Wir die Burgermeiste(r) vnd der Rate zu Eger bekennen vnd tun kunt offenbare mit disem briefe allermenglich Das uff hute
datu(m) diß brieffe fur vns in vnsern sitzenden Rate komen vnd erschinen sint die Edeln Strengen vnd Wolergelerten her przibuk von
Clena her heinrich herre zu Gerawthe her Johan vom Rabenstein Ritter vnd her Gregorie haimburg lerer in geistlichen vnd Wertliche(n)
rechten die sagten vnd erzalten fur vns durch montlich ußsprechnunge des vorgenanten hern Gregorie lerers w(i)e das sie Als macht
botten von dem allerdurchluchtigsten fursten vnd h(er)ren hern lasslawe konig in hungern in behem Dalmacien Croacien (et)c(etera) hertzogen
In Osterrich In lutzemburg vnd marggrauen In merhern vns(er)m allergnedigsten lieben herren In einem rechtstag fur dem hoch
gebornen fursten vnd h(er)ren h(er)n ludwigen pfaltzgrauen by Ryme hertzogen In nydern vnd obern beyern vns(er)m gnedigen lieben
h(er)ren uff sant Remigien tag nehstv(er)gangen In vnser statt nach lute des Compromiß brieffe daruber sagende zu leisten ußge
fertiget komen vff den selben sant Remigien tag alher In vnser statt by vns(er)m Burgmeister vnd etlichen vns(er)n Ratsfrunden
gewest sint vnd desselben rechtdags also biß uff hute datu(m) diß brieffe In vnser statt wartende geharret haben Darumbe so begerte(n)
sie an vns bittende Jne semlichs Jres erschinens fur vns vnd vns(er)n Ratsfrunden gescheen ein beschriben vnd versiegelt kuntschafft
Zu geben want nu Wir dem obgen(an)ten vns(er)m allergnedigsten lieben h(er)ren konig ladislao vnd siner koniglichen gnaden vorschrib(e)n(en)
Machtbotten Willige dinste In gantzer vndertenigkeit flissig sint zu beweisen darzu auch sunderlich als Wole billich ist sint
geneiget so ferre vns Insteet die Warheit zu furdern Darumbe so veriehen vnd bekennen Wir vns offenlich mit disem briefe Sagen
auch das In massen Wir ein Warheit billich sagen sullen Das Claus konig vnser burgmeister Conrat Eger Niclaus zum Mure
vnd friderich feutze vnse(r) Altemeiste(r) vnd Claus boehm vnser Ratsfrunt vns furbracht vnd uff Jre eydt sie vns dem Rate
getan gesagt haben Das die obgen(an)ten her przibuk von Clenaue her heinrich her zu Geraue vnd her Johan vom Rabenstey(n)
uff sant Remigien tag nehstv(er)gangen In vnser statt In der offenn(en) herbergen zum Spiegel genant fur Jne gestanden sint
vnd Jne gesagt haben das sie des abgemelten rechtdags Wie dauor geschriben stet also Wartende vnd darumbe alher gein
Eger komen sint Darzu so ist vns auch Wole zu Wissen das die obgen(an)ten h(er)ren zu vns In vns(er)n sitzenden Rate komen
vnd erschienen sint vnd vns Wie dauorgeschriben stet gesagt vnd erzalt haben Des zu Warem vrkunde so han Wir vnse(r)
stette Secrete Jngesiegel des Wir vns tegliche(n) gebruchen hieran tun hencken Datum et Actum Sab(ba)to post festum sancti Dyonisij
et sociorum eius Anno domini Millesimoquadringentesimoquinquagesimoquinto