Wir Fridreich von gots gnaden Romischer kayser zu allenn zeitten Merer des Reichs zu Hungern Dalmacien Croacien (etc) kunig Herczog zu Osterreich zu Steir zu kerndten vnd zu Crain Graue zu Tirol (etc)
vnd Wir Wladislaw von denselben gnaden kunig zu Behem Marggraue zu Merhern Herczog in der Slesien vnd zu Luczemburg Marggraue zu lausicz (etc) Bekennen fur vns vnser erben so wir yecz haben vnd kunftigkleich gewynnen vnd vnser nachkomen
vnd tunkunt allermenigkleich die disen brief sehen oder horen lesen Das wir angesehen betracht vnd zu herczen genomen haben die lieb vnd angeboren freuntschaft damit wir aneinander gepflicht gewest sein auch zu merung vnser beder stannd ere
vnd wirde vnd aufnemen vnser lannd vnd lewt Vnd haben dadurch auch von sunder lieb vnd zunaigung wegen so wir zueinander haben vnd damit wir bed vnd vnser lannd vnd lewt in rue frid vnd gemach mit vnd geneinander despas siczen in
vnsern stannden eren vnd wirden beleiben vnd vns vnserer widerwerttigen desstatleicher aufhalten mugn Vns bed nach guter vorbetrachtung zeittigem rat vnd rechter wissen zueinander tay veraint verpuntten vnd verschriben haben vnd ain ganncze
stete vesste ewige vnd redleiche ainigung verstentnuss vertrag puntnuss vnd verschreibung miteinander gemacht habn wissentleich mit dem briefe Also das wir mit allen vnsern lannden lewten vnd herschaften so wir yecz haben vnd ob got wil
kunftigkleich gewynnen mit vnd geneinander ain redleichen aufrichtigen Cristenleichen vnd ewigen frid halten vesstigkleich beyeinander steen vnd beleiben vnd aneinander mit aller vnser macht ewigkleich geraten geholffen vnd widereinander nicht
sein sullen noch wellen trewleich getrewleich vnd furderleich in allem das zu merung vnser yedes stannds ere wirde vnd aufnemen fride vnd gemach vnser lannd vnd lewt dienet vnd furdert Es sol auch vnser kainer dem anndern nach sein sein stannd
wirden regierung lannden lewten vndertan vnd gerechtigkaiten so vnser yeder yecz hat vnd kunftigkleichen gewynnt vnd zusteenn werden nicht trachten stellen noch vnser kainer die wider den anndern annemen aufnemen noch halten noch ichts tun
hanndeln furnemen noch betrachten das wider vnser ain oder wider vnser ains erben stannd ere vnd wirde gerechtigkait oder wider vnser lannd vnd lewt nutz vnd frumen vnd den schedleich wer oder sein mocht Es sol auch vnser kainer noch vnser kains erbn
des anndern noch seiner erben lannden lewten herschaften vnd vndertan khain krieg vehde noch veintshaft sagen noch ainerlay shaden tun noch beschedigung zuefugn in was form oder gestalt das wer haimleich noch offenleich noch vnser kainer des den sein
zutun gestatten noch aus sein lannden vnd herschaften solhs beschehen lassen in khain weis Sunder vnser yeder sol die sein so solhs tetten mit aller seiner macht furderleich vnd vnuerzogenleich darumb straffn vnd darzu halten das sy vmb solh schaden wandel
kerung vnd abtrag tun vnd ob sich begeb da got vor sey das sich vnser ains oder vnser ains erben lannd vnd lewt herschaft oder vndertan ainer oder meniger von vns abwerffen vnd an den andern slahen vnd geben wolten oder sich wider vns oder vnser aines
erben aufwerffen oder widerwerttigkleich halten vnd vngehorsam sein wolten die sol kainer aus vns wider den anndern noch sein erben aufnemen noch in sein lannden halten hawsn hofn schuczen noch schirmen noch ainerlay rat helffe noch beystannd tun noch
gunst guten willen noch furderung beweisen noch zuelegen noch des den sein zutun gestatten in khain weis Sonnder wider solh vnser vngehorsam vnd widerwerttig vndertan lannd vnd lewt mit aller vnser macht trewlich aneinander helffen asslanng
vntz die zu gehorsam bracht werden Ob sich auch begeb das vnser ainer zu dem anndern zusprechen hett oder gewunne vmb was sachen das wer das sol zwischn vnser beder austragn werden nach vnserer kunigreich vnd herschaft freyhait vnd gewonhait
Hieten oder gewunnen aber die vnsern zueinander zusprechen es sey vmb schedleich oder vmb vnschedleich sachen so sol der klager dem antwurter nachfarn fur das lanndsrecht darin er gesessen ist vmb ain yede sach als sich geburt Vnd sullen wir vns
erben noch vndertan darumb aneinander nicht beschedign noch der tat darin gebrauchen noch des vnsern lannden lewten noch vndertan zutun gestatten Was wir auch vor puntnuss verschreibung vnd verainigung mit yemand vor der wir gemacht
haben die sullen diser vnser puntnuss vnd verschreibung aller ding vnschedleich sein Was auch wir vnd vnser vodern kunig zu Behem vnd Herczogen zu Osterreich vnser kron vnd herschaft daselbs zu Behem zu Osterreich vnd zu Merhern vor miteinander
verschreibung verainigung vnd puntnuss oder was wir annders miteinander yeczettun gehabt haben oder gewynnen werden die wellen wir mit diser vnser verschreibung puntnuss vnd verainigung nicht abnemen noch in ainigerlay weg krenckn
Sonnder sy sullen in allen ireen puncten Clauseln vnd artigkeln darin begriffen bey krefften beleiben als ob die von wort zu wort hieinbegriffen vnd aufgedruckt wern alles trewleich vnd vngefuerleich Mit vrkund des briefs der vnser yeder
ain in geleicher lawt hat vnder vnser beder Maiestat anhanngenden Ingsigeln Geben zu Nuxemberg an freitag vor dem Sunntag Oculi in der Vassten Nach Cristi geburd vierczehenhundert vnd in dreyundsibentzigisten Jare