Wir Mathias von gotts genaden zu Hungern Behem Dalmacien Croacien (et)c(etera) kunig Herczog zu Luczenburg vnd Slesien Marggraue zu Merhern vnd
zu Lusitz (et)c(etera) Bekennen vnd tun kund vor allermeniglich mit disem briue Das wir angesehen haben vnnser lieben getrewen des Burgermeisters Ratmanne vnd Gemeyne
vnnser Stat zu Gorlitz diemutige vnd vleissige gebete auch betracht ire stete trewe vnd willige dinste die sie vns vnd vnnser Crone zu Behem oft vnd dicke
gar nuczbarlich getan haben vnd in kunftigen zeiten tun sollen vnd mugn Vnd haben Inen von sunderlichn vnnsern genaden mit rechter wissen vnd mit
czeytign rate vnnser Rete dise sundere genade getan vnd tun von kuniglichr macht zu Behem In krafft dits briefs das se von allen vnd yglichn iren Dorffern
in die Stat kumer ader iren mitburgern vnd einwonern gehorende die sie von vns ader vnnsern voiten vnd ambtmannen zu lehen emphangen haben ader in
kunftigen zeiten zu lehen emphohen wurden ader vff der egenantn vnnser Stat Gorlitz begnadung vnd freiheyt vssgereicht sein ader kunftiglich vssgereicht
wurden die so yetz haben ader in kunftigen zeiten haben ader zu sich wurden bringen in allen mitleiden anstegen vnd hulff wie man die benennen mochte
nicht leiden durffen noch sollen mit vnd neben der Ritterschafft vnd lanndlewten des Gorlitzschn weichbildes sunder mit vnd neben der Stat Gorlitz beleiben
vnd leiden sollen vor allermeniglich vngehindert Auch ap sich in kunftigen zeyten ymer wurde gebuern das man vns ader vnnsern nachkomendn kunign zu
Behem eynerley bete losunge Stewr ader hilffe geben solte so sollen die obgenantn ire dorffer die in der Stat kumer ader iren mitburgern vnd einwonern
gehorn neben vnd mit anndern Dorffern die Ritterschafft vnd lanndschafft des Gorlitzschn Weichbildes anlangende vnd angehorunge nicht angeslagen
angekerbet ader angeschraben werden Auch in sunderheit dauon khein Stewr noch ansteg wie mann die benennen mochte neben der Ritterschafft vnd
lanndschafft in keynerley weise geben Sunder ap sichs wurde geburn soliche obberurte hulffe ader Stewre eyme kunig zu Behem zu geben die sollen die von
Gorlitz neben anndern Steten zu Inen geordent noch alden anstegen aussagunge vnd ordenuge derselben Stete ausrichten vnd geben darzu sie alle
soliche obberurte ire dorffer In zu hilff nemen vnd haben sullen vor allermeniglich vngehindert So sichs auch geburte zu hereffarten ader in das veldt
zu ziehen auff vnnser vnd vnnser nachkomen kunig zu Behem ader vnnser ambtlewten gebote sollen die von Gorlitz solichn veldtzug wie der mag
angeslagen werden hoch vnd nyder nebem dem voyt der lannde vnd Sechs steten lannden vnd Steten nach redlichem irem vermogen mit raisign vnd drabantn
vnd annder veldt zugehorunge volfuren vnd ausrichten vnd nicht verrer noch weitter von vns ader vnnsern nachkomendn kunigen zu Behem vnd
vnnsern ambtlewten von wegen der obberurtn irer dorffer beladen noch angezogen werden Vnd ap vnnser vorfarn kunign zu Behem In den dingen
nichts annders gesthafft erkannt vnd geordent hetten soll diser vnnser ordenug schaffung vnd begnadung genzlich vnsthedelich sein vnd darumb so
wir denn wollen das dise vnnser sunderliche begnadunge den von Gorlitz ewiglich sol gehalden werden vnd der gebrauchen sollen vor allermeniglich
vngehindert Darumb so gebieten wir vnnsern voiten die zu zeiten sein werden vnd allen anndern ambtleuten vnd einwonern der selbn Sechs lande
vnd Stete die obgenanten von Gorlitz an allen obgeschriben begnadungn nicht hindern in keynerley weise sunder der allenthalben gerusamlich ge
brauchen lasset zu ewigen zeiten vnd dabey handthabet schuczet vnd schirmet vnnser vnd vnnser nachkomen kunig zu Behem swerer vngenad
zuuormeiden Mit vrkundt dits briefs vorsigelt mit vnnsern kuniglichn anhangendn In sigil Geben zu Bresslaw am donrstag an Sannd Appolonia
tag der heiligen Junkfrawen Nach Cristi geburt Tausent vier hundert vnd Im funffundsibenczigisten Vnnser Reiche des Hungrischn Im sibenczehendn
vnd des Behemischn Im Sechsten iaren