Wir Nidas von gotisbarmherzikeit Apt des Closters czu Grussaw, Bekennen uffentlich mit desem briue Allen die en
sehn horen adir lezen, das Wir gesehn haben des allerdurchlauchtigsten Fursten und herrn herrn Wenczlaus Grosmechtigen kunigs
czu Behmen und Herczogen czur Swidnicz unsers allergnedigsten hern unvorfaten brieff mit seiner kuniglichen maiestat an
hangenden Ingesigel vorsegilt der do lawt von worte zu worte als hie nochgeschreben steeth, Wir Wenczlaw von gotisgnaden
kunig czu Behmen Marggraff czu Brandeburg und herczog czu Slezien Bekennen und tun kunt offentlich mit desem briue
Allen den die en sehn adir horen lesen Wann die man Ritter und knechte der lande Swidnicz und Jawor unse lieben
getruwen uns unsern erben und nochkomen kunigen czu Behmen eyn Erbhuldigung Eide und glubde getan haben als
ire rechten erblichen und naturlichen herschaffte, dorumb so globen Wir fur uns unser erben und nochkomen kunige
czu Behm den egenanten mannen Rittern und knechten der lande allen gemeynlich und ir iglichem sunderlich In
guten truwen an alles geuerde wenn is czu schulden kummet das noch tode der hochgeborn ffrawen Agnesen herczoginn
derselben lande die land als sie sullen erblichen an uns komen, das denn dieselben manne Ritter und knechte beider
lande Ir erben und nochkomen alle gemeynlich und ir iglicher sunderlich bey allen iren rechten freyheiten gnaden
und wirden die sie von alden fursten herbracht haben und die sie mit briuen adir redlicher kuntschafft noch des landes
recht beweisen mogen siczen und bleiben sullen von uns unsern erben und nochkomen kunigen czu Behm und allen unsern
Amptleuten und getruwen ungehindert Auch meynen und wellen Wir, das In den selben landen Rittern und knechten
bleiben sullen Eampte und herczenthen die von alden ffursten uff die lande gesatzt und geuallen sein, welcher ouch
unser Erben adir nochkomen kunige czu Behm der eldeste were der sal herre der selben lande sein und sich herre douon
schreiben und nennen und sal ouch dasselbe die land Swidnicz und Jawor von enandir nymmer gescheiden Auch
von sundirlicher gunst tun Wir In die gnade das wir yn beiden landen czu Swidnicz und czum Jawor eynen
houptman und ouch eynen lantschreiber geben und seczen sullen der iglicher von eynem der lande Swidnicz adir
Jawor geborn sey In der land eynem gesessen sey und eyn bederber man sey also das ie nur eyn houptman
und eyn lantschreiber yn beiden den selben landen sey Sundirlichen wellen Wir das nur eyn myntze in beiden
landen sein sulle die an dem czusatze und an dem Silber yn den wirden und yn der gute bleibe und bestee
als sie itzunt ist und eyn zeichen und gebrage habe Auch globen Wir den egenanten mannen Rittern und knechten
In den namen als douor das wir unser erben adir nochkomen kunige czu Behmen sie alle adir bei teyln von der
Kronen des kunigreiches czu Behm nymmer in dheynen czeiten vorkouffen vorpfenden adir empfremden sullen
In dheynenweisz Sunder sie do bey erblich und ewiglich lassen und behalden, mit urkund dicz briues vorsegilt
mit unser kuniglichen maiestat Ingsigle Geben czur Swidnicz Noch crists geburde Drezcenhundirt Iar dor
noch In dem Vneundsechtzigisten Iare an dem ffreitag vor Sand Gallen tage unsers kunigreiches yn dem
Sebenden iare, Des czu klorern bekentnisse haben wir unser Aptey Ingsigel uff desen brieff drucken lassen
der gegeben ist am ffreitage noch Inuocauit Noch cristi geburt virczenhundirt dornoch Im Sebenund
Sechtzigisten Iaren