Ich Jörg von der Veltz Ritter Herr daselbs Bekenn und tun kunt mit dem brief Als mir der allerdurchleuchtigist furst künig lasslaw zu hung(er)n
zu Behem (et)c(etera) künig Hertzog zu osterreich und zu lutzemburg Marggraue zu Merhern und Graf zu thirny (et)c(etera) das Sloss zu der New(e)n
sitzen Veltz die herschafft und Slos frowland und das Bamyrampt in dem Hertzogtumb lutzemburg mit allen den Rechten so zu Ir
yeglichem gehörich ist und von dem Hertzogtumb lutzemburg zulehen rurent als Herr und hertzog daselbs zu lutzemburg gnädiglich
verlihen hat als seiner gnaden lehenbrief darumb ausgangen Innhalt Das Ich gelobt gesworn und verhaissen hab gelob ver=
heis und swer bey meinen trewen und ayd in krafft des briefs fur mich und mein erben Das wir dem vorgenanten unnserm
gnädigen herrn künig lasslawen und seinen erben getrew und gehorsam und seinen gnaden und seiner gnaden erben und nachkomen
künigen zu Behem hilfleuth zusein wider allermeniglich Iren frumen trachten und Iren schaden wenden In auch das vorgenant
Bamyrampt verdienen verweisen und dauon tun auch mit den Slossern gehorsam sein sullen und wellen als getrew lehenslewt
Iren lehenherrn von Rechtens oder gewonhait wegen zutun phlichtig sind und mit loblichen gewonhaiten von alter herkomen ist
getrewlich und ungeuerlich Mit urkunt des briefs Besigelten mit meinem anhangunden Insigil des sein gezeugen
durch meiner fleissigen pet willen die Edeln Berhart Herr zu Wyls und berwart von Wyle mein leue neuen und frewnd
auch mit Iren anhangunden Insigeln Geben zu prag an Sambstag nach sannd Endres tag des heiligen Zwelffpoten Nach
kristi gepurd im viertzehenhundert und drewundfunftzigisten Jare