Wlaſſlaw von gottes gnaden zu Hungern zu Behem Dalmacien Croacien (et)c(etera) Kúnig Herczog zu Oſterreich vnd
zu luczemburg Marggraue zu Merhern an einem Vnd wir Johanne vnd Albrecht gebrúder Marggrauen zu Brand(en)
burg vnd Burggrauen zu Nůrnberg anders tails Bekennen vnd thun kůnt offenlich mit dem brieff Das wir
vns baiderſeit miteinander geaynet vnd vertragen haben Ob wir von beyden tailen icht ſpruch oder fordrung zuſamen
hetten vmb was ſachen das wer daz wir vns dorumb einer von dem andern eins fruntlichen gleichn billichen rechten
zunemen vnd zugeben benůgen laſſen ſullen vnd wellen vor vnſer beyder Reten zu gleicher zal nach alten verſchrei
bung zwiſchen der Crone zu Behem vnd des Burggrafſthumbs zu Nůrnberg on argeliſt vnd on alles geuerde.
Des zu Vrkunt haben wir obgenant kúnig laſſlaw vnſer Inſigel fur vns vnd vnſer Crone zu Behem Vnd wir
Marggraff Albrecht vnſer Inſigel fúr vns vnd dem genanten vnſern liebn Bruder Marggraff Johannſen an diſen
briue thůn hencken Des wir vns Marggraff Johanne obgenant kreftiglich hieran mitgebrauchn Gebn zu Prage
an Sandt Johanns tag ante portam latinam nach Criſti gebúrt vierczehen hundert vnd darnach in dem vier vnd
fumfczigſten Jare Vnſerr Reich des hungriſchn im vierczehenden vnd des Behemiſchen Jm erſten Jaren