Wir Albrecht von gots gnaden Marggraue zu Brandemburg des heiligen Romischen Reichs Erczkamerer vnd Curfurste Zu Stettin pomern der Cassuben vnd wenden Herczoge Burggraue zu Nurenberg vnd furste zu Rugen Bekennen vnd thun
kunt offennlich mit dem briue allen den die Jne sehen horen oder lesen Als vns der durchleuchtig furste her Wladislaw kunig zu Beheim Marggraue zu Merhern der Slesien vnd zu luczemburg Herczoge Vnd Marggraue zu lusicz vnser lieber her
vnd bruder vmb frids nutzs vnd gemachs willen seines kunigreichs furstenthum vnd lannd Vnd zu gute seiner vnd vnser vndertan fur sich sein erben nachkomen kunig vnd die Cron zu beheim bey seinen kuniglichen eren vnd wirden an eides stat
Zu vns vnsern erben erbneimen vnd nachkomen ewiglich verpunden vnd verschriben hat Vns mit aller seiner macht beystendig vnd geholffen zusein wider allermeniglich die vns an vnsern erben pfanden guten herschaften Zollspennen gleyten zollen
lanntgerichten vnd herlichkeiten die wir yczund Jnn haben oder furbas mer erlauffen zuszaczung pfanden oder sunst Jn eynich weise vberkumen vnd zu vns bringen hindern beschedigen oder vns der Jn eynich weise entwezen wolten Wie dann solchs
der aynungbrieff so wir von dem obgenantn vnserm lieben hern vnd bruder dem kunig darumb haben eygentlicher begreift vnd ausweiset Das wir vns widerumb zu dem obgenantn vnserm lieben hern vnd bruder dem kunig seinen erben vnd nach=
komen kunigen vnd der Cron zu beheim ewiglichen verpunden haben Vnd verpinden vns mit vnd in krafft diß briefs fur vns vnser erben erbneimen vnd nachkomen bey vnsern furstlichen eren vnd wirden mit guten trewen an eides stat In ewig Zeit
Jnmassen hernach geschriben stet vnd also Ob yemands were die weren die den obgenantn vnsern lieben hern vnd bruder den kunig zu beheim an seinen erben pfanden guten herschaften Zollspennen gleyten strassen Zollen lanntgerichten vnd herlichkaitn
die er yczund Jnn hat oder furbas mer durch kauff pfandung saczung oder sunst Jn eynicherley weise vberkumen Vnd zu Jne brechten hindern beschedigen oder Jne der Jn eynich weise entwezen wolten wie das geschehe das wir dann dem mergenantn vnsern
lieben hern vnd bruder wider allermeniglich mit aller vnser macht getrewlich beystendig vnd geholffen sein sollen vnd wollen ongeuerde Wir vnser erben erbneimen vnd nachkomen sullen noch wollen von vnsern vnser furstenthum noch kainer der vnsern
wegen mit dem obgenantn vnserm lieben hern vnd bruder dem kunig seinen erben vnd nachkomen kunigen Vnd der Cron Jren lannden vnd leuten geystlich noch wertlich vmb kainerley sach willen noch von nymants wegen zu veheden veintschafften oder zu
greiffen kumen Auch kainem der vnsern gestatten den gnantn vnsern lieben hern vnd bruder den kunig die Cron oder die Jren zubeschedigen Sunndern getrewlich dauor sein Vnd ob zu baiderseit von oder die vnsern miteinander zustucken gewunnen Darumb
sollen wir vns baiderseu diß hernachgeschriben austrags des einem yeden suderlich geholffen werden vnd widerfaren sol von einander benugen lassen Nemlich ob der obgnant vnser lieber her vnd bruder der kunig von beheim von seinen der Cron oder seiner
vndertan Vnd der seinen wegen zu vns vnsern vndertanen oder den vnsern Jn der Marck zu Brandemburg oder widerumb Wir vnser vndertanen oder die vnsern Jn der marck zu Brandemburg zu Jne oder den Jren forderung oder spruch gewunnen Darumb
sullen wir vnser schiedlich Rete In gleicher zale gein dessaw zusamen schicken Ob aber were Das vnser lieber her vnd bruder der kunig von seinen der Cron seiner vndertanen Vnd der seinen wegen forderung vnd spruch zu vns vnsern vndertanen oder den vnsern
Jm Burggrafthum zu Nurenberg oder widerumb wir vnsere vnderthanen oder die vnsern Jm Burggrafthum zu Nurenberg zu Jm der Cron Jren vndertanen oder den Jren gewunnen So sollen wir deßhalbn auch vnser schiedlich Rete In gleicher zale gein
Eger zusamen schicken Die sollen mit vleis versuchen vns freuntlich vnd gutlich miteinander zuuereynigen Wo sie aber des gutlich nicht finden mochten sollen sie macht haben zwischen vnser darumb zusprechen Vnd ob sie sich des rechten vnderenander
auch nit vertragen kunten sollen sie einen obman auß des Raten der antwurtet ist zu Jne kiesen vnd sich des vertragen Vnd was also nach clag antwurt vnd allem furbringen der partheyen der oberman vnd die Zusicze oder der merertail vnder Jne zu recht erkennen
vnd sprechen dabey sol es bliben Vnd dem von allen teiln vngeweygert nach gegangen vnd volczogen werden ongeuerlich Vnd so auch vnser her vnd bruder der kunig sein erben oder nachkomen kunig von der Cron zu beheim Jrer vnderthanen oder der Jren wegen
zu Rete mit vns vnsern erben erbneimen vnd nachkomen von vnsern vnser vndertanen oder der vnsern wegen vmb sachen willen die sie vnd wir mitenander zustucken gewunnen also zutagen schicken werden Das sullen wir dem gnantn vnserm lieben hern vnd
bruder seinen erben oder nachkomen kunigen einentag benennen Vnd Jne das einen monat zuuoran verkunden ongeuerde Was lehen antrifft die sollen berecht werden vor dem lehenherrn dannen sie zulehen ruren Vnd was geystlich sach ist vor geystlichem gericht
Es sullen auch erb vnd aigen an den landttafeln hofgerichten oder lanntgerichten die vber sie zu richten herbracht haben geuertigt werden Wir haben wir vns fur vns vnser erben erbneimen vnd nachkomen verpunden das wir wissentlich kainen des oftgnantn
vnsers lieben hern vnd bruder feindt In vnsern furstenthumen vnd lannden nicht hausen hofen essen trencken noch enthalten noch des kainem der vnsern gestatten sollen noch wollen Ob es aber geschehe vnd das vns das wissentlich wurde So sullen wir mit
solchem ernst darczu thun Vnd vns darJnn beweysen dabey man erkennen mug das vns solchs wider vnd nicht lieb sey Wir sollen noch wollen auch dem obgenantn vnserm lieben hern vnd bruder dem kunig vnd der Cron Jn Jre lehen saczung oder regiment
Jrer furstenthum lannd vnd lewt zollspenn gleyt zolle Strassen lanntgericht vnd gerechtigkait nicht greiffen Sunder sie bey solchem allem gleich vns selbs getrewlich helffen schuczen hanthaben vnd schirmen on alles geuerde Vnd In diser vnser
eynung nemen wir auß vnsern heiligen vater den Babst Vnsern allergnedigisten hern den Romischen kayser vnd Jre nachkomen Babst Romisch kayser vnd kunig das ob es sich fuget oder begebe das der obgnant vnser her vnd bruder der kunig vnd die
Cron durch das heilig Reich vnd seine Vormunden Romisch kayser oder kunig oder anndere an Jren guten erben pfanden herschaften zollspennen gleyten zollen lanntgerichten vnd herlichkaiten zuuergewaltigen vnderstanden wirden So sullen vnd wollen
wir Jme wider solichen gewalt getrewlichen beholffen vnd Jne deselben hilff berait sein nach der zeit vnd wir oder vnser amptleut des ermant werden Jnnwendig vier gantzer wochen vnuerzogentlich vnd on alles geuerde Were aber das der hilff ehe not
wurd so sollen wir auch dester ehe vnd schier mit vnser macht berait sein Wir nemen auch In diser vnser eynung sunderlich auß die erbeyung vnd eynungen die wir haben mit den Erczbischouen zu meyncz Trier Vnd den Curfursten vnd fursten von
Sachsen vnd hessen Herczog Sigmunden Vnd Herczog Albrechten gebrudern von Beyrn Vnd Graf Vlrichen von Wirtemberg Auch so sollen vnd wollen wir hinfur In kain annder eynung geen aufnemen noch eyntecken Wir haben dann zuuoran
dise vnser eynung außgenomen alles on argk vnd on alles geuerde Vnd des zu warem vrkunde haben wir vnser Jnsigel an disen brieff thun hencken Auch all obgeschriben stuck punct vnd artickel mit hantgebenden trewen an eides stat globt vnd ver=
sprochen ware stet vnd veste zuhalten Bescheen vnd geben zu Cadolzpurgk an sand Mertens des heiligen Bischofs tage Nach Cristi vnsers herrn gepurdt Vierczehenhundert Vnd Jm drey vnd Sibenczigisten Jaren