erden die jczund do sein ader in kunftigen
czeiten aldo werden mochten besucht vnd vnbesucht mit gewarden vnd allen andern herlichkaiten freihaiten vnd gerechtikaiten
briefen vnd hantfesten die daruber halden vnd mit allen andern zugehorungen nichts dauon genomen noch hindan gesaczt in aller
der masse als das von hans koppen auf Caspar von Tettau vnd von Caspar von Tettau auf mich genanten hans honinger
herkomen ist vnd jnnengehabt haben vmb ein Summe geldes darumb sie vns vnsern willen vnd genuge gemacht haben
mit jnhaldung irs brieffs Czu den egenanten gutern vnd allen jren zugehorungen wir noch jmandes von vnsern wegen
furpas kain zuspruche forderung noch rechtens mere haben noch haben schullen weder mit bosen worten wercken gerichten
rechten geystlichen ader werltlichen heimlich ader offenbare in kainer weise Sunder sy die ledigen vnd entweren vnd die
lehen in ir hant bringen schullen als des landes gewonheit vnd recht ist on arg vnd on allen jren schaden was sie auch des
von mochten werung wegen geltschede schaden nemen an Cristen ader an Judn wie vnd in welcher weise das geschecht
iren slechten worten darumb zugelauben on aide vnd on alle ander beweisung der schullen vnd mugen sie sich erholen vnd
haben an vns vnd an allen vnsern gutern vnd habe varende vnd vnvarende vnd vnsern armleuten wo wir die haben wie
die mit namen gehaissen sein on gericht vnd on alle notterdung als erfordert vnd erclagt vor allen geistlichen vnd werlt
lichen gerichten vnd richter von vns vnd allermenniclichen doran vngehindert doran wir auch nicht genissen schullen
kaines glaites ader freiung noch kainerley andern furbe in kainer weise des zu vrkunde vnd waren bekentnisse hab ich
obgenanter hans honinger mein jnsigel gehangen an disen brife des sein gebeten geczeugen die erbern vesten Ott von
Sparneck vnd pauls Sparnecker mein libe Sweger die ir jnsigel von bete wegen zu geczeugnisse auch doran haben
gehangen jn vnd jren erben on schaden Gegeben ist nach Cristi geburt virczehenhundert jar vnd dornach in dem
sechsundvirczigisten jare an sant peters tage stulfeyr