Von gotes genaden wir Johanns vnd Albrecht Gebrudere Marggrauen zu Brandburg vnd burggrauen zu Nurenberg bekennen vnd thun
kunt offenlich mit dembrieffe allen den die Ine sehen horen oder lesen Wann sich der durchleuchtigst vnd hochgeborn furste h(err) lasslaw zu hungern zu
Beheim Dalmacien Croacien ir(e) konig Herczog zu Osterreich vnd Marggraue zu Merhern vnser gnediger herre vnd oheim fur sich sein Erben vnd
nachkomen konige zu beheim ewigclich bej seinen worten vnd trewen an Eides stat verschriben vnd verbunden hat Das sie vns vnd vnsern Erben
mit aller Irer macht beygestendig vnd beholffen sein sullen vnd wollen wider allermeniglich die vns an vnsern Erben pfanden guten herschefften
wildpennen Geleiten zollen lantgerichten vnd herrlichkeiten die wir yczunt Innehaben oder furbas mer gekawffen oder zu saczung pfande od(er)
sunst In dheinerlej weise erlangten hindern beschedigen oder vns derselben In einicherlej weise entwern wolten Als In dem brieue den wir darub
von seinen gnaden haben volkomenlicher begriffen ist Dauon So verschreiben vnd verbinden wir vns widerumb mit wolbedachtem mute vnd
rechter wissen Bej vnsern furstenlichen Eren vnd trewen an eides stat In kraft disss briefs fur vns vnd vnser Erben Das wir dem obg(e)n(an)ten vnsern
gnedigen h(er)ren konig lasslaw seinen Erben vnd Nachkomen konigen zu beheim mit ganzen steten trewen beigestendig vnd beholffen sein sullen
vnd wollen mit aller vnser macht wider allermeniglich die sie an Iren Erben pfanden guten herschaften wildpennen Geleiten zollen vnd
herrlichkeiten die sein gnade yczunt Innehat oder furbas mer gekauffen oder zu saczung pfande oder sust In dheine weise erlangte hindern
entweren oder beschedigen wolte Niemant ausszunemen one das heilige Reiche vnd seine vormunden Romische keiser vnd konige Es were dann
das sie Ine an Iren guten Erben pfanden herschaften vnd herrlichkeiten gewalt thun wolten So sullen vnd wollen wir Ine wider solichen gewalt
beholffen sein one geuerde In der mass als dauor vnd hernach begriffen ist vnd bey namen Sollen vnd wollen wir Ine derselben hilff verpunden
vnd pflichtig sein Alwegen biss das alle dieselben pfand mit barem gelde oder sunst mit Irem guten willen von Ine bracht vnd gelediget
werden vnd auch sunst alsofft die zu sicherung Ires Erbes guts vnd herschafft des bedurffen Wir sullen vnd wollen auch In derselben hilff berait
sein nach der zeit vnd wir oder vnsere Amptleute des ermant werden Inwendig vier ganczer wochen vnuerzogenlich vnd on alles geuerde Were
aber das der hilff ee not wurde So sullen wir auch darzu dester endlicher mit vnser macht berait sein one geuerde Vnd des zu warem vrkunde
Haben wir Marggraf Albrecht obg(e)n(an)t vnser Insigel fur vns vnd den guten vnsern Bruder Marggraf Johannsen an disen brieue thun henckn
Der Geben ist zu prag am dinstag Nach dem Sontag Misericordia dominj Nach Cristi vnsers h(er)ren gepurt Vierzechenhundert
vnd In dem Vierundfunffczigsten Jaren