Wir Albrecht von gots gnaden Herczog czu Sachssen, Lantgraue In doringen vnd Marggraue czu Meyssen bekennen vnd tun kunt
mit disem vnsern brife vor allermenniglich, Nach dem wir vnser lehen so wir von der loblichen Cron czu Behemen als Marggraue
czu Meyssen haben von dem durchluchtigen fursten vnd herrn, herrn Wladislao kunige czu Behemen Marggrauen czu Merhern, der
Slesien vnd czu Luczelburg herczogen vnd Marggrauen czu lussicz vnserm gnedigen hern vff hutin dato dises brifs entpfangen
Inhalt siner kuniglichen lehenbrife vns dorober gegeben, dorynne vnder anderm gemelt wirdt, Ob sichs begebe das wir vnser
erben, lehenman vnd nachkomen Marggrauen czu Meyssen von der gemelten lehen wegen von ymand czu rechtfertigen vnder
standen wurden, Darumb sullen wir als lehenfurst der Cron czu Behemen durch sein kuniglich gnade sein erben vnd nachkomen
kunige vor sinem kuniglichen stul czu prage ader In sinem kuniglichen hoffe czu Breslaw vnnd fast nyndert anders
gefordert vnnd furgenomet werden, Vnnd so eynicher stigt eyner ader meher In der Slesien geschehet, das er nyndert
anders dann In dem kuniglichen hoffe czu Breslaw gerechtfertigt werden sult, Desselben sullen wir vnser erben, lehen
man vnd nachkomen Marggrauen czu Meyssen auch gefreyet vnnd nicht anders dann czu Breslaw in sinem kuniglich(en)
hoffe vmb solch lehen gerechtfertigt werden, vnnd so dann die Stat Breslaw yczt nicht In des gemelten vnsers gnedig(en)
hern des kunigs czu Behemen handen stehet, Haben wir vns bewilligt vnnd bewilligen vns In crafft dises brifs das wir
vnser erben vnnd nachkomen Marggrauen czu Meyssen in der czeit, wo wir vmb solch lehen vor siner kuniglichen gnad(en)
sinen erben vnnd nachkomen kunigen als lehenfursten czu recht gefordert, das wir dann vor sinen kuniglichen gnaden
ader sinen nachkomenden kunigen dieweile czu prage gestegen vnnd die verantwurten wollen In aller massen als
czu Breslaw hette gescheen sollen, Doch mit vorbehaltung, ap vnnd wenn die gnante Stat Breslaw an sin kuniglich
gnade sein erben nachkomend kunige vnnd die Cron czu Behemen wider kemen, das wir vnser erben vnd nachkomen
Marggrauen czu Meyssen als das In land gewonheit sein wirde der freheit gleicherweisse als die fursten In der Slesie
die selbs besiczung haben, noch vnserm vnnd irer gefallen nach laut der verschreibung vns von sinen kuniglich(en)
gnaden vnnd sinen vorfarn dorober gegeben auch haben vnnd gebruchen mugen, Vsserhalben was die herrschafft
plawen antrifft, darumb wir von siner kuniglichen gnaden sinen erben vnnd nachkomen kunigen czu Prage ader in
sinem kuniglichen hofe czu Behemen gerechtfertigt werden sullen von allermenniglich vnuerhindert alles trewlich
vnnd vngeuerlich, czuurkunde haben wir vnser Ingesigel an disen vnsern brife wissentlich lassen hengen,
Der geben ist czu Prage am dornnstag Sant Sigmünds tag Nach cristi vnsers herrn gepurt Virczehenhundert
dornach Jm czweyvnndachtczigsten Jaren