Ich Cristoff Lantwust Bekenn offenlich mit disem brieve vor allermenglich Nach dem vnd ich neben andern guten
leuten nidergelegen vnd gefangen worden bin des Hochwirdigen fursten vnd herrn hr(n) Johansen Bisshoue zu Wirczpurg
vnd Herczogen In francken auß solicher gefengknuss mich der Durchleuchtigist furst vnd her(r) her(r) Jorig kunig zu Beheim
Marggraue zu Merhern ec(etera) mein allergnedigster her(r) ledig gemacht hat doch zu seiner gnaden hand vnd gefengknuss dar
umb das ich seiner gnaden hofgesind gewesen vnd an wissen vnd willen wider den obgenant(n) Bisshoue gerreten bin nach
dem sein kuniglich gnad mit demselben Bisshoue in Erbpuntnuss ist Darumb mich dieselbe sein kuniglich gnad nun auch
ledig vnd loos gezelt hat auf ein alte vrfeied der sachenhalben ich obgenanter Cristoff lantwust gerede vnd gelob bey mei
nen guten waren trewen vnd eren den obgenanten mein allergnedigsten herrn kunig zu beheim vnd seiner gnaden Erben
landen vnd leutten dester feindter nicht sein sol noch des in arg(n) nymmermere zurechen Des alles zu sicherheit gib ich oftgnt(er)
Cristoff lantwust diesen meinen brieff versigelt mit meinem anhangendem Insigel versigelt Vnd hab zu merer sicherheit
gebeten den Edeln vnd Gestrengen herrn Jobsten von Einsidel kuniglichen Secretarij vnd den Erber vesten Friczel Tossen
meiner gnedigisten frawen der kunigin kuchenmaister mein gunstign herrn vnd gut gunner das sie Ir Insigel neben das
mein haben tun hencken mich der obgeschrib(n) sach domit zubesagen Doch In vnd iren Erben an schaden Geben zu
prag am Montag noch dem Sontag Oculi Nach Cristi geburt Vierzchenhundert vnd dornach Im Sechsundsech
czigisten Jare